Abalevi 6 - Baibuli Ekibono kya Katonda 2014

¹ Musengwa Katonda era yagha Musa ebiragiro bino ati:

² “Ekigheebwayo olw'okusasula kinaagheebwangayo, omuntu bw'anaakolanga ekibi mu maiso ga Musengwa Katonda, ng'aloba okwiriza Muisiraeli mwine ekintu kye yamulekera ng'omusingo, oba ng'amunhagaku ekintu, oba ng'amutoolaku ekintu mu kuguyaguya,

³ oba ng'aboine ekintu ekyabula yaakyeiriza, era yaalayira ebiziramu ati takibonangaku.

⁴ Ole anaakolanga ekibi ku ebyo ebyogeirwaku, era abantu ni bamanha ng'ali n'omusango, anaizangagho ekintu ekyo kye yanhaga, oba ekyo kye yafuna mu kuguyaguya, oba ekyo Muisiraeli mwine kye yamulekera ng'omusingo n'aloba okukimwiriza, oba ekyo ekyabula n'akyeiriza ng'akiboine,

⁵ oba ekyo kyonakyona kye yeelayiriraku ebiziramu ati takibonangaku. Omuntu oyo, ku lunaku lw'anaagheerangaku ekigheebwayo kye ng'omutango, anaizangagho ekintu ekyo nga kiramba, era yaayongeraku n'omutango gwa kitundu kirala kirala ku buli bitundu bitaanu eby'ekintu ekyo era anaatoolanga ekintu ekyo yaakigemya ole mwene kyo.

⁶ Anaaleetanga eri kabona entaama enume eziraku kikyamu kyonakyona, ebe ekigheebwayo ng'omutango. Omughendo ogw'empiiya oguja mu ntaama eyo gunaabalirirwanga mu mbalirira entongole ey'omu isinzizo.

⁷ Kabona anaaghangayo omusengo olw'omuntu oyo mu maiso ga Musengwa Katonda, era omuntu oyo anaasoniyibwanga.”

Emisengo egyokebwa nga miromba

⁸ Musengwa Katonda yaalagira Musa

⁹ aghe Aaroni ni batabane be amateeka aganaafuganga ebigheebwayo ebyokebwa ati: “Ekigheebwayo ekyokebwa, kinaasigalanga ku nku ku alutaari obwire bwonabwona, era omuliro gunaakuumibwanga nga guli kwaka.

¹⁰ Agho kabona anaavaalanga ekivaalo eky'olugoye olughegheevu, n'empale ey'olugoye olughegheevu, era yaatoola eivu eriva ku kigheebwayo ekyokeibwa ku alutaari, yaalita gha mbali gh'alutaari eyo.

¹¹ Agho anaatoolangamu ebivaalo ebyo yaavaala ebindi, yaatwala eivu kuliya kwa weema, mu kifo ekirongoofu.

¹² Omuliro oguli ku alutaari gunaakuumibwanga nga guli kwaka, aghazira kuzikira naire. Buli nkyo kabona anaagutangaku enku yaayaliiraku ekigheebwayo ekyokebwa, era anaagwokerangaku amasavu ag'ekigheebwayo olw'okutabagana.

¹³ Omuliro gunaakuumibwanga nga guli kwaka buliidho ku alutaari, aghazira kuzikira naire.

Ekigheebwayo eky'emere ey'empeke

¹⁴ “Gano n'amateeka aganaafuganga ekigheebwayo eky'emere ey'empeke: kabona ow'oku lulyo lwa Aaroni anaakighangayo eri Musengwa Katonda emberi gh'alutaari.

¹⁵ Anaayoolangaku omuganda ku buwunga obwo obuseereibwa obukalamu, n'omuzigo, n'obubbaani bwonabwona ebireeteirwaku, byonabyona yaabyokera ku alutaari, ng'akamanhiso akooleka nga byonabyona bigheereibwayo eri Musengwa Katonda. Akawoowo kaabyo kasangaaza Musengwa Katonda.

¹⁶ Ekyo ekisigalagho bakabona n'abanaakiryanga. Kinaafumbwangamu emigaati egitazimbulukusiibwa, era baagiriira mu kifo ekitukuvu, mu luya lw'Eweema ey'Okwagaananirangamu ni Musengwa Katonda.

¹⁷ Tikiifumbirwengamu kizimbulukusa. Nze Musengwa Katonda mwene nkighaire bakabona, kibe omugabo gwaibwe ku byange ebigheebwayo nga byokebwa omuliro. Kitukuvu inho ng'oti n'ekigheebwayo olw'ebibi, era ng'oti n'ekigheebwayo ng'omutango.

¹⁸ Mu byanda byonabyona ebiriidha, kiisi musaadha ku b'oku lulyo lwa Aaroni anaabanga wa idembe okukiryaku, ogwo nga n'omugabo gwaibwe ogw'olubeerera ku by'okulya ebigheebwayo eri Musengwa Katonda nga byokebwa omuliro. Kiisi anaakigemangaku, anaabanga mutukuvu.”

¹⁹ Musengwa Katonda yaalagira Musa ati:

²⁰ “Kino n'ekigheebwayo Aaroni ni baidhukulu be kye banaaghangayo eri Musengwa Katonda, ku lunaku lwe banaasiigirwangaku omuzigo okwawulibwa. Banaaghangayo buli lunaku kilo ndala ey'obuwunga obuseereibwa obukalamu ekitundu kyabwo ekindi ku nkyo, n'ekitundu kyabwo ekindi eigulo.

²¹ Bunaatabulwangamu omuzigo, bwakalangirwa ku lugyo. Bwe bunaamalanga okukalangibwamu ebitole, bunaaleetebwanga ng'ekigheebwayo eky'emere ey'empeke. Akawoowo kaakyo kasangaaza Musengwa Katonda.

²² Mu byanda byonabyona ebiriidha, ekigheebwayo kino kinaagheebwangayo mwidhukulu wa Aaroni yeenayeena anaabanga nga n'akola ng'Omukulu wa Bakabona. Kinaayokebwanga kyonakyona ekiramba.

²³ Ekigheebwayo eky'emere ey'empeke ekigheebwayo kabona, tikiiriibwengaku. Kinaayokebwanga kyonakyona.”

Ekigheebwayo olw'ebibi

²⁴ Musengwa Katonda yaalagira Musa

²⁵ aghe Aaroni ni batabane be amateeka aganaafuganga ekigheebwayo olw'ebibi ati: “Mu kifo mwene mwe baitira ekigheebwayo ekyokebwa, mwe banaitiranga n'ekigheebwayo olw'ebibi, agho mu maiso ga Musengwa Katonda. Ekigheebwayo kino kitukuvu inho.

²⁶ Kabona anaakighangayo n'aidhanga okukirya era kinaaliirwanga mu kifo ekitukuvu, mu luya lw'Eweema ey'Okwagaananirangamu ni Musengwa Katonda.

²⁷ Buli ekinaagemanga ku mamba yaakyo, kinaakolwangaku amaani ag'obutukuvu bwakyo. Era ekivaalo ekinaamansirwangaku omusaayi gwakyo, banaakyolezanga mu kifo ekitukuvu.

²⁸ Entamu ey'eitosi efumbiibwamu emamba yaakyo, enaamenhebwanga. Aye entamu ey'ekyuma eky'ekikomo bw'enaabanga nga n'efumbiibwamu emamba yaakyo, enaakolokotebwanga yaanaazibwa n'amaadhi.

²⁹ Kiisi musaadha ow'oku lulyo lwa Aaroni, anaabanga wa idembe okukiryaku. Kitukuvu inho.

³⁰ Aye omusaayi gwakyo bwe gunaaleetebwanga mu Weema ey'Okwagaananirangamu ni Musengwa Katonda, era ni gukozesebwa mu musengo ogugheebwayo olw'ebibi, olwo tikiiriibwengaku kinaayokebwanga bwokebwe.