Abalevi 4 - Baibuli Ekibono kya Katonda 2014

Ebigheebwayo olw'ebibi ebitali mu bugenderevu

¹ Musengwa Katonda yaalagira Musa,

² akobere Abaisiraeli ati omuntu bw'anaakolanga ekibi nga tagendereire, n'asobya mu kintu kyonakyona ku ebyo Musengwa Katonda bye yalagira, anaabanga n'okukola bino:

³ Omukulu wa Bakabona bw'anaabanga nga n'akoze ekibi, mu nsambo eyo n'aleeta ku bantu omusango, aidha kughangayo eri Musengwa Katonda olw'ekibi kye, ente enume entototo ng'eziraku kikyamu kyonakyona.

⁴ Aidha kugireetanga ku mulyango gw'Eweema ey'Okwagaananirangamu ni Musengwa Katonda, era anaatanga omukono gwe ku mutwe gwayo, yaagiitira agho mu maiso ga Musengwa Katonda.

⁵ Agho Omukulu wa Bakabona oyo, aidha kutoolanga ku musaayi gw'ente eyo, agutwale mu Weema ey'Okwagaananirangamu ni Musengwa Katonda.

⁶ Anainhikanga olwala mu musaayi ogwo, yaagutoonhia emikuzi musanvu emberi gh'olutimbe olutukuvu.

⁷ Agho aidha kutoolangaku omusaayi ogundi, yaagusiiga ku bintu ebiri ng'oti mayiga ga nsolo ebiri ku alutaari eniokezebwaku obubbaani obw'akawoowo mu maiso ga Musengwa Katonda, eri mu Weema ey'Okwagaananirangamu ni Musengwa Katonda. Omusaayi gwonagwona ogusigairegho anaagufukanga ku ntobo y'alutaari eyokerwaku ebigheebwayo, eri ku mulyango gw'Eweema ey'Okwagaananirangamu Musengwa Katonda.

⁸ Omukulu wa Bakabona oyo anaatoolanga amasavu goonagoona ag'ente eyo, ago agali ku byenda,

⁹ n'ago agali ku nsigo ghalala n'ensigo dhaaku, era n'ekitundu ekisinga obulungi ku ini,

¹⁰ nga bwe bitoolebwa mu nte ey'ekigheebwayo olw'okutabagana. Bino anaabyokeranga ku alutaari eyokerwaku ebigheebwayo.

¹¹ Aye ebisigairegho byonabyona bino: oluwu lwayo, emamba yoonayoona, omutwe, ebibbonge, ebyenda n'obusa,

¹² binaatwalibwanga kuliya kw'ekifo abantu kye baasimbamu weema dhaibwe, mu kifo ekirongoofu kye bafukamu eivu. Eyo ye banaabyokeranga n'omuliro ku nku.

¹³ Abaisiraeli boonaboona aghalala bwe banaabanga nga n'abakoze ekibi nga tibagendereire, ni basobya ku ebyo Musengwa Katonda bye yalagira, era ekibi ekyo ni kitamanhikiragho,

¹⁴ ekibi ekyo olunaamanhikanga, boonaboona ghalala baidha kughangayo ente enume entototo ng'ekigheebwayo olw'ebibi, baagireeta emberi w'Eweema ey'Okwagaananirangamu ni Musengwa Katonda.

¹⁵ Era abakulu ab'ebikunsu banaatanga emikono gyaibwe ku mutwe gwayo, nga bali mu maiso ga Musengwa Katonda, era baagiitira agho.

¹⁶ Olwo Omukulu wa Bakabona aidha kutoolanga ku musaayi gw'ente eyo, agutwale mu Weema ey'Okwagaananirangamu ni Musengwa Katonda.

¹⁷ Anainhikanga olwala mu musaayi ogwo, yaagutoonhia emikuzi musanvu emberi gh'olutimbe olutukuvu.

¹⁸ Agho aidha kutoolangaku omusaayi ogundi, yaagusiiga ku bintu ebiri ng'oti mayiga ga nsolo ebiri ku alutaari eri mu maiso ga Musengwa Katonda. Omusaayi gwonagwona ogusigairegho anaagufukanga ku ntobo y'alutaari eyokerwaku ebigheebwayo, eri ku mulyango gw'Eweema ey'Okwagaananirangamu ni Musengwa Katonda.

¹⁹ Agho anaatoolanga amasavu goonagoona ag'ente eyo, yaagookera ku alutaari.

²⁰ Anaakolanga ku nte eyo nga bw'akola ku nte ey'ekigheebwayo olw'ebibi, olwo agheeyo omusengo olw'ebibi by'abantu abo basoniyibwe.

²¹ Agho ente eyo enaatwalibwanga kuliya kwa weema, Omukulu wa Bakabona yaagyokera eyo ng'oti ni bw'ayokya ere y'aba ng'aghaireyo olw'ekibi kye. Ekyo n'ekigheebwayo olw'ebibi eby'abantu boonaboona aghalala.

²² Omufuzi bw'anaabanga n'akoze ekibi nga tagendereire, n'asobya ku ebyo Musengwa Katonda bye yalagira,

²³ bw'anaamanhisibwanga ekibi kye, aidha kuleetanga ekigheebwayo kye nga kya mbuzi nume eziraku kikyamu kyonakyona.

²⁴ Anaatanga omukono gwe ku mutwe gwayo, yaagiitira ku luuyi olw'omugooda olw'alutaari ng'olingiriire e buvandhuba, agho mu maiso ga Musengwa Katonda aghaitirwa ensolo edh'ebigheebwayo ebyokebwa; ekyo n'ekigheebwayo olw'ebibi.

²⁵ Agho Kabona anainhikanga olwala lwe mu musaayi ogw'ensolo eyo, yaagusiiga ku bintu ebiri ng'oti mayiga ga nsolo ebiri ku alutaari eyokerwaku ebigheebwayo. Ogusigairegho yaagufuka ku ntobo y'alutaari eyo.

²⁶ Amasavu gaayo goonagoona anaagookeranga ku alutaari, ng'oti ni bw'ayokya amasavu ag'ekigheebwayo olw'okutabagana. Atyo Kabona bw'anaaghangayo omusengo olw'ekibi ky'omufuzi, era omufuzi oyo aidha kusoniyibwanga.

²⁷ Omuntu yeenayeena ku bantu ababuliidho bw'anaabanga nga n'akoze ekibi nga tagendereire, n'asobya ku ebyo Musengwa Katonda bye yalagira,

²⁸ bw'anaamanhisibwanga ekibi kye, aidha kuleetanga ekigheebwayo kye nga kya mbuzi nkazi eziraku kikyamu kyonakyona.

²⁹ Anaatanga omukono gwe ku mutwe gwayo, yaagiitira ku luuyi olw'omugooda olw'alutaari ng'olingiriire e buvandhuba, agho mu maiso ga Musengwa Katonda, aghaitirwa ensolo edh'ebigheebwayo ebyokebwa.

³⁰ Agho kabona anainhikanga olwala lwe mu musaayi gw'ensolo eyo, yaagusiiga ku bintu ebiri ng'oti mayiga ga nsolo ebiri ku alutaari eyokerwaku ebigheebwayo. Ogusigairegho yaagufuka ku ntobo y'alutaari eyo.

³¹ Omuntu oyo aleese ensolo eyo, anaagitoolangamu amasavu goonagoona, ng'oti ni bwe gatoolebwa mu nsolo ey'ekigheebwayo olw'okutabagana. Olwo kabona yaagookera ku alutaari, gaavaamu akawoowo akasangaaza Musengwa Katonda. Atyo kabona bw'anaaghangayo omusengo olw'ekibi ky'omuntu oyo, era omuntu oyo aidha kusoniyibwanga.

³² Omuntu bw'anaaleetanga entaama nga n'ekigheebwayo kye olw'ebibi, eidha kubanga nkazi ng'eziraku kikyamu kyonakyona.

³³ Anaatanga omukono gwe ku mutwe gwayo, yaagiitira ku luuyi olw'omugooda olw'alutaari ng'olingiriire e buvandhuba, aghaitirwa ensolo edh'ebigheebwayo ebyokebwa.

³⁴ Agho kabona anainhikanga olwala lwe mu musaayi gw'ensolo eyo, yaagusiiga ku bintu ebiri ng'oti mayiga ga nsolo ebiri ku alutaari eyokerwaku ebigheebwayo. Ogusigairegho yaagufuka ku ntobo y'alutaari eyo.

³⁵ Omuntu oyo aleese ensolo eyo, anaagitoolangamu amasavu goonagoona, ng'oti ni bwe gatoolebwa mu ntaama egheebwayo olw'okutabagana. Olwo kabona yaagookera ku alutaari ghalala n'eby'okulya ebigheebwayo eri Musengwa Katonda. Atyo kabona bw'anaaghangayo omusengo olw'ekibi ky'omuntu oyo, era omuntu oyo aidha kusoniyibwanga.