Abalevi 3 - Baibuli Ekibono kya Katonda 2014

Ekigheebwayo olw'okutabagana

¹ “Omuntu bw'anaaghangayo ekigheebwayo olw'okutabagana, aidha kughangayo ente enkazi oba enume ng'eziraku kikyamu kyonakyona.

² Omuntu oyo aidha kutanga omukono gwe ku mutwe gwayo, era anaagiitiranga agho ku mulyango gw'Eweema ey'Okwagaananirangamu ni Musengwa Katonda. Agho bakabona ab'oku lulyo lwa Aaroni banaamansiranga omusaayi gwayo ku ndhuyi dhoonadhoona edh'alutaari.

³ Era omuntu oyo anaaghangayo eri Musengwa Katonda ebitundu bino eby'ensolo eyo, ng'ekigheebwayo ekyokebwa: amasavu goonagoona agali ku byenda,

⁴ n'ensigo dhombi ghalala n'amasavu agadhiriku, n'ekitundu ekisinga obulungi ku ini.

⁵ Bakabona ab'oku lulyo lwa Aaroni banaayokeranga ebyo byonabyona ku alutaari, ghalala n'ekigheebwayo ekyokebwa ekiromba ekiri ku nku ku muliro. Akawoowo kaabyo kasangaaza Musengwa Katonda.

⁶ “Omuntu bw'anaaghangayo entaama oba embuzi ng'ekigheebwayo olw'okutabagana, aghengayo enkazi oba enume ng'eziraku kikyamu kyonakyona.

⁷ Omuntu oyo bwanaabanga ng'ali kughaayo entaama ento, anaagigheerangayo mu maiso ga Musengwa Katonda.

⁸ Anaatanga omukono gwe ku mutwe gwayo, yaagiitiranga agho emberi w'Eweema ey'Okwagaananirangamu ni Musengwa Katonda. Agho bakabona ab'oku lulyo lwa Aaroni banaamansiranga omusaayi gwayo ku ndhuyi dhoonadhoona edh'alutaari.

⁹ Era omuntu oyo anaaghangayo eri Musengwa Katonda ebitundu bino eby'ensolo eyo ng'ekigheebwayo ekyokebwa: amasavu, omukira omusavu omulamba okusalira ku igumba ery'omugongo, amasavu goonagoona agali ku byenda,

¹⁰ ensigo dhombi ghalala n'amasavu agadhiriku, n'ekitundu ekisinga obulungi ku ini.

¹¹ Kabona anaabyokeranga byonabyona ku alutaari ng'ekigheebwayo eky'eby'okulya ekigheebwayo eri Musengwa Katonda ekyokebwa.

¹² “Omuntu bw'anaaghangayo embuzi, anaagigheerangayo mu maiso ga Musengwa Katonda.

¹³ Aidha kutanga omukono gwe ku mutwe gwayo, era anaagiitiranga agho emberi w'Eweema ey'Okwagaananirangamu ni Musengwa Katonda. Agho bakabona ab'oku lulyo lwa Aaroni banaamansiranga omusaayi gwayo ku ndhuyi dhoonadhoona edh'alutaari.

¹⁴ Era omuntu oyo anaaghangayo eri Musengwa Katonda ebitundu bino eby'ensolo eyo, ng'ekigheebwayo ekyokebwa: amasavu goonagoona agali ku byenda,

¹⁵ n'ensigo dhombi ghalala n'amasavu agadhiriku, n'ekitundu ekisinga obulungi ku ini.

¹⁶ Kabona anaayokeranga ebyo byonabyona ku alutaari ng'ekigheebwayo eky'eby'okulya ekyokebwa, olw'akawoowo kaakyo akasangaaza Musengwa Katonda. Amasavu goonagoona ga Musengwa Katonda.

¹⁷ Mutalyanga ku masavu oba ku musaayi; eryo n'erinaabanga eiteeka ery'olubeerera, lye munaakuumanga buli ghe munaabanga enaku dhoonadhoona.”