Abalevi 27 - Baibuli Ekibono kya Katonda 2014

Amateeka agagema ku bigheebwayo eri Musengwa Katonda

¹ Musengwa Katonda yaalagira Musa,

² akobere Abaisiraeli ati, “Ole bw'aneeyamanga okughaayo omuntu eri Musengwa Katonda ng'ekigheebwayo, omuntu oyo agheereibwayo anaanunulwanga omughendo ogw'empiiya guno,

³ ogunaabalirirwanga ku mbala entongole ey'omu isinzizo: Bw'anaabanga omusaadha ow'emyaka okuva ku makumi abiri okutuuka ku nkaaga anaanunulwanga ebitundu amakumi ataanu (50) ebya feeza.

⁴ Bw'anaabanga omukazi anaanunulwanga ebitundu amakumi asatu (30) ebya feeza.

⁵ Bw'anaabanga omwisuka okuva ku myaka etaanu okutuuka ku makumi abiri anaanunulwanga ebitundu amakumi abiri (20) ebya feeza. Ate omuguna anaanunulwanga ebitundu ikumi (10) ebya feeza.

⁶ Bw'anaabanga omwana omulenzi ali ghansi w'emyaka etaanu anaanunulwanga ebitundu bitaanu (5) ebya feeza. Ate omughala akaali eibodhe anaanunulwanga ebitundu bisatu (3) ebya feeza.

⁷ Bw'anaabanga omusaadha aswisa mu myaka enkaaga anaanunulwanga ebitundu ikumi na bitaanu (15) ebya feeza. Ate omukazi nga yeena aswisa mu myaka enkaaga anaanunulwanga ebitundu ikumi (10) ebya feeza.

⁸ Aye ole eyeeyama bw'anaabanga omwavu, nga taghanga kusasulira ku mbalirira eyo anaaleetanga omuntu oyo ye yeeyama okughaayo mu maiso ga kabona, kabona yaamubaliramu omughendo ogwa ghansi, ng'ajiira ku busobozi bw'oyo ali kughaayo eyeeyama.

⁹ “Obweyamo bwe bunaabanga obw'okughaayo ensolo eikirizibwa okuba ekigheebwayo eri Musengwa Katonda, olwo ebigheebwayo byonabyona buli muntu by'anaaghangayo eri Musengwa Katonda, binaabanga bitukuvu.

¹⁰ Ensolo ey'ekigheebwayo, omuntu taagikyusengamu kutaagho yindi, oba okufaanisaamu enungi mu kifo ky'embi, oba embi mu kifo ky'enungi. Bw'anaakolanga atyo, olwo ensolo dhombi dhinaabanga dha Musengwa Katonda.

¹¹ Aye obweyamo bwe bunaabanga obw'okughaayo ensolo etali nongoofu, etaikirizibwa kuba kigheebwayo eri Musengwa Katonda, omuntu oyo anaagitwalanga eri kabona,

¹² kabona yaabalirira omughendo ogugijaamu, ng'ajiira ku bulungi oba ku bubi bwayo. Omughendo gw'anaabaliriranga n'ogunaabanga ogw'enkomerero.

¹³ Oyo agireese bw'anaayendanga okuginunula, anaasasulanga omughendo gwayo, yaagaitaku n'ekitundu kirala kirala ku buli bitundu bitaanu eby'omughendo ogwo.

¹⁴ “Omuntu bw'anaaghangayo endhu ye ebe eya Musengwa Katonda, kabona anaabaliriranga omughendo ogugijaamu ng'ajiira ku birungi oba ku bitali birungi ebigiriku. Omughendo gw'anaabaliriranga n'ogunaabanga ogw'enkomerero.

¹⁵ Oyo agighaireyo bw'anaayendanga okuginunula, anaasasulanga omughendo gwayo, yaagaitaku n'ekitundu kirala kirala ku buli bitundu bitaanu eby'omughendo ogwo.

¹⁶ “Omuntu bw'anaaghangayo ekitundu ky'eitaka lye yasikira, libe erya Musengwa Katonda, omughendo gwalyo gunaabalwanga nga babonera ku bungi bw'ensigo edhimala okusiga mu itaka eryo. Eitaka erimalagho kilo amakumi abiri edh'ensigo ya sayiri linaabalirirwangamu ebitundu bya feeza bitaanu.

¹⁷ Bw'anaaghangayo eitaka eryo ng'omwaka omutukuvu gwakawaaku, linaabanga ku mughendo omwidhuvu ogulibaliriirwamu.

¹⁸ Ate bw'anaalighangayo nga ghabiseegho entangama bukyanga omwaka omutukuvu guwaaku, kabona anaalibaliriranga omughendo gwalyo, ng'ajiira ku myaka egikaasigaireyo okutuuka ku mwaka omutukuvu ogwiraku, olwo yaakendeezanga ku mughendo gwalyo.

¹⁹ Ole aghaireyo eitaka eryo bw'anaayendanga okulinunula, anaasasulanga omughendo gwalyo ogubaliriirwa, yaagaitaku n'ekitundu kirala kirala ku buli bitundu bitaanu eby'omughendo ogwo, olwo lyasigalanga nga likaali lirye.

²⁰ Aye bw'ataayendenga kulinunula, oba bw'anaaliguzanga omuntu owundi ng'akaali kulinunula, tairengayo kwikirizibwa kulinunula.

²¹ Mu mwaka omutukuvu ogunaiririranga, linaafuukiranga irala lya Musengwa Katonda enaku dhoonadhoona, olwo linaabanga lya bakabona.

²² “Omuntu bw'anaaghangayo eri Musengwa Katonda eitaka lye yagula obugule, nga tiyalisikira,

²³ kabona anaabaliriranga omughendo gw'empiiya ogulijaamu, ng'ajiira ku myaka egikaasigaireyo okutuuka ku mwaka omutukuvu. Olwo omuntu aghaireyo eitaka eryo yaasasula omughendo ogwo ku lunaku olwo lwene, era empiiya dhinaabanga dha Musengwa Katonda.

²⁴ Mu mwaka omutukuvu, eitaka eryo linairizibwanga mwene lyo eyalitunda, oba abasika be.

²⁵ “Emighendo gyonagyona ginaabalirwanga ku mbala entongole ey'omu isinzizo.

²⁶ “Ensolo ezaaliibwa mu luzaalo olusooka, eba ya Musengwa Katonda. N'olw'ekyo tighaabengagho agighaayo ng'ekigheebwayo eky'ekyeyendere k'ebe ente, oba entaama, oba embuzi, eyo ya Musengwa Katonda.

²⁷ Aye ensolo eyo ezaaliibwa mu luzaalo olusooka bw'enaabanga nga ya nsolo etali nongoofu, enaanunulibwanga ku mughendo ogubaliriirwa ku mbala entongole, ni gugaitibwaku ekitundu ekirala ekirala ku buli bitundu ebyagwo ebitaanu. Bw'enaabanga nga tenunwirwa, enaaguzibwanga omuntu owundi ku mughendo gw'ebaliriirwamu.

²⁸ “Aye tighaabengagho kintu ekimaze okufuukira irala ekya Musengwa Katonda, kinaatundibwanga oba kinaanunulibwanga, k'abe muntu, oba k'ebe nsolo, oba ka kibe kibandha ekisikire. Buli kintu ekinaabanga nga kimaze okufuukira irala ekya Musengwa Katonda kinaasigalanga nga kya Musengwa Katonda oyo enaku dhoonadhoona.

²⁹ Ni bw'anaabanga omuntu taanunulwenga, kasita anaabanga ng'amaze okufuukira irala owa Musengwa Katonda, anaitibwanga bwitibwe.

³⁰ “Ekitundu ekirala ekirala ku buli bitundu eikumi eby'ebirime ebikungulwa mu nsi, kya Musengwa Katonda, ka kibe kya nsigo oba eky'ebibala eby'emiti.

³¹ Omuntu bw'anaayendanga okununula ekirala ku bitundu ebyo, ka kibe eky'ensigo oba eky'ebibala eby'emiti, anaasasulanga omughendo ogukijaamu nga gubaliriirwa ku mbala entongole ey'eisinzizo, yaagaitaku n'ekitundu kirala kirala ku buli bitundu ebitaanu eby'omughendo ogwo.

³² Ku buli nsolo ikumi enfuge, endala enaabanga ya Musengwa Katonda. Ensolo dhaimwe, ka dhibe ente oba entaama oba embuzi, bwe dhinaabanga nga dhiri kubalibwa, ku buli ikumi munaatoolangaku ndala yaaba ya Musengwa Katonda.

³³ Mwene nsolo taayawulengamu nungi na mbi, era taadhifaanisengamu. Bw'anaatoolanga ensolo n'agifaanisaamu eyindi, dhombi dhinaagheebwangayo eri Musengwa Katonda, era tidhiinunulwenga.”

³⁴ Ebyo n'ebiragiro Musengwa Katonda bye yagha Musa ku Lusozi Sinai ku lw'Abaisiraeli.