Abalevi 25 - Baibuli Ekibono kya Katonda 2014

Omwaka ogwomusanvu

¹ Musengwa Katonda yaalagira Musa ku lusozi Sinai

² akobere Abaisiraeli ati: “Bwe mulituuka mu nsi ye nja okubagha, mutanga mu Musengwa Katonda ekitiisa nga muleka okulima ensi eyo buli mwaka ogwomusanvu.

³ Munaasiganga ensigo mu nimiro dhaimwe, mwawooleranga amasamba gaimwe ag'emizabbibu, era mwakungulanga ebibala byamu okumala emyaka mukaaga.

⁴ Aye omwaka ogwomusanvu, gunaabanga mwaka gwa kuleka eitaka liwuumulire irala, omwaka ogugheereibwayo eri Musengwa Katonda. Mutasiganga nsigo mu nimiro dhaimwe, era mutawooleranga masamba gaimwe ag'emizabbibu.

⁵ Endhiraira enaameranga mu nimiro dhaimwe mutagikungulanga, era n'emiti gy'emizabbibu egitali miwoolere mutaginogangaku. Gunaabanga mwaka gwa kuleka itaka liwuumulire irala.

⁶ Waire ng'eitaka tiriirimwenga omwaka ogwo gwonagwona, aye linaababalizanga emere, imwe, n'abairu baimwe, n'abakozi baimwe, n'abasenze abali mu imwe,

⁷ n'ensolo dhaimwe enfuge n'edh'omu nsiko. Byonabyona bye linaabazanga, binaabanga bya kulya.

Omwaka omutukuvu

⁸ “Munaabalanga emyaka musanvu emikuzi musanvu, ng'egyo gyonagyona aghalala n'emyaka amakumi ana n'omwenda.

⁹ Agho ku lunaku olweikumi olw'omwezi ogwomusanvu, olunaku olw'okutoolebwaku ebibi, munaatumanga omuntu yaaja ng'afuuwa endeka mu nsi yaimwe mwonamwona.

¹⁰ Mu nsambo eyo munaatukuzanga omwaka ogwamakumi ataanu (50). Munaalangiriranga eri abatyamye b'omu nsi yaimwe muti baidha kulekulwa babe ba idembe. Mu mwaka ogwo abantu banairizibwanga ebintu byaibwe ebyatundibwa, era abantu abaatundibwa mu bwiru, banaalekulwanga bairayo mu bantu baibwe.

¹¹ Mutasiganga nsigo mu nimiro dhaimwe, era mutakungulanga endhiraira enaameranga mu nimiro dhaimwe. Era mutanonganga mizabbibu ku miti gitali miwoolere.

¹² Omwaka ogwo gwonagwona gunaabanga mutukuvu ye muli. Munaalyanga ebyo ebinaabalanga byene mu nimiro ku bwabyo.

¹³ Mu mwaka ogwo, buli ekyatundibwa kinairizibwanga mwene kyo eyasooka.

¹⁴ Kale bwe mubanga muguza Baisiraeli banaimwe eitaka, oba nga mubagulaku, mutaseeragananga.

¹⁵ Omughendo gunaagerekebwanga, nga gujiira ku myaka eitaka gye linaamalanga nga liri kubalaku ebibala, memale omwaka ogw'okuliiriza oyo ali kulitunda gutuuke.

¹⁶ Emyaka egikaabulayo bwe ginaabanga emingi, omughendo gunaabanga munene. Emyaka egikaabulayo bwe ginaabanga emitono, n'omughendo gunaabanga mutono, kuba omughendo ogw'ebikungulwa n'ogunaabanga guli kutundibwa.

¹⁷ Mutaseeragananga, aye mutyenga Musengwa Katonda waimwe.

Emere ey'okulya mu mwaka ogwomusanvu

¹⁸ “Mugemenga amateeka gange, era mugonderenga ebiragiro byange, olwo munaabanga n'emiraala mu nsi.

¹⁹ Era ensi enaabazanga ebibala byayo, mwafuna bye mulya mwaiguta, mwaba n'emiraala.

²⁰ “Aye muteebuuza kye munaalyanga mu mwaka ogwomusanvu, nga timusize era nga muzira kye mukungula.

²¹ Nze Musengwa Katonda ndibagha enkabi mu mwaka ogwomukaaga, ensi yaabaza emere enaabamazangaku emyaka ebiri.

²² Bwe munaasiganga mu mwaka ogwomunaana, munaabanga mukaalya ku bye mwakungula mu mwaka ogwomukaaga, era munaabanga mukaali n'emere ebamala okutuusa bye musize omwaka ogwo lwe binaakungulwanga.

Ebintu ebiirizibwa beene byo

²³ “Eitaka tiriitundibwenga butaizibwa, kuba ninze mwene lyo. Imwe muli basenze busenze ku itaka eryo.

²⁴ Eitaka bwe linaatundibwanga, munaaganhanga mwene lyo eyasooka yaalinunula.

²⁵ “Omuisiraeli bw'anaayavughalanga n'atunda eitaka lye, owoluganda lwe anaanunulanga eitaka eryo.

²⁶ Oyo aziraku muntu wa kulinunula, bw'anaakombaghalanga n'afuna ebimala okulinunula,

²⁷ anaabalanga emyaka gy'amaze ng'alitunze, yaasasula eyaligula ekyo ekija mu myaka egikaasigaireyo okutuuka ku mwaka omutukuvu, memale yaalyeiriza.

²⁸ Bw'anaabanga nga tasobola kulinunula, linaabanga mu mikono gy'oyo eyaligula okutuuka ku mwaka omutukuvu, memale olwo lyamwirizibwa.

²⁹ “Omuntu bw'anaatundanga endhu ye eri mu kibuga ekyezungulwirwa ekimante, anaabanga wa idembe okuginunula mu ntangama ya mwaka mulala okuva ghe yagitundira.

³⁰ Aye bw'ataaginunulenga mu ntangama eyo ey'omwaka omulamba, enaafuukiranga irala y'oyo eyagigula, yaaba yiye ni baidhukulu be enaku dhoonadhoona. Teizibwengayo waire mu mwaka omutukuvu.

³¹ Aye endhu edh'omu byalo ebiteezungulwirwa bimante, dhinaabalirwanga mu ise irala n'enimiro: beene dho banaabanga ba idembe okudhinunula, era dhinaabairizibwanga mu mwaka omutukuvu.

³² Aye Abalevi banaabanga ba idembe okununula endhu dhaibwe edhaazimbibwa mu bibuga byaibwe ebyabagheebwa, ekiseera kyonakyona kye banaayenderangaku.

³³ Omulevi bw'anaatundanga endhu ye eri mu kindi ku bibuga ebyo n'ataginunula, endhu eyo enaamwirizibwanga mu mwaka omutukuvu, kuba endhu Abalevi dhe baba nadho mu bibuga byaibwe, dhibeera irala nga dhaibwe enaku dhoonadhoona mu Baisiraeli.

³⁴ Aye eitaka lye baayiraku eryezungulwire ebibuga byaibwe, tiriitundibwenga, kuba liba lyaibwe enaku dhoonadhoona.

Okuwola abaavu

³⁵ “Muisiraeli mwino bw'anaayavughalanga nga tasobola kubaagho ku lulwe yenka, onaamughanga obuyambi yaaba gh'oli, ng'oti ni bwe wandighaire omuntu ow'endha oba omusenze.

³⁶ Otamutoolangaku magoba waire, aye otyanga Katonda wo, waaleka Muisiraeli mwino yaaba gh'oli.

³⁷ Otamusabanga magoba ku mpiiya dh'omuwola, oba ku mere y'omuguza.

³⁸ Ninze Musengwa Katonda waimwe eyabatoola mu Misiri, ni mbagha ensi Kanaani, era ni mba Katonda waimwe.

Abairu okugheebwa eidembe

³⁹ “Muisiraeli mwino bw'anaayavughalanga ni yeetunda y'oli, otamukozesanga mirimo ng'oti mwiru.

⁴⁰ Anaabanga gh'oli ng'omukozi asasulwa empeera era ng'omusenze. Anaakugheerezanga okutuusa ku mwaka omutukuvu.

⁴¹ Olwo anaakuvangaku ghalala n'abaana be, yairayo mu bantu be

⁴² kuba Abaisiraeli bairu bange, be natoola mu Misiri. Kale batatundibwanga mu bwiru.

⁴³ Muisiraeli mwino otamufugisanga bukambwe, aye otyanga Katonda wo.

⁴⁴ Bwe munaayendanga abairu, munaabagulanga mu maghanga agabeezungulwire.

⁴⁵ Munaabanga ba idembe okugula abasenze n'ab'enganda dhaibwe ababa mu imwe. Abaana ng'oti n'abo be bazaalira mu nsi yaimwe, munaabanga ba idembe okubafuula abaimwe ku bwaimwe.

⁴⁶ Munaabanga ba idembe okubalaamira abaana baimwe ng'eky'obusika, baafuuka baibwe ku bwaibwe obulamu bwaibwe bwonabwona. Abo be munaafuganga obwiru. Aye Baisiraeli banaimwe mutabafugisanga bukambwe.

⁴⁷ “Omusenze aba mu imwe bw'anaakombaghalanga, aye Muisiraeli munaimwe n'ayavughala, ni yeetunda eri omusenze oyo oba eri ow'omu maka ge, okuba omwiru,

⁴⁸ bw'anaamalanga okwetunda, anaikirizibwanga okununulibwa owundi ku baganda be,

⁴⁹ oba ise omuto, oba mutabane wa ise omuto, oba owundi ku boluganda lwe. Oba ni mwene bw'anaakombaghalanga, anaabanga wa idembe okwenunula.

⁵⁰ Anaateesanga n'oyo eyamugula, baabalirira emyaka okuva mu kiseera kye yeetundiramu okutuuka ku mwaka omutukuvu, memale olwo omughendo gw'asasula okwenunula gwagererwa ku mpeera y'omukozi egwanira emyaka egyo.

^51-52 Anaizangayo ekitundu ky'omughendo gwe yamugula, nga bagerera ku myaka egikaasigaireyo,

⁵³ ng'ali ng'oti n'abaire akolera empeera eya buli mwaka. Amugula atamufugisanga bukambwe.

⁵⁴ Bw'ataanunulibwenga mu nsambo ng'oti n'eyo, anaalekulwanga ghalala n'abaana be bafuuka ba idembe, mu mwaka omutukuvu.

⁵⁵ Kuba Abaisiraeli bairu bange, ninze eyabatoola mu Misiri. Ninze Musengwa Katonda waimwe.