Abalevi 24 - Baibuli Ekibono kya Katonda 2014

Okulabiriranga entaala mu Kifo Ekitukuvu

¹ Musengwa Katonda yaalagira Musa ati:

² “Koba Abaisiraeli bakuleetere omuzigo omukenenule ogukamwirwa mu bibala eby'emiti emyoliva ebisekwirwa, ogw'okuta mu ntaala enaayakanga obutazikira.

³ Buli igulo, Aaroni aidha kugikunaanianga, agireke ng'eyaka obutazikira okutuusa ku nkyo, agho mu maiso ga Musengwa Katonda, ku luya kw'olutimbe oluli emberi ow'Esanduuku ey'Endagaano, mu Kifo Ekitukuvu einho agho mu Weema ey'Okwagaananirangamu ni Musengwa Katonda. Eiteeka eryo liidha kukuumibwanga ebyanda n'ebyanda.

⁴ Aaroni anaalabiriranga buliidho entaala edhiri ku kikondo ekya zaabu omukenenule, mu maiso ga Musengwa Katonda.

Emigaati egigheebwayo eri Katonda

⁵ “Mutoolanga kilo ikumi na ibiri edh'obuwunga obuseereibwa obukalamu, mwafumbamu emigaati ikumi n'ebiri.

⁶ Mugitegekanga mu miteeko ebiri nga buli muteeko gulimu emigaati mukaaga, mwagita mu maiso ga Musengwa Katonda ku meeza ya zaabu omukenenule.

⁷ Era mutanga obubbaani obusinga bulungi ku buli muteeko, bukole mu kifo ky'emigaati nga n'akamanhiso akooleka nga byonabyona bigheereibwayo eri Musengwa Katonda oyo ng'ekigheebwayo ekyokebwa.

⁸ Buli Sabbato aghazira kwosaamu, emigaati egyo mugitanga mu maiso ga Musengwa Katonda ku lw'Abaisiraeli, nga n'endagaano ey'olubeerera.

⁹ Emigaati egyo ginaabanga gya Aaroni ni batabane be, era bagiriiranga mu kifo ekitukuvu, kuba ekyo n'ekitundu ekitukuvu einho eky'eby'okulya ebigheebwayo eri Musengwa Katonda.”

Amateeka agagema ku kwesasuuza

^10-11 Agho olwatuuka ghaabaagho omusaadha nga ise Mumisiri, aye nga inhina Muisiraeli eyayetebwanga Shalomithi mughala wa Diburi ow'omu kika eky'Abadaani. Omusaadha yaaba n'enkaayana n'omusaadha Omuisiraeli, yaavuma eriina lya Musengwa Katonda ng'akolima. Baamuleeta eri Musa.

¹² Baamukuumira aghantu nga bali kuteega Musengwa Katonda abakobere eky'okumukolera.

¹³ Agho Musengwa Katonda yaakoba Musa ati:

¹⁴ “Oyo omusaadha eyakoliime, mumutwale mu kifo aghazira weema dha bantu. Era abo boonaboona abaamuwuliire, bate emikono gyaibwe ku mutwe gwe, okukakasa nti yakoliime, memale olwo abantu boonaboona bamukube amabaale afe.

¹⁵ Era omale okobere Abaisiraeli oti kiisi anaakolimanga Katonda, anaabonerezebwanga olw'ekibi kye.

¹⁶ Omuisiraeli yeenayeena oba omusenze anaavumanga eriina lya Musengwa Katonda, abantu boonaboona bamukubanga amabaale yaafa.

¹⁷ “Oyo aitanga omuntu, yeena aitibwanga.

¹⁸ N'oyo aitanga ensolo etali yiye, aliyiranga mwene yo eyindi enamu. Obulamu busasulwa bulamu.

¹⁹ “Omuntu bw'atuusanga ku muntu mwine okulumizibwa, yeena atuusibwangaku okulumizibwa mu nsambo n'endala.

²⁰ Amenhanga mwine eigumba, yeena erirye limenhebwanga. Eriiso lisasulwanga liiso, n'eriino lisasulwanga liino. Obulumi omuntu bw'anaatuusanga ku wundi, yeena bw'anaatuusibwangaku.

²¹ Aitanga ensolo, agirighangamu eyindi enamu. Oyo aitanga omuntu, yeena aitibwanga.

²² Eiteeka eryo ligema ku Baisiraeli ni ku basenze abali mu Isiraeli, kuba ninze Musengwa Katonda waimwe.”

²³ Agho Musa ng'amaze okukobera ebyo Abaisiraeli, baatwala oyo eyakolima mu kifo aghazira weema dha bantu, baamukuba amabaale yaafa. Mu nsambo eyo Abaisiraeli baakola nga Musengwa Katonda bweyakoba Musa.