Abalevi 23 - Baibuli Ekibono kya Katonda 2014

Ebibinuko eby'okusinza Katonda

¹ Musengwa Katonda yaalagira Musa

² akobere Abaisiraeli ati: “Dhino n'enaku edh'okukolerangaku embaga edh'ebibinuko byange nze Musengwa Katonda bye nalagira, dhe munaalangiriranga okwesololezaaku okunsinza.

Sabbato

³ “Enaku dhiri mukaaga edhinaakolerwangaku emirimo, aye olunaku olwomusanvu, lwa Sabbato, lunaku lwa kuwuumula. Ku lunaku olwo mutakolanga mulimo gwonagwona, aye mwesolozenga okunsinza. Olwa Sabbato lunaku lwa Musengwa Katonda yoonayoona ye munaabanga.

Okubitizibwa kw'Abaisiraeli

⁴ “Dhino n'enaku edh'okukolerangaku embaga edh'ebibinuko bya Musengwa Katonda, dhe munaalangiriranga mu biseera byadho ebyalagirwa.

⁵ Olw'okubitizibwa kw'Abaisiraeli, lutoolera eigulo ku lunaku olweikumi n'eina, olw'omwezi ogusooka.

Emigaati egitazimbulukusiibwa

⁶ “Ekibinuko eky'Emigaati Egitazimbulukusiibwa kinaatooleranga ku lunaku olweikumi n'eitaanu olw'omwezi gwene ogwo ogusooka. Munaalyanga emigaati egitazimbulukusiibwa okumala enaku musanvu.

⁷ Ku lunaku olusooka ku edho omusanvu, muneesolozanga okunsinza. Mutakolanga mulimo waire omulala ku egyo gye mukola buliidho.

⁸ Enaku edho omusanvu munaaghangayo eri Musengwa Katonda ekigheebwayo ekyokebwa. Ku lunaku olwomusanvu muneesolozanga okusinza. Aye mutakolanga mulimo waire omulala ku egyo gye mukola buliidho.”

⁹ Musengwa Katonda yaayongera okulagira Musa

¹⁰ akobere Abaisiraeli ati: “Bwe mulituuka mu nsi Musengwa Katonda y'abagha ni mukungula engaano, ekinhwa ekisooka mukitwalanga wa kabona.

¹¹ Anaakighangayo ng'akiwuuba mu maiso ga Musengwa Katonda, olwo Musengwa Katonda oyo yaakisiima. Kabona anaakighangayo ku lunaku olwiririra Sabbato.

¹² Era ku lunaku lwe munaagheerangayo ekinhwa ky'engaano ekyo, munaaghangayo eri Musengwa Katonda entaama enume ento ng'ekigheebwayo ekyokebwa, ng'eziraku kikyamu kyonakyona, era nga ya mwaka mulala gwonka.

¹³ Era ku kigheebwayo ekyo, munaagheerangaku kilo ibiri edh'obuwunga obuseereibwa obukalamu era obutabwirwamu omuzigo ogw'emiti emyoliva, ng'ekigheebwayo eky'eby'okulya. Akawoowo ak'ekigheebwayo ekyo kasangaaza Musengwa Katonda. Era munaaghangayo lita ndala ey'omwenge ogw'emizabbibu, ng'ekigheebwayo eky'ebyokunhwa.

¹⁴ Mutalyanga ku ngaano mpyaka naire, k'ebe nga mbisi, oba nga nkalange, oba ng'ekoleibwamu omugaati, okutuusa nga mumaze okuleeta ekigheebwayo kya Katonda waimwe. Eiteeka lino linaakuumibwanga ab'olulyo lwaimwe boonaboona, enaku dhoonadhoona, buli ye banaabanga.

Eky'Amakungula

¹⁵ “Munaabalanga wiiki musanvu okuva ku lunaku olwiririra Sabbato eyo lwe muleeteireku ekinhwa kyaimwe eky'engaano okukighaayo eri Musengwa Katonda.

¹⁶ Ku lunaku olwamakumi ataanu olwiririra Sabbato eyomusanvu, munaaghangayo eri Musengwa Katonda ekigheebwayo ekindi eky'emere ey'empeke.

¹⁷ Buli maka ganaaleetanga emigaati ebiri eri Musengwa Katonda ng'ekigheebwayo ekiwuubibwa. Buli mugaati gunaakolebwanga mu kilo ibiri edh'obuwunga obuseereibwa obukalamu, nga butabwirwamu ekizimbulukusa. Emigaati egyo munaagighangayo eri Musengwa Katonda ng'ekigheebwayo eky'ebirime ebisooka okukungula.

¹⁸ Aghalala n'emigaati egyo, munaaghangayo entaama musanvu edh'omwaka omulala omulala, n'ente enume ento ndala, n'entaama enume enkulu ibiri; dhoonadhoona tidhiibengaku kikyamu kyonakyona. Dhinaagheebwangayo eri Musengwa Katonda ng'ekigheebwayo ekyokebwa, ghalala n'ekigheebwayo eky'emere ey'empeke, n'eky'ebyokunhwa. Akawoowo ak'ekigheebwayo ekyo kasangaaza Musengwa Katonda.

¹⁹ Era munaaghangayo embuzi enume ndala, ng'ekigheebwayo olw'ebibi, n'entaama ento ibiri edh'omwaka omulala omulala, ng'ekigheebwayo eky'okutabagana.

²⁰ Kabona anaaghangayo eri Musengwa Katonda emigaati gire ghalala n'entaama, ng'ekigheebwayo ekiwuubibwa, ekiba ekya bakabona. Ebigheebwayo ebyo bitukuvu.

²¹ Ku lunaku olwo munaalangiriranga, mwesoloza okunsinza. Mutakolanga mulimo waire omulala ku egyo gye mukola buliidho. Eiteeka lino munaalikuumanga ebyanda n'ebyanda, mu nse dhoonadhoona, eyo yoonayoona ye munaabanga.

²² “Bwe munaabanga mukungula ebirime byaimwe, mutamalirangayo irala ebisembayo ku mbibi dh'enimiro dhaimwe. Oba okwirayo einhuma okulonderera ebyo ebiba bisigaireyo. Ebyo byonabyona mubirekerenga abaavu n'abasenze. Ninze Musengwa Katonda waimwe.”

Eky'Omwaka Omuyaaka

²³ Musengwa Katonda yaalagira Musa ati:

²⁴ “Kobera Abaisiraeli oti ku lunaku olusooka olw'omwezi ogwomusanvu, ghanaabangagho okuwuumulira irala olw'ekiidhukizo. Kunaalangirirwanga nga bafuuwa endeka, era muneesolozanga okusinza.

²⁵ Munaaghangayo eri Musengwa Katonda ekigheebwayo ekyokebwa, era timuukolenga waire omulala ku mirimo egyo gye mukola buliidho.”

Olunaku olw'okutoolebwaku ebibi

²⁶ Musengwa Katonda yaakoba Musa ati:

²⁷ “Olunaku olweikumi olw'omwezi ogwomusanvu, lunaabanga lwa kutoolebwaku bibi. Ku lunaku olwo, muneebonerezanga, era mwesoloza okusinza, mwaghaayo eri Musengwa Katonda ekigheebwayo ekyokebwa.

²⁸ Ku olwo, mutakolanga mulimo waire omulala ku egyo gye mukola buliidho, kuba lunaku lwaimwe lwa kutoolebwaku bibi mu maiso ga Katonda waimwe.

²⁹ Kiisi muntu ateebonerezenga ku olwo, anaabanga nga takaabalirwa mu bantu ba Katonda,

³⁰ era kiisi anaakolanga omulimo ku olwo, Musengwa Katonda anaamutoolanga mu bantu be yaamuzikiriza.

³¹ Mutakolanga mulimo waire omulala. Eiteeka eryo linaakuumibwanga ab'olulyo lwaimwe enaku dhoonadhoona, eyo yoonayoona ye banaabanga.

³² Okuva eigulo ery'olunaku olwomwenda olw'omwezi, okutuuka eigulo ery'olunaku olweikumi, munaakuumanga olunaku luno nga lwa kuwuumulira irala ng'oti Sabbato, era muneebonerezanga.”

Eky'Entindi

³³ Musengwa Katonda yaalagira Musa ati:

³⁴ “Kobera Abaisiraeli ati olweikumi n'eitaanu olw'omwezi ogwo ogwomusanvu, ghanaabangagho Ekibinuko eky'Entindi ekikolerwa Musengwa Katonda, okumala enaku musanvu.

³⁵ Ku lunaku olusooka ku edho omusanvu, muneesolozanga okusinza, era mutakolanga mulimo waire omulala ku egyo gye mukola buliidho.

³⁶ Buli lunaku, mu nnaku edho omusanvu, munaaghangayo ekigheebwayo ekyokebwa. Ku lunaku olwomunaana, muneesolozanga okusinza, era mwaghaayo ekigheebwayo ekyokebwa. Lunaabanga lunaku lukologho lwa kusinza, era mutakolanga mulimo waire omulala ku egyo gye mukola buliidho.

³⁷ “Edho n'enaku edh'okukolerangaku embaga edh'ebibinuko Musengwa Katonda dh'alagiire, dhe munaalangiriranga okwesoloza okusinza n'okughaayo eri Musengwa Katonda ebigheebwayo ebyokebwa, ebigheebwayo eby'emere ey'empeke, emisengo, n'ebigheebwayo eby'okunhwa, buli kirala mu biseera byakyo.

³⁸ Ebibinuko ebyo n'ebyeyongeire ku Sabbato dha Musengwa Katonda edhabuliidho. Era ebigheebwayo ebyo n'ebyeyongeire ku byabuliidho, bye mughaayo eri Musengwa Katonda olw'okutuukiriza obweyamo, ni bye mughaayo eby'ekyeyendere.

³⁹ “Bwe munaamalanga okukungula ebirime byaimwe, munaakuzanga ekibinuko kino, okumala enaku musanvu, nga mutoolera n'olunaku olweikumi n'eitaanu olw'omwezi ogwomusanvu. Ku lunaku olusooka ni ku lusembayo, ghanaabangagho okuwuumulira irala.

⁴⁰ Ku lunaku olwo olusooka, munaatwalanga ku bibala eby'emiti gyaimwe ebisinga bulungi. Munaatwalanga ensaga edh'emiti eminaazi, n'ensaga edh'emiti egy'amakaba amangi, n'obuti obukulira ku mbali kw'omwiga, memale mwasagamba okumala enaku musanvu, nga musaaka Musengwa Katonda waimwe.

⁴¹ Munaakuzanga ekibinuko kino okumala enaku musanvu buli mwaka. Eiteeka eryo munaalikuumanga ebyanda n'ebyanda.

⁴² Abaisiraeli mwenamwena munaabanga mu ntindi okumala enaku musanvu,

⁴³ olwo Abaisiraeli ab'omu nse edhiriiragho bamanhe ng'Abaisiraeli abaabasooka nabaleetera okusula mu ntindi, bwe nabatoola e Misiri. Ninze Musengwa Katonda waimwe.”

⁴⁴ Kale atyo Musa yaakobera Abaisiraeli embaga edh'ebibinuko Musengwa Katonda bye yalagira okukuzanga.