Abalevi 22 - Baibuli Ekibono kya Katonda 2014

Ebigheebwayo Musengwa Katonda by'asiima

¹ Musengwa Katonda yaalagira Musa ati:

² “Koba Aaroni ni batabane be, batenga ekitiisa mu bintu ebitukuvu, Abaisiraeli bye bantonera, balobenga kwonoona liina lyange eitukuvu. Ninze Musengwa Katonda.

³ Bakobe oti mu nse dhoonadhoona edhiriiragho, kiisi musaadha ow'oku lulyo lwaibwe atali mulongoofu anaaseetanga eri ebitukuvu Abaisiraeli bye bantonera, tairengayo kwikirizibwa kwidha mu maiso gange kumpeereza. Ninze Musengwa Katonda.

⁴ “Ghatabangagho muntu yeenayeena ow'oku lulyo lwa Aaroni alwaire endwaire ey'ebigenge, oba atoonha okuva mu bitundu bye eby'ekyama olw'obulwaire, anaalyanga ku bintu ebitukuvu, okutuusa lw'anaamalanga okuba omulongoofu. Era kabona anaafuukanga atali mulongoofu bw'anaagemanga ku kintu ekifuuse ekitali kirongoofu, olw'okwekonta ku kintu ekifiire, oba olwa mwene okuvaamu amaadhi ag'obusaadha,

⁵ oba bw'anaagemanga ku kitonde kyonakyona ekitali kirongoofu, oba ku muntu yeenayeena atali mulongoofu.

⁶ Kiisi kabona anaafuukanga atali mulongoofu mu nsambo oti n'eyo, anaasigalanga nga tiimulongoofu okutuusa eigulo era atalyanga ku bigheebwayo ebitukuvu, okutoolaku ng'amaze okunaaba omubiri.

⁷ Endhuba ng'egwire anaabanga mulongoofu; olwo ng'asobola okulya ku bigheebwayo ebitukuvu, kuba ebyo n'emere ye nga kabona.

⁸ Atalyanga mamba ya nsolo efiire yeene, oba eitiibwa ensolo eyindi, olwo alobenga kwereetera kuba atali mulongoofu. Ninze Musengwa Katonda.

⁹ “Bakabona boonaboona banaatuukirizanga bye mbalagira, balobenga kwonoona ni bafa olw'okubinhooma. Ninze Musengwa Katonda abafuula abatukuvu.

¹⁰ “Atali wa ku lulyo lwa bakabona atalyanga ku bigheebwayo ebitukuvu, waire omugeni akyaliire kabona, oba omukozi we y'asasula empeera.

¹¹ Aye abairu, abo kabona be yagula n'empiiya dhe, n'abo abaazaalirwa mu maka ge, banaikirizibwanga okulya ku mere ya kabona.

¹² Mughala wa kabona bw'anaabayiranga omusaadha atali kabona, atalyanga ku bigheebwayo ebyo ebitukuvu.

¹³ Aye mughala wa kabona bw'aba namwandu oba ng'agobeibwa iba ng'aziraku mwana, era ng'aize mu ndhu ya ise okutyama, anaalyanga ku mere ya ise. Aye atali wa ku lulyo lwa kabona, atalyanga.

¹⁴ “Omuntu atali wa ku lulyo lwa bakabona bw'anaalyanga ku kigheebwayo ekitukuvu nga tagendereire, anairizangagho kabona ekigheebwayo ekyo ekitukuvu, yaayongeraku n'omutango gwa kitundu kirala kirala ku buli bitundu bitaanu eby'ekigheebwayo ekyo.

¹⁵ Bakabona batayonoonanga bigheebwayo ebitukuvu Abaisiraeli bye baghaayo eri Musengwa Katonda,

¹⁶ nga baganha abantu abatali bakabona okubiryaku, olwo baaleetera abantu abo okubaaku omusango era n'okubonerezebwa. Ninze Musengwa Katonda abifuula ebitukuvu.”

¹⁷ Musengwa Katonda yaalagira Musa ati:

¹⁸ “Koba Aaroni, ni batabane be, n'Abaisiraeli boonaboona oti, Omuisiraeli oba omusenze ali mu Isiraeli, bw'anaaleetanga eri Musengwa Katonda ekigheebwayo kye ekyokebwa kye yeeyama, oba ekyo ky'aghaayo nga kya kyeyendere,

¹⁹ kinaateekwanga okuba nga kya nte nume, oba mbuzi nume, oba ntaama nume, ng'eziraku kikyamu kyonakyona, memale Musengwa Katonda yaaganha okukisiima.

²⁰ Mutaghangayo kintu kyonakyona ekiriku ekikyamu, kuba Musengwa Katonda taja kukisiima.

²¹ Omuntu bw'anaaghangayo eri Musengwa Katonda omusengo olw'okutabagana ng'atuukiriza kye yeeyama, oba ng'aghaayo gwa kyeyendere, ensolo enaateekwanga okuba ng'eziraku kikyamu kyonakyona, memale Musengwa Katonda yaagisiima.

²² Mutaghangayo eri Musengwa Katonda ensolo entulu, oba eyamenhekaku, oba eghenhera, oba eriku amabwa, oba eri n'endwaire ey'oku mubiri. Ensolo edhiri ng'oti n'edho mutadhighangayo ku alutaari ng'ekigheebwayo ekyokebwa.

²³ Ente oba entaama eriku ekitundu ekitali kitereevu, oba eri n'ekibulaku ku bitundu byayo, eikirizibwa okugheebwayo ng'ekigheebwayo omuntu eky'ekyeyendere, aye teikirizibwa kugheerezebwa ng'ekigheebwayo omuntu olw'okutuukiriza obweyamo.

²⁴ Mutaghangayo eri Musengwa Katonda ensolo ng'obusaadha bwayo bwanhigibwa, oba bwanuubulwa, oba bwayuzika, oba bwasalibwaku. Ekyo mutakikolanga mu nsi yaimwe.

²⁵ “Ensolo dhe mutoire mu basenze, mutadhighangayo eri Katonda waimwe ng'ekigheebwayo eky'eby'okulya. Edho dhibalibwa ng'edhiriku ekikyamu era Musengwa Katonda taja kudhisiima.”

²⁶ Musengwa Katonda yaayongera okukoba Musa ati:

²⁷ “Ente, oba entaama, oba embuzi, bw'enaazaalibwanga, enaalekebwanga yaayonka inhina waayo okumala enaku musanvu. Okuva ku lunaku olwomunaana n'okweyongerayo, enaikirizibwanga okuba ekigheebwayo eri Musengwa Katonda ekyokebwa.

²⁸ Mutaitanga nte na nhana yaayo, oba entaama n'enhana yaayo, oba embuzi n'enhana yaayo, ku lunaku lulala.

²⁹ Bwe munaabanga mughaayo omusengo eri Musengwa Katonda olw'okwebaza, mugughangayo nga mujiira ku mateeka, memale yaagusiima.

³⁰ Mugulyanga ku lunaku olwo lwene aghazira kulekagho waire akatono kati ni katuusa enkyo. Ninze Musengwa Katonda.

³¹ “Kale ni mugemenga ebiragiro byange era mubijiirengaku. Ninze Musengwa Katonda.

³² Mutayonoonanga liina lyange eitukuvu, aye nhenda Abaisiraeli mwenamwena mwatulenga nga bwendi omutukuvu. Ninze Musengwa Katonda abafuula abatukuvu,

³³ era eyabatoola mu nsi Misiri, mbenga Katonda waimwe. Ninze Musengwa Katonda.”