Abalevi 21 - Baibuli Ekibono kya Katonda 2014

Obutukuvu bwa bakabona

¹ Musengwa yaalagira Musa ati: “Kobera bakabona batabane ba Aaroni oti ghatabangagho waire omulala ati ku beene aneereeteranga okuba atali mulongoofu nga yeeyimba mu mikolo egibaagho mu kufiirwa ab'enganda dhe,

² okutoolaku abo abamuliku oluganda einho: inhina, n'ise, ni mutabane we, ni mughala we, ni muganda we,

³ oba mwanhina akaali kufumbirwa, ali mu mikono gye.

⁴ Ateereeteranga kuba atali mulongoofu olw'omuntu aba ng'afiire e bukoirume bwe.

⁵ “Bakabona batakendeezanga ku nviiri dhaibwe edh'omu mbali, oba okukendeeza ku birevu byaibwe, era bateesalasalanga ku mibiri gyaibwe ng'akamanhiso ak'okulira abafu.

⁶ Babenga batukuvu eri Nze Katonda waibwe, era balobenga kwonoona liina lyange, kuba bagheereza eri Nze Musengwa Katonda waibwe ebigheebwayo eby'okulya ebyokebwa. Kyebanaavanga ni baba abatukuvu.

⁷ “Kabona atabayizanga mukazi eyakolaku obwamalaaya, oba omukazi atali mwegha, oba oyo eyabingibwa ewa iba, kuba kabona yayawulirwa Katonda we.

⁸ Kale munaamwawulanga yaaba wa Katonda, kuba agheereza eri Katonda waimwe ekigheebwayo eky'eby'okulya. Munaamubalanga nga mutukuvu, kuba nze Musengwa Katonda atukuza imwe, ndi mutukuvu.

⁹ Era mughala wa kabona bw'aneeyonoonanga ng'akola obwamalaaya, anaabanga aswaziiza ise. Anaayokebwanga omuliro yaafa.

¹⁰ “Omukulu wa Bakabona yasiigibwa omuzigo ku mutwe, era yaatukuzibwa okuvaala ebivaalo eby'obwakabona. N'olw'ekyo taalekenga nviiri dhe nga ti nsunsule, era taakanulengamu bivaalo bye kwoleka ng'anakughaire.

^11-12 Tiyeereeterenga kuba atali mulongoofu oba okwonoona Ekifo kyange Ekitukuvu, ng'akivaamu okuseeta aghali omulambo, ni bwe guba ogwa ise oba ogwa inhina, kuba yayawulirwa nze Katonda we ng'asiigibwa omuzigo omutukuvu.

¹³ Anaabayizanga omukazi akaali omwegha,

¹⁴ se ti namwandu, oba omukazi eyaliku malaaya, oba oyo eyabingibwa ewa iba. Anaabayizanga omughala akaali omwegha ow'omu bantu be beene,

¹⁵ alobe kuleetera baana be kuba batali balongoofu kuba ninze Musengwa Katonda amufuula omutukuvu.”

¹⁶ Musengwa Katonda yaalagira Musa

¹⁷ akobere Aaroni ati: “Buli wa ku lulyo lwo mu nse dhoonadhoona, anaabangaku ekikyamu taaseetenga kugheereza Katonda we ekigheebwayo eky'eby'okulya.

¹⁸ Buli aliku kikyamu kyonakyona, taaseetenga kugheereza: omutulu, oba aghenhera, oba eyayonooneka mu maiso, oba omulema ow'omukono oba omugulu,

¹⁹ oba eyamenhekaku omugulu oba omukono;

²⁰ oba ow'enfeete, oba eyakona, oba aliku ekikyamu ku maiso, oba ali n'endwaire ey'oku mubiri, oba omulaawe.

²¹ Ghatabangagho muntu yeenayeena ow'oku lulyo lwa Aaroni kabona, aliku ekikyamu kyonakyona, anaaseetanga okughaayo ekigheebwayo ekya Musengwa Katonda eky'eby'okulya ekyokebwa.

²² Omuntu oyo, aikirizibwa okulya ku bigheereibwayo eri Katonda we, ku by'okulya ebitukuvu einho, ni ku bindi ebitukuvu.

²³ Aye olw'okuba ng'aliku ekikyamu, taingirenga ghali lutimbe lutukuvu era taaseetenga ghali alutaari alobe kwonoona ebitukuvu ebyo, kuba ninze Musengwa Katonda abifuula ebitukuvu.”

²⁴ Kale ni ebyo Musa bye yakobera Aaroni, ni batabane be, n'Abaisiraeli boonaboona.