Abalevi 20 - Baibuli Ekibono kya Katonda 2014

Ebibonerezo eby'abadheemu

¹ Musengwa yaalagira Musa

² akobere Abaisiraeli ati: “Bweghanaabangagho Omuisiraeli oba omusenze yeenayeena eyasenga mu Isiraeli, aghaayo ku baana be okukozesebwa mu kusinza omusambwa Moleki, abantu boonaboona banaamukubanga amabaale yaafa.

³ Era zeena ndyefuulira omuntu oyo naamuboola naalekera agho okumubalira mu bantu bange, olw'okughaayo omwana we eri Moleki n'ayonoona Ekifo kyange Ekitukuvu, era n'ayonoona eriina lyange eitukuvu.

⁴ Aye abantu bwebataafengayo ku ky'akoze ni batamwita,

⁵ Nze mwene ndyefuulira omuntu oyo n'ab'omu ndhu ye boonaboona, n'abo boonaboona abamweyimbaku mu butaba beesigwa ye ndi ni basinza Moleki. Ndirekera okubabalira mu bantu bange.

⁶ “Omuntu yeenayeena bw'anaajanga okwebuuza ku basamize n'abalogo, n'ataba mwesigwa eri nze, nnaamwefuuliranga, naalekera agho okumubalira mu bantu bange.

⁷ Kale mubenga batukuvu, kuba ninze Musengwa Katonda waimwe.

⁸ Mugemenga amateeka gange era mugajiirengaku, kuba ninze Musengwa abafuula abatukuvu.

⁹ “Kiisi anaakolimiranga ise oba inhina, anaitibwanga mwene n'anaabanga nga yeereeteire okwitibwa.

¹⁰ “Omusaadha bw'anaabanga ni muka musaadha mwine mu buliri, abenzi bombi, omusaadha oyo n'omukazi, banaitibwanga.

¹¹ Omusaadha bw'anaabanga n'owundi ku baka ise mu buliri, anaabanga ng'awemwire ise. Era bombi, omusaadha oyo n'omukazi, banaitibwanga. Beene n'abanaabanga nga beereeteire okwitibwa.

¹² Omusaadha bw'anaabanga ni muka mutabane we mu buliri, omusaadha oyo n'omukazi banaitibwanga. Banaabanga nga bakoze kiive, era beene n'abanaabanga nga beereeteire okwitibwa.

¹³ Omusaadha bw'anaabanga ni musaadha mwine mu buliri mu nsambo abasaadha ye babaamu n'abakazi, banaabanga nga bakoze ekyenhinhalwa. Bombi banaitibwanga, era beene n'abanaabanga nga beereeteire okwitibwa.

¹⁴ Omusaadha bw'anaabayizanga omukazi n'inhina w'omukazi oyo, ekyo kinaabanga kiive. Abasatu abo banaayokebwanga omuliro baafa. Era mutaganhanga kibi ng'oti n'ekyo okuba mu imwe.

¹⁵ Omusaadha bw'anaabanga n'ensolo, mu nsambo abasaadha ye baba n'abakazi mu buliri, anaitibwanga era ensolo eyo yoona enaitibwanga.

¹⁶ N'omukazi bw'anaabanga n'ensolo mu nsambo abasaadha ye baba n'abakazi mu buliri, anaitibwanga era n'ensolo eyo yoona yaitibwa mwene era n'ensolo eyo n'abanaabanga nga beereeteire okwitibwa.

¹⁷ Omusaadha bw'anaabayizanga mwanhina, waire nga mwanhina ku ise ow'omukazi owundi, oba mwanhina ku inhina ow'omusaadha owundi, banaabanga bakoze kiive. Banaabanga nga tibakaabalirwa mu bantu baibwe. Omusaadha oyo anaabonerezebwanga olw'ekibi kye ekyo, eky'okuba ni mwanhina mu buliri.

¹⁸ Omusaadha bw'anaabanga n'omukazi mu buliri ng'ali mu biseera bye eby'okulwala, bombi banaabanga nga tibakaabalirwa mu bantu bange, kuba bamenhie amateeka agagema ku bulongoofu.

¹⁹ “Omusaadha bw'anaabanga n'inhina omuto oba ni songa we mu buliri, banaabanga bakoze kiive. Banaabonerezebwanga olw'ekibi kyaibwe ekyo.

²⁰ Omusaadha bw'anaabanga ni muka muganda wa ise mu buliri, anaabanga nga awemwire muganda wa ise oyo, era mwene n'omukazi oyo banaabonerezebwanga olw'ekibi kyaibwe ekyo. Balifa nga baziraku mwana naire.

²¹ Omusaadha bw'anaabayizanga muka muganda we, anaabanga akoze kibi, ng'awemwire muganda we. Balifa nga baziraku mwana naire.

²² “Mugemenga amateeka gange n'ebiragiro byange byonabyona, olwo mulobe kubingibwa mu nsi Kanaani ye nja okubaingizaamu okubangamu.

²³ Muteebisanga ng'abantu abo be ndi kubingamu okuleetamu imwe kuba baakolanga ebyo byonabyona, bandeetera okubeesinwa.

²⁴ Aye imwe nabasuubiza okubagha ensi eno engimu era erimu ebirungi kamaala, era ndigibagha yaaba yaimwe. Ninze Musengwa Katonda waimwe, eyabaawula ku maghanga agandi.

²⁵ Kale ni mwawulengagho ensolo n'enhonhi enongoofu n'edhitali nongoofu. Muteereeteranga kuba kyenhinhalwa eri nze, nga mulya ensolo, oba enhonhi, oba ekintu ekindi kyonakyona ku nsi ekitali kirongoofu.

²⁶ Mubenga batukuvu, era nga muli bange zenka, kuba nze Musengwa ndi mutukuvu era nabaawula ku maghanga agandi, mughange okuba abange zenka.

²⁷ “Omusaadha oba omukazi omusamize, oba omulogo, anaitibwanga. Anaakubwanga amabaale yaitibwa. Mwene n'anaabanga yeereeteire okwitibwa.”