Abalevi 2 - Baibuli Ekibono kya Katonda 2014

Ekigheebwayo eky'emere ey'empeke

¹ “Omuntu yeenayeena bw'anaabanga ng'ali kughaayo ekigheebwayo eky'emere ey'empeke eri Musengwa Katonda, emere anaamalanga kugisa bukalamu, yaateeraku n'omuzigo, n'obubbaani.

² Ekigheebwayo ekyo anaakireetanga ye bakabona ab'oku lulyo lwa Aaroni. Owundi ku bakabona abo anaayoolangaku omuganda ku mere eyo eseereibwa obukalamu, yaagyokera ghalala n'omuzigo, n'obubbaani bwonabwona ako kabe nga n'akamanhiso akooleka nga byonabyona bigheereibwayo eri Musengwa Katonda. Akawoowo kaabyo kasangaaza Musengwa Katonda.

³ Ekyo ekisigalagho ku kigheebwayo ekyo eky'emere ey'empeke, kiba kya bakabona kitukuvu inho, kuba kitoolebwa ku ekyo ekigheereibwayo ye Musengwa Katonda, nga kyokebwa n'omuliro.

⁴ “Ekigheebwayo ekinaaleetebwanga bwe kinaabanga eky'emigaati egifumbiibwa nga giziikiibwa mu ziiko, giidha kubanga nga giteekwa okuba emigaati eminene egitazimbulukusiibwa, egy'obuwunga obuseereibwa obukalamu, obutabwirwamu omuzigo, oba emigaati emitono egitazimbulukusiibwa, egisiigiibwaku omuzigo.

⁵ “Ekigheebwayo bwe kinaabanga eky'emigaati egikalangiibwa ku lugyo, giidha kubanga gya buwunga obuseereibwa obukalamu nga butabwirwamu omuzigo, aye nga buziramu kizimbulukusa.

⁶ Ole ali kugheereza ekigheebwayo ekyo anaamegulanga mu migaati egyo ebitundutundu, yaagifukaku omuzigo, yaagighaayo ng'ekyo n'ekigheebwayo eky'emere ey'empeke.

⁷ “Ekigheebwayo bwe kinaabanga eky'emigaati egifumbibwa mu ntamu, ginaabanga gya buwunga obuseereibwa obukalamu, ghalala n'omuzigo.

⁸ Ole anaaleetanga ekigheebwayo eky'emere ey'empeke ekikoleibwa mu bintu ebyo eri Musengwa Katonda, anaakigemyanga kabona, kabona yaakitwala ku alutaari.

⁹ Kabona anaatoolanga ekitundu ku kigheebwayo ekyo, kibe akamanhiso akooleka nga byonabyona bigheereibwayo eri Musengwa Katonda. Era anaayokeranga ekitundu ekyo ku alutaari. Akawoowo ak'ekigheebwayo ekyo ekyokebwa, kasangaaza Musengwa Katonda.

¹⁰ Ekyo ekisigalagho ku kigheebwayo eky'emere ey'empeke ekyo, kiba kya bakabona kitukuvu inho, kuba kitoolebwa ku ekyo ekigheebwayo ye Musengwa Katonda, nga kyokeibwa n'omuliro.

¹¹ “Tighaabengagho kigheebwayo kya mere ya mpeke, ekinaagheebwangayo eri Musengwa Katonda nga kirimu ekizimbulukusa. Mutakozesanga kizimbulukusa waire omudheenene gw'endhuki, mu kigheebwayo eri Musengwa Katonda nga kyokebwa.

¹² Mughengayo eri Musengwa Katonda ebigheebwayo ku birime ebisooka okukungulwa buli mwaka, aye bitayokebwanga ku alutaari.

¹³ Buli kigheebwayo eky'emere ey'empeke mukitengaku omuunhu, kuba omuunhu n'akamanhiso k'endagaano ghagati waimwe ni Katonda. Mu butuufu, ebigheebwayo byonabyona mubitengaku omuunhu.

¹⁴ “Ole ng'aja okughaayo eri Musengwa Katonda ekigheebwayo eky'ebirime ebisooka okukungulwa, aghengayo engaano empyaka ekalangiibwaku.

¹⁵ Ateerengaku omuzigo n'obubbaani, ekyo n'ekigheebwayo eky'emere ey'empeke.

¹⁶ Kabona anaayokyanga ekitundu eky'engaano, n'eky'omuzigo, ghalala n'obubbaani bwonabwona, nga n'akamanhiso akooleka nga byonabyona bigheereibwayo; ekyo n'ekigheebwayo eri Musengwa Katonda nga kyokebwa n'omuliro.