Abalevi 17 - Baibuli Ekibono kya Katonda 2014

Amateeka agagema ku musaayi

¹ Musengwa Katonda yaalagira Musa ati:

² “Koba Aaroni ni batabane be, n'Abaisiraeli boonaboona oti, ‘Kino Musengwa Katonda ky'alagiire:

³ Omuisiraeli anaitiranga aghantu aghandi ente oba entaama oba embuzi,

⁴ n'atagireeta ku mulyango ogw'Eweema ey'Okwagaananirangamu ni Musengwa Katonda okugighaayo ng'ekigheebwayo mu maiso ga Musengwa Katonda, anaavunaanibwanga omusango ogw'okuyugha omusaayi. Era anaabanga nga takaabalirwa mu bantu ba Musengwa Katonda.

⁵ Ekinuyirirwa mu iteeka lino, n'Abaisiraeli okuleetanga eri Musengwa Katonda ensolo dhaibwe dhe babaire baitiranga mu nsiko eyo, badhireetenga eri kabona, badhiite, dhibe emisengo egigheebwayo eri Musengwa Katonda olw'okutabagana.

⁶ Agho kabona aidha kumansiranga omusaayi ku alutaari ya Musengwa Katonda, ku mulyango gw'Eweema ey'Okwagaananirangamu ni Musengwa Katonda, era yaayokya amasavu, gaavaamu akawoowo akasangaaza Musengwa Katonda.

⁷ Kale Abaisiraeli tibaidha kwongeranga kuba batali beesigwa eri Musengwa Katonda, nga baghaayo emisengo gyaibwe eri emisambwa egiri ng'oti mbuzi. Eiteeka eryo banaalikuumanga enaku dhoonadhoona.’

⁸ “Era bakobe oti, ‘Omuisiraeli oba omusenze yeenayeena eyasenga mu Isiraeli, bw'anaaghangayo ekigheebwayo ekyokebwa oba omusengo,

⁹ n'atakireeta ku mulyango gw'Eweema ey'Okwagaananirangamu ni Musengwa Katonda okukighaayo eri Musengwa Katonda, anaabanga nga takaabalirwa mu bantu ba Musengwa Katonda.’

¹⁰ “Omuisiraeli oba omusenze yeenayeena eyasenga mu Isiraeli bw'anaalyanga ku musaayi, ndidha kumukyaghanga era mbenga nga tikaamubalira mu bantu bange.

¹¹ Obulamu bwa buli kintu ekiri n'omubiri buba mu musaayi. Eyo n'ensonga lwaki nabalagira okugufukanga ku alutaari olw'okutoola ku bantu ebibi byaibwe. Omusaayi, n'obulamu, era n'ogutoolagho ebibi.

¹² Kye nviire ni nkoba Abaisiraeli nti, Ghatabangagho waire omulala ku imwe alya omusaayi, era n'omusenze eyabasengamu yeena atalyanga musaayi.

¹³ “Omuisiraeli oba omusenze yeenayeena eyasenga mu Isiraeli, bw'anaayiiganga ensolo oba enhonhi eikirizibwa okuliibwa, anaafukanga omusaayi gwayo yaagughembaku eitaka.

¹⁴ Kuba obulamu bwa buli kintu ekiri n'omubiri, buba mu musaayi. Kye nviire ni nkoba Abaisiraeli nti, ‘Mutalyanga ku musaayi gwa kintu waire ekirala ekiri n'omubiri, kuba obulamu bwakyo, n'omusaayi gwakyo. Kiisi anaagulyangaku, nnaabanga nga tikaamubalira mu bantu bange.’

¹⁵ “Buli muntu k'abe Omuisiraeli oba omusenze, bw'anaalyanga ensolo efiire yeene oba eitiibwa ensolo edh'omu nsiko, aidha kubanga n'okwoza ebivaalo bye era n'okunaaba omubiri mu maadhi. Aye era aidha kusigalanga nga tiimulongoofu okutuusa eigulo.

¹⁶ Bw'ataayozenga bivaalo bye era n'atanaabanga mubiri, aidha kubonerezebwanga.”