Abalevi 16 - Baibuli Ekibono kya Katonda 2014

Olunaku olw'okutoolebwaku ebibi

¹ Musengwa Katonda yaayogera ni Musa, nga Aaroni amaze okufiirwa batabane be ababiri, bwe baaseeta mu maiso ga Musengwa Katonda mu nsambo etaasiimya Musengwa Katonda oyo eyamala n'abaita.

² Yaakoba ati: “Koba Aaroni muganda wo, alobe kumalanga gaja buli gh'ayendeire munda gh'olutimbe mu Kifo Ekitukuvu gha kisandikiza eky'Esanduuku y'Endagaano. Olwo alobe kufa, kuba ndidha kubonekeranga mu kire ghaigulu gh'ekisandikiza ekyo.

³ Aye anaingiranga mu Kifo Ekitukuvu ng'ali n'ente enume entototo ey'ekigheebwayo olw'ebibi, n'entaama enume ey'ekigheebwayo ekyokebwa.

⁴ Anaamalanga kunaaba mubiri mu maadhi, yaavaala ebivaalo ebitukuvu eby'engoye empegheevu: ekanzu empale, olusibiro, n'ekitambaala ku mutwe.

⁵ “Abantu Abaisiraeli banaaghanga Aaroni embuzi enume ibiri edh'ekigheebwayo olw'ebibi, n'entaama enume ndala ey'ekigheebwayo ekyokebwa.

⁶ Aaroni oyo aidha kughangayo ente enume eyiye ku bubwe ey'ekigheebwayo olw'ebibi, olwa mwene n'olw'ab'endhu ye okutoolebwaku ebibi.

⁷ Agho anaatwalanga embuzi dhombi ku mulyango gw'Eweema ey'Okwagaananirangamu ni Musengwa Katonda,

⁸ yaadhikubiraku akalulu okulondagho enaaba eya Musengwa Katonda, n'enaaba eya Azazeli.

⁹ Aaroni anaaghangayo embuzi akalulu ye kagwireku okuba eya Musengwa Katonda, yaagiita ebe ekigheebwayo olw'ebibi.

¹⁰ Aye embuzi akalulu ye kagwireku okuba eya Azazeli, enaateebwanga mu maiso ga Musengwa Katonda nga nnamu, memale yaasindiikirizibwa eri Azazeli oyo mu irungu olw'okutoola ku bantu ebibi.

¹¹ “Aaroni bw'anaaghangayo ente enume eyiye ku bubwe ey'ekigheebwayo olw'ebibi, olwa mwene n'olw'ab'endhu ye okutoolebwaku ebibi,

¹² anaatoolanga ekiniokezebwaku obubbaani ekiidhwire amanda ag'omuliro g'atoire ku alutaari mu maiso ga Musengwa Katonda, n'emiganda ebiri egy'obubbaani obw'akawoowo obusekwirwa einho, yaabireeta munda mw'olutimbe.

¹³ Agho anaatanga obubbaani ku muliro mu maiso ga Musengwa Katonda, omwosi ogw'obubbaani gwaghemba ekisandikiza eky'Esanduuku ey'Endagaano yaaloba kukibona, olwo alobe kufa.

¹⁴ Anaatoolanga ku musaayi gw'ente enume, yaagumansira n'olwala lwe ku luuyi olw'e buvandhuba olw'ekisandikiza eky'Esanduuku ey'Endagaano, era yaagumansira mu maiso g'esanduuku eyo emikuzi musanvu.

¹⁵ “Agho anaitanga embuzi ey'abantu ey'ekigheebwayo olw'ebibi, yaatwala omusaayi gwayo munda mw'olutimbe, yaagumansira ku kisandikiza eky'Esanduuku ey'Endagaano, ni mu maiso ag'esanduuku eyo, nga bw'akola ku musaayi gw'ente enume.

¹⁶ Mu nsambo eyo aidha kughangayo omusengo olw'Ekifo Ekitukuvu, okukitoolaku obutali bulongoofu obw'Abaisiraeli, n'ensobi dhaibwe, n'ebibi byaibwe byonabyona. Era atyo bw'aidhanga okukola ni ku Weema ey'Okwagaananirangamu ni Musengwa Katonda eba ghagati mu bantu abo abatali balongoofu.

¹⁷ Mu Weema ey'Okwagaananirangamu ni Musengwa Katonda timwidha kubangamu muntu yeenayeena, okuva Aaroni lw'anaingiranga mu Kifo Ekitukuvu okukola omukolo ogw'okutukuza, okutuusa lw'anaafulumanga ng'amaze okukola omukolo ogwo ku lulwe, ni ku lw'ab'endhu ye, ni ku lw'Abaisiraeli boonaboona.

¹⁸ Olwo anaafulumanga yaaja ku alutaari eri mu maiso ga Musengwa Katonda, yaakola omukolo ogw'okutukuza ku lwayo. Yaatoola ku musaayi gw'ente enume, ni ku gw'embuzi, yaagusiiga ku bintu ebiri ng'oti mayiga ga nsolo ebiri ku alutaari eyo, ku nsonda dhaayo dhoonadhoona.

¹⁹ Yaagimansira omusaayi n'olwala lwe emikuzi musanvu, yaagirongoosa okugitoolaku obutali bulongoofu obw'Abaisiraeli, ng'agitukuza.

Embuzi esindiikirizibwa mu irungu

²⁰ “Aaroni bw'anaamalirizanga okukola omukolo ogw'okutukuza Ekifo Ekitukuvu n'Eweema yoonayoona ey'Okwagaananirangamu ni Musengwa Katonda, ni alutaari, anaatwalanga ye Musengwa Katonda embuzi ere enamu.

²¹ Anaatanga emikono gye gyombi ku mutwe gw'embuzi eyo enamu, yaalaamiriza ng'ayatula ebyonoono n'ebibi eby'Abaisiraeli n'obudheemu bwonabwona yaabisindika ku mutwe gwayo, olwo yaagisindiikiriza mu irungu ng'etwalibwa omuntu eyategekebwa okukola ekyo.

²² Embuzi eyo n'enaatwalanga ebibi byaibwe byonabyona, yaaja nabyo mu nsi eziramu bantu. Oyo agitwala anaagirekuliranga eyo mu irungu.

²³ “Agho Aaroni aidha kwingiranga mu Weema ey'Okwagaananirangamu ni Musengwa Katonda, atoolemu ebivaalo ebighegheevu bye yavaire ng'aingira mu Kifo Ekitukuvu, era abireke omwo.

²⁴ Anaanaabiranga omubiri mu Kifo Ekitukuvu ekyo, yaavaala ebivaalo bye ebyabuliidho, yaafuluma, yaaghaayo ekigheebwayo ekyokebwa ekikye, n'ekigheebwayo ekyokebwa eky'abantu, olw'okutoolagho ebibi ebibye n'eby'abantu boonaboona.

²⁵ Amasavu ag'ekigheebwayo olw'ebibi anaagookeranga ku alutaari.

²⁶ Oyo asindiikiriza embuzi mu irungu eri Azazeli, anaayozanga ebivaalo bye era yaanaaba omubiri mu maadhi, memale yaira mu kifo omuba abantu.

²⁷ Ente enume n'embuzi edh'ekigheebwayo olw'ebibi, dheene musaayi ogwingizibwa mu Kifo Ekitukuvu olw'okukola omukolo ogw'okutukuza, dhinaafulumizibwanga ku luya dhaatwalibwa mu kifo omutaba bantu, dhaayokebwa. Amawu, emamba n'ebyenda byadho, binaayokebwanga.

²⁸ Oyo abyokya anaayozanga ebivaalo bye, yaanaaba omubiri mu maadhi, memale yaira mu kifo omuba abantu.

Okukuza olunaku olw'okutoolebwaku ebibi

²⁹ “Eiteeka lino munaalikuumanga enaku dhoonadhoona: Ku lunaku olweikumi olw'omwezi ogwomusanvu, Abaisiraeli n'abasenze abaabasengamu, baneebonerezanga era tibaakolenga mulimo waire omulala.

³⁰ Ku lunaku olwo ghanaakolebwangagho omukolo olwa imwe okutukuzibwa, mutoolebweku ebibi byaimwe byonabyona, mube balongoofu mu maiso ga Musengwa Katonda.

³¹ Olwo lunaabanga lunaku lutukuvu lwa kuwuumulira irala, era muneebonerezanga. Eiteeka eryo linaakuumibwanga enaku dhoonadhoona.

³² Kabona eyasiigibwa omuzigo n'ayawulibwa okuba kabona mu kifo kya ise, n'anaakolanga omukolo ogw'okutukuza ng'avaire ebivaalo ebighegheevu ebitukuvu.

³³ Aidha kukolanga omukolo ogw'okutukuza ekifo Ekitukuvu, n'Eweema ey'Okwagaananirangamu ni Musengwa Katonda, n'alutaari, era ni bakabona, n'abantu boonaboona.

³⁴ Eiteeka eryo munaalikuumanga enaku dhoonadhoona, nga mutaagho omukolo ogw'okutukuza, omukuzi mulala buli mwaka, olw'okutoola ku Baisiraeli ebibi byaibwe.” Musa yaakola nga Musengwa Katonda bweyamulagira.