Abalevi 15 - Baibuli Ekibono kya Katonda 2014

Ebiva mu mubiri ebitali birongoofu

¹ Musengwa Katonda yaalagira Musa ni Aaroni ati:

² “Kobera Abaisiraeli oti buli musaadha anaatoonhanga okuva mu bitundu bye eby'ekyama olw'obulwaire, taabenga mulongoofu,

³ k'abe ng'akaatoonha oba ng'azibikiire olw'obulwaire obwo.

⁴ Buli buliri bw'anaalambaalangaku, na buli kintu ky'anaatyamangaku, tibiibenga birongoofu.

⁵ Era kiisi anaagemanga ku buliri obw'ow'obulwaire obwo, anaabanga n'okwoza ebivaalo bye era yaanaaba omubiri mu maadhi, era yaasigala nga tiimulongoofu okutuusa eigulo.

⁶ N'oyo anaatyamanga ku kintu ow'obulwaire obwo ky'abaire atyaimeku, anaabanga n'okwoza ebivaalo bye era yaanaaba omubiri mu maadhi, aye era yaasigala nga tiimulongoofu okutuusa eigulo.

⁷ Era n'oyo anaagemanga ku w'obulwaire obwo anaabanga n'okwoza ebivaalo bye era yaanaaba omubiri mu maadhi, aye era yaasigala nga tiimulongoofu okutuusa eigulo.

⁸ Ow'obulwaire obwo bw'anaafuudhanga amatanta ku muntu omulongoofu, omuntu oyo anaabanga n'okwoza ebivaalo bye era yaanaaba omubiri mu maadhi, aye era yaasigala nga tiimulongoofu okutuusa eigulo.

⁹ Ekintu ekityamibwaku ku nsolo ali n'obulwaire obwo ky'anaatyamangaku tikiibenga kirongoofu.

¹⁰ Kiisi anaagemanga ku kintu ow'obulwaire obwo ky'abaire atyaimeku, taabenga mulongoofu okutuusa eigulo. Era n'oyo anaakibbeedanga anaabanga n'okwoza ebivaalo bye era yaanaaba omubiri mu maadhi, aye era yaasigala nga tiimulongoofu okutuusa eigulo.

¹¹ Ow'obulwaire obwo bw'anaagemanga ku muntu nga tamaze kunaaba mu ngalo, ole ye bagemyeku anaabanga n'okwoza ebivaalo bye era yaanaaba omubiri mu maadhi, aye era yaasigala nga tiimulongoofu okutuusa eigulo.

¹² Ekintu eky'eitosi ow'obulwaire obwo ky'anaagemangaku, kinaamenhebwanga. Na buli kintu kya muti ky'anaagemangaku, kinaanaazibwanga mu maadhi.

¹³ “Ow'obulwaire obwo bw'anaawonanga obulwaire obwo, anaateegangaku enaku musanvu okwetukuza, memale yaayoza ebivaalo bye era yaanaaba omubiri mu maadhi agaviire mu nsulo edhikuuluula, olwo yaaba mulongoofu.

¹⁴ Ku lunaku olwomunaana aidha kutwalanga enjiibwa ibiri oba amaghemba amato abiri, ku mulyango gw'Eweema ey'Okwagaananirangamu ni Musengwa Katonda, yaabigha kabona.

¹⁵ Kabona anaabighangayo olw'ekigheebwayo olw'ebibi, n'olw'ekigheebwayo ekyokebwa. Mu nsambo eyo kabona anaabighangayo ng'omusengo mu maiso ga Musengwa Katonda, olw'okutukuzibwa okw'omuntu oyo.

¹⁶ “Omusaadha bw'anaavangamu amaadhi ag'obusaadha, anaabanga n'okunaaba omubiri gwonagwona mu maadhi, aye era yaasigala nga tiimulongoofu okutuusa eigulo.

¹⁷ Buli kintu kya lugoye oba kya luwu, amaadhi ag'obusaadha ago kwe ganaatoonhanga kinaabanga n'okwozebwa, aye era kyasigala nga tiikirongoofu okutuusa eigulo.

¹⁸ Era omusaadha bw'anaabanga ng'abaire n'omukazi bombi banaabanga n'okunaaba omubiri mu maadhi, aye era baasigala nga tiibalongoofu okutuusa eigulo.

¹⁹ “Omukazi bw'anaabanga ng'ali mu biseera bye eby'okulwala, anaamalanga enaku musanvu nga tiimulongoofu. Era kiisi anaamugemangaku, taabenga mulongoofu okutuusa eigulo.

²⁰ Na buli kintu ky'anaalambalangaku, oba ky'anaatyamangaku ng'ali mu biseera bye eby'okulwala, tikiibenga kirongoofu.

^21-23 Kiisi anaagemanga ku buliri obw'omukazi oyo oba ku kintu kyonakyona ky'abaire atyaimeku, anaabanga n'okwoza ebivaalo bye era yaanaaba omubiri mu maadhi, aye era yaasigala nga tiimulongoofu okutuusa eigulo.

²⁴ Omusaadha anaabanga naye ng'ali mu biseera bye eby'okulwala, yeena taabenga mulongoofu okumala enaku musanvu, era buli buliri omusaadha oyo bw'anaalambaalangaku tibuubenga bulongoofu.

²⁵ “Omukazi bw'anaavanga omusaayi okumala enaku kamaala nga ti n'ebiseera bye eby'okulwala, anaasigalanga nga tiimulongoofu. Era bw'anaabisangamu mu biseera by'amala buliidho ng'alwaire, anaasigalanga nga tiimulongoofu enaku dhoonadhoona dh'anaamalanga ng'ali kuva omusaayi.

²⁶ Buli buliri bw'anaalambaalangaku, na buli kintu ky'anaatyamangaku mu kiseera ekyo, tibiibenga birongoofu.

²⁷ Na kiisi muntu anaagemanga ku bintu ebyo taabenga mulongoofu, anaabanga n'okwoza ebivaalo bye era yaanaaba omubiri mu maadhi, aye era yaasigala nga tiimulongoofu okutuusa eigulo.

²⁸ Omukazi oyo bw'anaalekeranga okuva omusaayi, anaateeganga ghaabitagho enaku musanvu, memale yaaba omulongoofu.

²⁹ Ku lunaku olwomunaana, aidha kutwalanga enjiibwa ibiri oba amaghemba amato abiri, eri kabona ku mulyango ogw'Eweema ey'Okwagaananirangamu ni Musengwa Katonda.

³⁰ Kabona anaabighangayo olw'ekigheebwayo olw'ebibi, n'olw'ekigheebwayo ekyokebwa. Mu nsambo eyo kabona anaabighangayo ng'omusengo mu maiso ga Musengwa Katonda, olw'okutukuzibwa okw'omukazi oyo.”

³¹ Musengwa Katonda yaakoba Musa ni Aaroni ati: “Kale ni mutyo bwe munaalabulanga Abaisiraeli ku butali bulongoofu bwaibwe, balobe kufa olw'okwonoona Eweema yange ebalimu ghagati.”

³² Ago n'amateeka agagema ku musaadha anaatoonhanga okuva mu bitundu bye eby'ekyama, oba anaavangamu amaadhi ag'obusaadha.

³³ Era amateeka geene ago n'agagema ni ku mukazi ng'ali mu biseera bye eby'okulwala, era ni ku musaadha aba n'omukazi atali mulongoofu.