Abalevi 14 - Baibuli Ekibono kya Katonda 2014

Okutukuzibwa kw'abantu abawonie endwaire embi edh'oku mubiri

¹ Musengwa Katonda yaalagira Musa ati:

² “Gano n'amateeka agagema ku kutukuzibwa kw'omuntu awonie endwaire ey'ebigenge. Ku lunaku lw'aja okulangirirwaku ati mulongoofu, anaaleetebwanga eri kabona.

³ Kabona oyo anaavanga mu kifo aghali weema edh'abantu abatali balwaire, yaaja yaamwekebeedha. Endwaire bw'enaabanga ng'ewonie,

⁴ kabona oyo aidha kulagiranga okuleeta enhonhi ibiri enamu era enongoofu, n'omuti oguwunha akawoowo, n'oluwuuzi olw'olugoye olw'erangi ya kasaayisaayi, n'akati akeetebwa hissopu.

⁵ Agho kabona aidha kulagiranga okwitira eyindi ku nhonhi edho, mu kibya eky'eitosi omuli amaadhi agaviire mu nsulo edhikuuluula.

⁶ Aidha kutoolanga enhonhi esigairegho enamu ghalala n'omuti gule oguwunha akawoowo, n'oluwuuzi lule olw'olugoye lw'erangi ya kasaayisaayi, n'akati kale akeetebwa hissopu, byonabyona yaabiinhika mu musaayi gw'enhoni eitiibwa.

⁷ “Aidha kumansiranga omusaayi ogwo emikuzi musanvu ku oyo aja okutukuzibwaku endwaire eyo ey'ebigenge, memale yaamulangirira ati mulongoofu. Era anaalekulanga enhonhi enamu eyo, yaaja ng'egulukira mu ibbanga.

⁸ Omuntu oyo aja okutukuzibwa anaayozanga ebivaalo bye, yaamwaku enviiri dhoonadhoona, yaanaaba, olwo yaabalibwa nga mulongoofu, memale yaaja eri weema edh'abatali balwaire. Aye anaamalanga enaku musanvu ng'ali ku luya lwa weema ye.

⁹ Ku lunaku olwomusanvu kabiri anaamwangaku enviiri dhoonadhoona, n'ekirevu, n'ebisige, n'obuviiri bwonabwona ku mubiri. Era anaayozanga ebivaalo bye, yaanaaba omubiri, olwo yaabalibwa nga mulongoofu.

¹⁰ “Ku lunaku olwomunaana anaaleetanga entaama ento enume ibiri, n'entaama enduusi ndala ey'omwaka omulala, dhoonadhoona nga dhiziraku kikyamu kyonakyona. Era anaaleetanga kilo isatu edh'obuwunga bw'engaano obuseereibwa obukalamu, nga butabwirwamu omuzigo ogw'ebibala eby'emiti emyoliva. Era yaaleeta ekitundu kirala kirala ku buli bitundu bisatu ebya lita ey'omuzigo ogw'ebibala eby'emiti emyoliva.

¹¹ Kabona aidha kutwalanga omuntu oyo n'ebintu ebyo emberi w'Eweema ey'Okwagaananirangamu ni Musengwa Katonda.

¹² Agho kabona anaatoolanga eyindi ku ntaama edho enume ento, ghalala n'ekitundu kirala kirala ku buli bitundu bisatu ebya lita ey'omuzigo ogw'emiti emyoliva, yaabighaayo ng'omutango, yaabiwuuba, bibe ekigheebwayo nga kiwuubibwa mu maiso ga Musengwa Katonda.

¹³ Agho anaitiranga entaama eyo ento mu kifo ekitukuvu aghaitirwa ensolo dhe baghaayo ng'ekigheebwayo olw'ebibi, n'edho dhe baghaayo ng'ekigheebwayo ekyokebwa. Anaakolanga atyo, kuba ekigheebwayo ng'omutango kiba kya kabona ng'oti n'ekigheebwayo olw'ebibi bwe kiba, era kitukuvu inho.

¹⁴ “Kabona anaatoolanga ku musaayi ogw'ekigheebwayo ng'omutango, yaagusiiga ku ntobo ya kutu ow'oku mukono omusaadha, ni ku kyala ekisaadha, ni ku kigere ekisaadha eky'oku mugulu omusaadha, ogw'oyo aja okulangirirwa ng'omulongoofu.

¹⁵ Kabona anaatoolanga ku muzigo ogw'ebibala eby'emiti emyoliva, yaagufuka mu ngalo dhe dheene edh'oku mukono omugooda,

¹⁶ yainhika olwala lwe olw'oku mukono omusaadha mu muzigo ogwo oguli mu ngalo dhe edh'oku mugooda, yaagumansira emikuzi musanvu agho mu maiso ga Musengwa Katonda.

¹⁷ Anaatoolanga ku muzigo ogunaabanga nga gusigairegho mu ngalo dhe, ni ku musaayi ogw'ekigheebwayo ng'omutango, yaagusiiga ku ntobo ya kutu ow'oku mukono omusaadha, ni ku kyala ekisaadha eky'oku mukono omusaadha, ni ku kigere ekisaadha eky'oku mugulu omusaadha, ogw'oyo aja okulangirirwa nga mulongoofu.

¹⁸ Omuzigo ogunaabanga nga gusigaire mu ngalo dhe, anaagusiiganga ku mutwe gw'oyo aja okulangirirwa nga mulongoofu. Agho kabona oyo anaaghangayo omusengo olw'okutukuza omuntu oyo, mu maiso ga Musengwa Katonda.

¹⁹ “Kabona anaaghangayo ekigheebwayo olw'ebibi, ng'omusengo olw'oyo aja okutoolebwaku obutali bulongoofu. Ekyo nga kiwoire, anaitanga ensolo ey'ekigheebwayo ekyokebwa,

²⁰ yaakighaayo ku alutaari ghalala n'ekigheebwayo eky'emere ey'empeke. Mu nsambo eyo kabona anaaghangayo omusengo olw'omuntu oyo, era omuntu oyo yaaba mulongoofu.

²¹ “Aye bw'anaabanga omwavu atasobola kufuna byaga agho, anaaleetanga entaama ento enume, ebe ekigheebwayo ng'omutango. Enaabanga ekigheebwayo eri Musengwa Katonda nga kiwuubibwa, ekiba ekya kabona. Anaaleetanga kilo ndala ey'obuwunga obw'engaano, obutabwirwamu omuzigo ogw'ebibala eby'emiti emyoliva, era yaaleeta ekitundu kirala kirala ku buli bitundu bisatu ebya lita ey'omuzigo ogw'ebibala eby'emiti emyoliva.

²² Era aidha kuleetanga enjiibwa ibiri, oba amaghemba amato abiri nga bw'anaabanga ng'aghanze. Eighemba erindi linaabanga ekigheebwayo olw'ebibi, n'erindi ekigheebwayo ekyokebwa.

²³ Ku lunaku olwomunaana anaabireetanga eri kabona olw'okutukuzibwa kwe mu maiso ga Musengwa Katonda, ku mulyango gw'Eweema ey'Okwagaananirangamu ni Musengwa Katonda.

²⁴ “Kabona anaatoolanga entaama ento ey'ekigheebwayo ng'omutango, n'omuzigo ogw'ebibala eby'emiti emyoliva, yaabighaayo eri Musengwa Katonda ng'abiwuuba, bibe ekigheebwayo mu maiso ga Musengwa Katonda.

²⁵ Anaitanga entaama ento eyo, yaatoola ku musaayi gwayo yaagusiiga ku ntobo ya kutu ow'oku mukono omusaadha, ni ku kyala ekisaadha eky'oku mukono omusaadha, ni ku kigere ekisaadha eky'oku mugulu omusaadha ogw'oyo aja okulangirirwa nga mulongoofu.

²⁶ Agho kabona anaafukanga ku muzigo mu ngalo dhe dheene edh'oku mukono omugooda,

²⁷ yaagumansira n'olwala lwe olw'oku mukono omusaadha emikuzi musanvu agho mu maiso ga Musengwa Katonda.

²⁸ Anaatoolanga ku muzigo ogwo, yaagusiiga ku ntobo ya kutu ow'oku mukono omusaadha, ni ku kyala ekisaadha eky'oku mukono omusaadha, ni ku kigere ekisaadha eky'oku mugulu omusaadha, ogw'oyo aja okulangirirwa nga mulongoofu.

²⁹ Omuzigo ogunaabanga nga gusigaire mu ngalo dhe, anaagusiiganga ku mutwe gw'oyo aja okulangirirwa nga mulongoofu. Mu nsambo eyo kabona oyo anaaghangayo omusengo olw'okutukuza omuntu oyo mu maiso ga Musengwa Katonda.

³⁰ Agho anaaghangayo eyindi ku njiibwa, oba erindi ku maghemba amato, ng'ole bw'anaabanga ng'asoboire okufuna,

³¹ ebyo bibe ekigheebwayo olw'ebibi, n'ekindi ng'ekigheebwayo ekyokebwa. Mu nsambo eyo kabona anaaghangayo omusengo olw'oyo aja okulangirirwa ng'omulongoofu.

³² Ago n'amateeka agagema ku oyo ali n'endwaire ey'ebigenge ataghanga kufuna bigheebwayo ebyabuliidho olw'okutukuzibwa kwe.”

Endwaire ey'ebigenge mu ndhu

³³ Musengwa Katonda yaalagira Musa ni Aaroni ati:

³⁴ “Bwe muliba nga mutuuse mu nsi Kanaani ye mbagha okuba obutaka bwaimwe, memale ni nta endwaire ey'ebigenge mu ndhu ey'omuntu mu nsi eyo,

³⁵ mwene ndhu eyo anaajanga yaakobera kabona nga bw'aboneka okuba ng'ali n'endwaire ey'ebigenge mu ndhu ye.

³⁶ Kabona ng'akaali kwingira okwekebeedha endwaire embi eyo, anaalagiranga okufulumya buli kintu mu ndhu eyo, birobe kufuuka ebitali birongoofu. Olwo kabona anaingiranga endhu,

³⁷ okwekebeedha endwaire embi eyo. Bwe ghanaabangagho ebitundu ebya kiragalalagala oba ebimyukirivu, ebiboneka nga biri kusima ekimante,

³⁸ kabona anaavanga mu ndhu eyo, yaagiigala okumala enaku musanvu.

³⁹ Ku lunaku olwomusanvu anairanga kabiri yaagyekebeedha. Endwaire bw'enaabanga ng'esansaine,

⁴⁰ anaalagiranga okutoolamu ebifo ebyo ebirimu endwaire, n'okusuula ebyo ebitooleibwamu ku luya w'ekibuga mu kifo aghasuulibwa ebitali birongoofu.

⁴¹ Era anaalagiranga baakalakata endhu eyo ku bimante munda mwayo mwonamwona, era ebimunku ebikalakatiibwa byasuulibwa ku luya w'ekibuga, mu kifo aghasuulibwa ebitali birongoofu.

⁴² Olwo banaatoolanga amabaale, baagazimba mu bifo bire ebitooleibwamu, era baatoola seminti owundi baakuba ku bimante.

⁴³ “Agho endwaire bw'enairangamu okusisiitula endhu eyo ng'ebifo bire bimaze okutoolebwamu era nga n'ebimante bikalakatiibwa era byakubwaku seminti,

⁴⁴ kabona anaingiranga yaagyekebeedha kabiri. Endwaire eyo bw'enaabanga ng'esansaine, eyo nga n'endwaire ey'ebigenge erya endhu, era endhu eyo teebenga nongoofu.

⁴⁵ Enaamenhebwangagho, era amabaale gaayo n'embaawo, n'ebimunku byayo byonabyona, binaatwalibwanga ku luya w'ekibuga mu kifo aghasuulibwa ebitali birongoofu.

⁴⁶ Kiisi anaingiranga mu ndhu eyo nga kabona agiigaire, taabenga mulongoofu okutuusa eigulo.

⁴⁷ Era kiisi anaalambaalanga mu ndhu eyo, oba anaaliirangamu, anaayozanga ebivaalo bye.

⁴⁸ “Aye kabona bw'anaingiranga n'abona ng'endwaire teizeemu kuboneka mu ndhu eyo ng'emaze okwiramu okukubwa ni seminti ku bimante, anaagirangiriranga ati nongoofu, kuba endwaire ewonie.

⁴⁹ Okutukuza endhu, kabona aidha kukozesanga enhonhi ibiri, n'omuti oguwunha akawoowo, n'oluwuuzi olw'olugoye olw'erangi ya kasaayisaayi, n'akati akeetebwa hissopu.

⁵⁰ Aidha kwitiranga eyindi ku nhonhi edho, mu kibya eky'eitosi omuli amaadhi agaviire mu nsulo edhikuuluula.

⁵¹ Aidha kutoolanga omuti oguwunha akawoowo, n'akati akeetebwa hissopu, n'enhonhi esigairegho enamu, byonabyona yaabiinhika mu musaayi gw'enhonhi eitiibwa, ni mu maadhi agaviire mu nsulo edhikuuluula, yaamansira endhu eyo emikuzi musanvu.

⁵² Atyo bw'anaatukuzanga endhu eyo, ng'akozesa omusaayi gw'enhonhi, n'amaadhi agaviire mu nsulo edhikuuluula, n'omuti oguwunha akawoowo, n'akati akeetebwa hissopu, era n'oluwuuzi olw'olugoye olw'erangi ya kasaayisaayi.

⁵³ Anaalekanga enhonhi ere enamu, yaaja ng'egulukira mu ibbanga okuva mu kibuga. Mu nsambo eyo anaatukuzanga endhu eyo yaaba nongoofu.”

⁵⁴ “Ago n'amateeka agagema ku ndwaire dhoonadhoona edh'ebigenge:

^55-56 obuzimbu, okubutukabutuka n'ebintu okumwaguka ku mubiri. Era amateeka geene ago n'agagema ni ku ndwaire edh'ebigenge edhiba mu ngoye era ni mu ndhu.

⁵⁷ Ago n'aganaakozesebwanga okusalagho ekirongoofu n'ekitali kirongoofu.”