Abalevi 13 - Baibuli Ekibono kya Katonda 2014

Amateeka agagema ku ndwaire edh'oku mubiri

¹ Musengwa Katonda yaalagira Musa ni Aaroni ati:

² “Omuntu bw'anaabanga n'obuzimbu, oba okubutukabutuka, oba ebintu okumwaguka ku mubiri gwe, nga muno musobola okufuukamu endwaire ey'ebigenge, anaaleetebwanga eri Aaroni kabona, oba eri owundi ku bakabona ab'oku lulyo lw'Aaroni.

³ Kabona aneekebeedhanga aghalwaire ku mubiri. Era obuviiri obuli aghalwaire bwe bunaabanga bweruukiriire, nga n'aghalwaire ghaboneka nga gheesimye mu mubiri, olwo ng'eyo n'endwaire ey'ebigenge. Agho kabona anaamulangiriranga ati tiimulongoofu.

⁴ Aye aghalwaire ku mubiri bwe ghanaabanga nga tiweeruukiriire, nga ghaboneka nga tigheesimye mu mubiri, n'obuviiri nga tibweruukiriire, kabona anaakuumiranga omuntu oyo mu kifo yenka, okumala enaku musanvu.

⁵ Agho kabona anairangamu okumwekebeedha ku lunaku olwomusanvu. Era bw'anaabonanga ng'aghalwaire ghasigaire nga bwe ghaali, nga tigheeyongeire kusansaana ku mubiri, anaamukuumiranga mu kifo yenka, okumala enaku edhindi musanvu.

⁶ Kabona anaamwekebeedhanga kabiri ku lunaku olwomusanvu. Era aghalwaire bweghanaabanga ghakendeire, nga tigheeyongeire kusansaana ku mubiri, kabona anaamulangiriranga ati mulongoofu, ali na bulwaire bwa kubutukabutuka bwonka. Agho omuntu oyo anaayozanga ebivaalo bye, yaaba mulongoofu.

⁷ Aye kabona bw'anaabanga ng'amaze okumwekebeedha n'okumulangirira bw'ali omulongoofu, ate okubutukabutuka ni kweyongera okusansaana ku mubiri, omuntu oyo anairangamu okweyandhula eri kabona.

⁸ Kabona anairangamu okumwekebeedha. Era okubutukabutuka bwe kunaabanga nga kweyongeire okusansaana ku mubiri, anaamulangiriranga ati tiimulongoofu; olwo anaabanga ng'ali n'endwaire ey'ebigenge.

⁹ “Omuntu ng'agemeibwa endwaire embi ey'ebigenge, anaaleetebwanga eri kabona

¹⁰ yaamwekebeedha. Bw'anaabanga n'obuzimbu nga bweruukiriire ku mubiri, nga bweruukiriiza n'obuviiri era ng'omubiri gwesazesaze aghazimbye,

¹¹ ebyo nga n'ebigenge ebitawona. Kabona anaamulangiriranga ati tiimulongoofu. Tikyetaagisa kumukuumira mu kifo yenka, kuba bwenebwene oyo tiimulongoofu.

¹² Aye ebigenge ebyo bw'ebinaasansaananga ni bibuna omulwaire oyo okuva ku mutwe okutuuka ku bigere,

¹³ kabona anaamwekebeedhanga kabiri. Bw'anaabonanga ng'ebigenge bibunie omubiri gwonagwona, anaamulangiriranga ati mulongoofu; omubiri gwe gwonagwona bwe guba nga gweruukiriire, oyo abalibwa nga mulongoofu.

¹⁴ Aye bw'anaabonekanga ng'omubiri gwesazesaze taabenga mulongoofu.

¹⁵ Kabona anaamwekebeedhanga kabiri. Era bw'anaabonanga ng'omubiri gwesazesaze, anaamulangiriranga ati tiimulongoofu, kuba eyo n'endwaire ey'ebigenge. Era omuntu oyo taabenga mulongoofu.

¹⁶ Aye omubiri ogwesazesaze bwe gunaawonanga ni ghairagho obweruukirivu, omuntu oyo anaajanga eri kabona,

¹⁷ kabona yairamu okumwekebeedha. Aghaali omubiri ogwesazesaze bwe ghanaabanga nga weeruukiriire, oyo nga mulongoofu, era kabona anaamulangiriranga ati mulongoofu.

¹⁸ “Omuntu bw'anaabanga n'okubutukabutuka ni kuwona,

¹⁹ aye aghabaire okubutukabutuka okwo ni ghairagho obuzimbu obweruukirivu oba ni ghamwaguka ebintu ebimyukirivu, omuntu oyo anaajanga eri kabona.

²⁰ Kabona anaamwekebeedhanga. Era bwe kinaabonekanga ng'ebintu ebyo ebimumwagwikeku byesimye mu mubiri, n'obuviiri bwagho nga bweruukiriire, kabona anaamulangiriranga ati tiimulongoofu, eyo n'endwaire ey'ebigenge efulumiire mu kubutukabutuka.

²¹ Aye kabona bw'aneekebeedhanga aghalwaire, n'abona ng'obuviiri bwagho tibweruukiriire, era nga tigheeyongeire kwesima mu mubiri aye nga ghakendeire, olwo kabona anaamukuumiranga mu kifo yenka okumala enaku musanvu.

²² Ebintu ebyo ebimumwagwikeku bwe binaabunanga ku mubiri gwe, olwo kabona anaamulangiriranga ati tiimulongoofu, mulwaire.

²³ Aye bwebinaakomanga agho ni bitasansaana ku mubiri, eyo nga n'enkovu ey'okubutukabutuka okuwonie. Agho kabona anaamulangiriranga ati mulongoofu.

²⁴ “Omuntu bw'anaayokebwanga omuliro, ni ghaidhagho omubiri ogwesazesaze ni gweruukirira, oba ni ghafuuka agheeru era nga ghamyukirivu,

²⁵ kabona anaamwekebeedhanga. Obuviiri mu kifo ekyo bwe bunaayeruukiriranga era ni kiboneka nga gheesimye mu mubiri, eyo nga n'endwaire ey'ebigenge efulumiire aghaayokebwa. Kabona anaamulangiriranga ati tiimulongoofu.

²⁶ Aye kabona bw'aneekebeedhanga aghalwaire, n'abona ng'obuviiri bwagho tibweruukiriire era nga tigheeyongeire kwesima mu mubiri, aye nga ghakendeire, olwo kabona anaamukuumiranga mu kifo yenka, okumala enaku musanvu.

²⁷ Kabona anairangamu okumwekebeedha ku lunaku olwomusanvu. Era bwe ghanaabanga nga gheeyongeire okusansaana ku mubiri, anaamulangiriranga ati tiimulongoofu, eyo n'endwaire ey'ebigenge.

²⁸ Aye aghalwaire bwe ghanaakomanga agho, ni ghatasansaana ku mubiri era nga ghatooleire okuwona, eyo nga ti n'endwaire ey'ebigenge. Era kabona anaamulangiriranga ati mulongoofu, kuba eyo nkovu bukovu ya muliro.

²⁹ “Omusaadha oba omukazi bw'anaabanga n'obulwaire ku mutwe oba ku kalevu,

³⁰ kabona anaabwekebeedhanga. Bwe bunaabonekanga nga bwesimye mu mubiri, era ng'enviiri edhirimu dhengereire era nga ntaagataaga, kabona anaamulangiriranga ati ti mulongoofu; olwo lukuku, endwaire ey'ebigenge ey'oku mutwe oba ey'oku kalevu.

³¹ Era kabona bw'aneekebeedhanga obulwaire obwo, n'abona nga tibwesimye mu mubiri, aye ate ng'enviiri edhirigho ti nnamu, anaakuumiranga omulwaire oyo mu kifo yenka, okumala enaku musanvu.

³² Kabona anairangamu okumwekebeedha ku lunaku olwomusanvu. Era obulwaire bwe bunaabanga nga tibweyongeire kusansaana ku mubiri, nga n'enviiri dhaagho tidhengereire, era nga tibuboneka kuba nga bwesimye mu mubiri,

³³ omulwaire anaamwangaku enviiri okutoolaku agho aghalwaire, olwo kabona yaamukuumira mu kifo yenka okumala enaku edhindi musanvu.

³⁴ Ku lunaku olwomusanvu kabona anairangamu kabiri okwekebeedha aghalwaire. Obulwaire bwe bunaabanga nga tibweyongeire kusansaana ku mubiri, era nga tibuboneka kuba nga bwesimye mu mubiri, anaamulangiriranga ati mulongoofu. Omulwaire anaayozanga ebivaalo bye, yaaba mulongoofu.

³⁵ Aye obulwaire bwe bunaasansaananga ku mubiri ng'omulwaire amaze okulangirirwa ati mulongoofu,

³⁶ agho kabona anaamwekebeedhanga kabiri. Bwe bunaabanga nga busansaine ku mubiri, kabona oyo tiyeetaagenga kunoonia nviiri dhengereire. Bwenebwene oyo anaabanga nga tiimulongoofu.

³⁷ Aye kabona bw'anaabonanga ng'obulwaire bukomye agho era ng'enviiri endhirugavu dhimezeegho, olwo ng'obulwaire buwonie, era anaamulangiriranga ati mulongoofu.

³⁸ “Omusaadha oba omukazi bw'anaabanga n'okubutukabutuka okwengereire ku mubiri,

³⁹ kabona anaamwekebeedhanga. Okubutukabutuka okwo bwe kunaabanga nga tikwa maani, ekyo kinaabanga kimyamya bumyamya nga kifulwime mu mubiri; oyo anaabanga mulongoofu.

^40-41 “Omusaadha bw'anaakuunhuukanga enviiri ku mutwe mu kawompo oba ku mutwe emberi, oyo anaabanga wa mpaata era nga mulongoofu.

⁴² Aye ekipaapi ekimyukiriire era ekyeruukiriire bwe kinaabonekanga aghakuunhwike enviiri, eyo nga n'endwaire ey'ebigenge.

⁴³ Kabona anaamwekebeedhanga, era bw'anaamubonangaku obuzimbu obumyukiriire era obweruukiriire,

⁴⁴ anaamulangiriranga ati tiimulongoofu, olw'endwaire eyo ey'ebigenge eri ku mutwe gwe.

⁴⁵ “Omuntu alwaire ebigenge, anaavaalanga ngoye nkanufu, yaalekanga n'enviiri dhe nga ti nsunsule okwoleka enaku ye. Era anaaghembanga ku mutwe gwe, yaalangiriranga ati: ‘Tiri mulongoofu, tiri mulongoofu!’

⁴⁶ Taabenga mulongoofu ekiseera kyonakyona ky'anaamalanga ng'akaali mulwaire. Taabenga ghalala na bantu batali balwaire.

Amateeka agagema ku bigenge mu bintu

⁴⁷ “Endwaire ey'ebigenge bw'enaabanga mu kivaalo, ka kibe nga kyakolebwa mu buviiri bwa ntaama oba nga kya lugoye lughegheevu,

⁴⁸ oba n'eba mu kighero kyonakyona eky'olugoye olughegheevu oba ekyakolebwa mu buviiri bw'entaama, oba ku luwu, oba ku kintu ekyakolebwa mu luwu,

⁴⁹ era endwaire eyo n'eba eya kiragalalagala oba emyukirivu, mu kivaalo oba ku luwu oba ku kintu ekyakolebwa mu luwu, enaalagibwanga kabona.

⁵⁰ Kabona anaagyekebeedhanga, yaakuumira ekintu ekyo aghantu okumala enaku musanvu.

⁵¹ Anairangamu okwekebeedha endwaire eyo ku lunaku olwomusanvu. Bw'enaabanga ng'esansaine, ekintu ekyo kinaabanga nga tiikirongoofu.

⁵² Kabona anaakyokyanga, kuba eyo n'endwaire ey'ebigenge. Eteekwa okuzikirizibwa.

⁵³ “Aye kabona bw'aneekebeedhanga n'abona ng'endwaire tesansaine mu kintu ekyo,

⁵⁴ anaalagiranga baakyoza, era kyaterekebwa okumala enaku edhindi musanvu.

⁵⁵ Agho kabona anaakyekebeedhanga kabiri. Endwaire bw'enaabanga nga tekyusiiza langi yaayo, waire nga tesansaine mu kintu ekyo, ekintu ekyo era tikiibenga kirongoofu. Kinaayokebwanga, ka kibe ng'obukuku buli munda oba ku ngulu.

⁵⁶ Aye kabona bw'anairangamu okukyekebeedha n'abona ng'endwaire ekendeire, anaakanulangagho ekipaapi ekyo endwaire ky'erimu mu kivaalo oba mu luwu.

⁵⁷ Endwaire bw'enairangamu okuboneka, olwo enaabanga ng'eri kusansaana kabiri, era ekintu ekyo kinaayokebwanga.

⁵⁸ Aye bw'anaakyozanga ekimyamya ni kiwaamu, anairangamu okukyoza kabiri era kyabalibwa nga kirongoofu.”

⁵⁹ Ago n'amateeka agagema ku ndwaire ey'ebigenge ng'eri mu kivaalo, ka kibe nga kyakolebwa mu buviiri bwa ntaama oba kya lugoye lughegheevu, oba mu kintu kyonakyona ekyakolebwa mu luwu. Amateeka ago n'aganaakozesebwanga okusalagho ekirongoofu n'ekitali kirongoofu.