Abalevi 12 - Baibuli Ekibono kya Katonda 2014

Okutukuzibwa kw'abakazi nga bamaze okuzaala

¹ Musengwa Katonda yaalagira Musa ati:

² “Kobera Abaisiraeli oti omukazi bw'anaatoolanga enda n'azaala omwana omulenzi, enaku omusanvu edhinaiririranga taabenga mulongoofu, ng'oti ni bw'ataba mulongoofu ng'ali mu biseera bye eby'okulwala.

³ Ku lunaku olwomunaana, omwana anaakeketebwanga.

⁴ Olwo omukazi oyo anaamalanga enaku edhindi amakumi asatu na isatu ng'atwalibwa okuba ng'akaali kutukuzibwa, olw'omusaayi ogwamuvaamu ng'azaala. Taagemenga ku kintu kitukuvu oba okwingira mu kifo ekitukuvu, okutuusa enaku edh'okutukuzibwa kwe lwe dhinaawangaku.

⁵ Aye bw'anaazaalanga omwana omughala, anaamalanga enaku ikumi na ina nga tiimulongoofu, nga bw'ataba mulongoofu ng'ali mu biseera bye eby'okulwala. Olwo anaamalanga enaku edhindi nkaaga na mukaaga ng'atwalibwa okuba ng'akaali kutukuzibwa olw'omusaayi ogwamuvaamu ng'azaala.

⁶ “Agho enaku edh'okutukuzibwa kwe bwe dhinaawangaku, edh'omwana omulenzi oba omughala, omukazi oyo anaaleetanga eri kabona ku mulyango gw'Eweema ey'Okwagaananirangamu ni Musengwa Katonda, entaama ento ey'omwaka omulala, ebe ekigheebwayo ekyokebwa, n'enjiibwa oba eighemba eito, okuba ekigheebwayo olw'ebibi.

⁷ Kabona anaaghangayo ekigheebwayo ekyo ng'omusengo eri Musengwa Katonda, omukazi oyo yaatukuzibwa olw'omusaayi ogwamuvaamu. Eryo n'eiteeka erifuga omukazi ng'azaire omwana omulenzi oba omughala.

⁸ “Omukazi bw'aba nga taghanga kughaayo ntaama nto, anaaghangayo amaghemba amato abiri oba enjiibwa ibiri, olw'ekigheebwayo ekyokebwa, n'olw'ekigheebwayo olw'ebibi. Kabona anaaghangayo ebigheebwayo ebyo ng'omusengo eri Musengwa Katonda olw'omukazi oyo, yaaba mulongoofu.”