Abalevi 11 - Baibuli Ekibono kya Katonda 2014

Ensolo edhiikirizibwa n'edho edhitaikirizibwa kuliibwa

¹ Musengwa Katonda yaalagira Musa ni Aaroni

² bakobere Abaisiraeli bati: “Bino n'ebiramu bye mwikirizibwa okulya mu nsolo dhoonadhoona edhiri ku bukalu.

³ Buli nsolo eri n'ebinuulo nga byawulemu era eiza obwekulumo, eyo mwikirizibwa okugirya.

^4-6 Aye mutalyanga nsolo nga dhino: engamiya, omusu, n'akamyu. Munaadhibaliranga mu ebyo ebitali birongoofu, kuba waire biiza obwekulumo, aye bizira binuulo byawulemu.

⁷ Era mutalyanga mbiidhi. Munaagibaliranga mu ebyo ebitali birongoofu, kuba waire eri n'ebinuulo ebyawulemu, aye teiza bwekulumo.

⁸ Mutalyanga ku mamba ya nsolo edho, waire okudhigemaku nga dhifiire. Ti nongoofu.

⁹ “Mwikirizibwa okulya kiisi kya mu maadhi ekiri n'obukuba amaadhi, n'ebigalagamba.

¹⁰ Aye buli kiramu ekiba mu maadhi ekizira bukuba maadhi na bigalagamba, kinaabanga kyenhinhalwa ye muli.

¹¹ Ebyo binaabanga kyenhinhalwa ye muli. Mutalyanga ku mamba yaabyo, waire okubigemaku nga bifu.

¹² Buli ekiba mu maadhi ekizira bukuba maadhi na bigalagamba, kinaabanga kyenhinhalwa ye muli.

¹³ “Mu nhonhi edhinaabanga ekyenhinhalwa ye muli era dhe mutalyanga, n'omuli dhino: enkookooma, ensega, mawudi,

¹⁴ akakubi, eikoli, n'edhindi edhiri mu bika byadho;

¹⁵ n'amakoova aga buli kika,

¹⁶ ni maaya, n'ensega ey'oku maadhi, n'akakologo, n'edhindi edhiri mu bika byadho;

¹⁷ n'ekiwigulu eky'obwire, n'eky'oku maadhi, n'ekyo ekinene.

¹⁸ Era n'ekiwigulu eky'amatu, n'eky'amayiga, n'ensega endheru,

¹⁹ ni sekenhulya, ni mpaabaana n'edhindi edhiri mu bika byadho; n'eikokootezi, n'eirenha.

²⁰ “Ebisiisa byonabyona ebiri n'amaghagha, ebitambuza amagulu ana (4), binaabanga kyenhinhalwa ye muli

²¹ okutoolaku ebyo ebisobola okutuuma n'amagulu gaabyo.

²² Kale ni mwikirizibwa okulya enzige, enseenene, namadhedhe, n'ebindi ebiri mu bika byabyo.

²³ Aye ebisiisa byonabyona ebindi ebiri n'amaghagha, n'amagulu ana, binaabanga kyenhinhalwa ye muli.

²⁴ “Kiisi anaagemanga ku mulambo ogw'ensolo dhino anaafuukanga atali mulongoofu era anaasigalanga nga tiimulongoofu okutuusa eigulo.

²⁵ Era kiisi anaabbeedanga ekitundu kyonakyona ku mulambo ogw'ensolo dhino anaabanga n'okwoza ebivaalo bye, aye era anaasigalanga nga tiimulongoofu okutuusa eigulo:

²⁶ Buli nsolo eri n'ebinuulo aye nga tibyawulemu era nga teiza bwekulumo, munaagibaliranga mu dhitali nongoofu. Kiisi anaagigemangaku ng'efiire taabenga mulongoofu.

²⁷ Era buli nsolo ey'amagulu ana eri n'enkumu, munaagibaliranga mu dhitali nongoofu. Kiisi anaagigemangaku, anaasigalanga nga tiimulongoofu okutuusa eigulo.

²⁸ Era oyo anaabbeedanga omulambo gw'ensolo eyo, anaabanga n'okwoza ebivaalo bye, aye era anaasigalanga nga tiimulongoofu okutuusa eigulo. Ensolo edho munaadhibaliranga mu dhitali nongoofu.

²⁹ “Ebiramu bino byona munaabibaliranga mu ebyo ebitali birongoofu: enfuko, empube, omudolome omunene n'ebindi ebiri mu kika kyagwo;

³⁰ n'akafuuwante, n'embulu, n'omunha, n'omudolome, n'olukaanianvu.

³¹ Ebyo munaabibaliranga mu bitali birongoofu. Kiisi anaabigemangaku nga bifiire, anaasigalanga nga tiimulongoofu okutuusa eigulo.

³² Era buli kintu ekinaagwibwangaku ebintu ebyo nga bifiire, ka kibe kya muti, oba kya lugoye, oba luwu, oba kutiya, oba ekindi kyonakyona ekikozesebwa, tikiibenga kirongoofu. Kinaateekwanga okwinhikibwa mu maadhi, aye era kyasigala nga tiikirongoofu okutuusa eigulo; memale kyaba ekirongoofu.

³³ Era ebintu ebyo ebibalirwa mu bitali birongoofu bwe bigwa mu kintu ekyawumbibwa mu itosi, byonabyona ebiri mu kintu ekyo tibiibenga birongoofu era ekintu ekyo kinaamenhebwanga.

³⁴ Buli kya kulya ekiikirizibwa okuliibwa, ekifukiibwaku amaadhi agaviire mu kintu ekyo ekigwiremu ebintu ebyo ebitali birongoofu, tikiibenga kirongoofu, era buli kyakunhwa ekiri mu kintu ekyo, tikiibenga kirongoofu.

³⁵ Buli kintu ekinaagwangamu ebintu ebyo ebitali birongoofu nga bifiire, tikiibenga kirongoofu, ka kibe ziiko ey'eitosi, oba mayiga amawumbe, ebyo binaamenhebwanga bumenhebwe. Ti birongoofu, era binaabanga kyenhinhalwa ye muli.

³⁶ Aye ensulo oba ekidiba ekirimu amaadhi, binaasigalanga nga birongoofu, waire ng'ekintu ekindi kyonakyona ekigemye ku bintu byo nga bifiire tikiba kirongoofu.

³⁷ Era ekindi ku bintu ebyo ekifiire, bwe kigwa ku nsigo eja okusigibwa, ensigo esigala nga nongoofu.

³⁸ Aye ensigo bw'eba nga einhikiibwa mu maadhi, memale ekindi ku bintu ebyo ebitali birongoofu ekifiire ni kigigwaku, ensigo eyo teebenga nongoofu.

³⁹ “Ensolo eikirizibwa okuliibwa bw'efa, kiisi muntu anaagigemangaku, taabenga mulongoofu okutuusa eigulo.

⁴⁰ Era oyo anaalyanga ku mamba yaayo anaabanga n'okwoza ebivaalo bye, aye era yaasigala nga tiimulongoofu okutuusa eigulo. N'oyo anaagibbeedanga ng'efiire anaabanga n'okwoza ebivaalo bye, aye era yaasigala nga tiimulongoofu okutuusa eigulo.

⁴¹ “Obusolo obutono obutambula ku nsi mutabulyanga, bunaabanga kyenhinhalwa ye muli;

⁴² ka bube nga bwekulula, oba nga butambuza amagulu ana, oba nga buli n'amagulu kamaala.

⁴³ Muteeyonoonanga nga mulya ku mamba ey'ebyekulula ebyo, era muteereeteranga kuba batali balongoofu olw'ebitonde ebyo.

⁴⁴ Ninze Musengwa Katonda waimwe. Mubenga batukuvu, kuba nze ndi mutukuvu. Muteereeteranga kuba batali batukuvu nga mulya ku mamba ey'ebyekululira ku itaka ebyo.

⁴⁵ Ninze Musengwa Katonda eyabatoola mu Misiri, mbenga Katonda waimwe. Kale ni mubenga batukuvu, kuba nze ndi mutukuvu.”

⁴⁶ Ago n'amateeka agagema ku nsolo ni ku nhonhi, ni ku buli kiramu ekiba mu maadhi, ni ku buli kiramu ekitambula ku itaka.

⁴⁷ Ago n'aganaakozesebwanga okwawulanga ebirongoofu ku bitali birongoofu, n'okwawulanga ebiramu ebiikirizibwa okuliibwa, ku ebyo ebitaikirizibwa.