Abalevi 10 - Baibuli Ekibono kya Katonda 2014

Ekibi kya Nadabu ni Abihu

¹ Agho Nadabu ni Abihu batabane ba Aaroni, baatoola ebiniokezebwaku obubbaani, buli mulala ekikye, baabitaamu omuliro baataaku obubbaani, baabuniokeza mu maiso ga Musengwa Katonda. Aye omuliro ogwo tigwali mutukuvu, kuba Musengwa Katonda ti n'eyabalagira okuguleeta.

² Amangu ago Musengwa Katonda yaasindika omuliro, gwabookya, baafiira mu maiso ge.

³ Agho Musa yaakoba Aaroni ati: “Kino Musengwa Katonda kye yayogeraku bweyakoba ati, ‘Ndyeyoleka nga ndi mutukuvu mu abo abampeereza, era nnaasaakibwanga mu maiso g'abantu boonaboona.’ ” Aye Aaroni yaasirika busirike.

⁴ Musa yaayeta Mishaeli ni Elizafani, batabane ba Uzzieli muganda wa lata wa Aaroni, yaabakoba ati: “Mwidhe mubbeedegho emirambo gya batabane ba muganda waimwe, mugitoole mu Weema Entukuvu mugitwale kuliya okuva ghano aghaasimbwa weema dhaife.”

⁵ Kale baidha, baagibbeedera ku ngoye, baagitwala kuliya kw'ekifo abantu kye baasimbamu weema dhaibwe, nga Musa bweyalagira.

⁶ Musa yaakoba Aaroni ni batabane be, Eleazari ni Ithamari, ati: “Mutaloba kusunsula nviiri dhaimwe era mutakanulamu ebivaalo byaimwe okwoleka nga munakughaire. Bwe munaakola ekyo mwidha kufa, era Musengwa Katonda aidha kusungughalira ekikunsu kyonakyona eky'abantu. Aye Baisiraeli banaimwe abandi boonaboona, baikirizibwa okulira olw'okufiirwa okwo, okuleeteibwa omuliro Musengwa Katonda gw'asindiike.

⁷ Mutava ku mulyango gwa Weema ey'Okwagaananirangamu ni Musengwa Katonda, lwe mutaafe, kuba muliku omuzigo ogwabasiigibwa okubaawula mube ba Musengwa Katonda.” Kale baakola nga Musa bweyakoba.

Amateeka agafuga bakabona

⁸ Musengwa Katonda yalagira Aaroni ati:

⁹ “Iwe ni batabane bo, bwe munaabanga munhweire ku mwenge ogw'emizabbibu, oba ekitamiiza ekindi kyonakyona, mutaingiranga mu Weema ey'Okwagaananirangamu ni Musengwa Katonda. Bwe mulikikola, muja kufa. Eiteeka eryo linaakuumibwanga ab'olulyo lwaimwe enaku dhoonadhoona.

¹⁰ Mwawulengagho ebintu ebitukuvu n'ebitali bitukuvu, ebirongoofu n'ebitali birongoofu.

¹¹ Era mwegeresenga Abaisiraeli amateeka goonagoona ge mbaghaire nga mbita mu Musa.”

¹² Agho Musa yaakoba Aaroni ni batabane be abaasigalagho nga balamu, Eleazari ni Ithamari, ati: “Mutwale ekigheebwayo eky'emere ey'empeke ekisigairegho ku bigheebwayo eri Musengwa Katonda ebyokebwa, mubikolemu emigaati egitazimbulukusiibwa, mugiriire ku mbali kw'alutaari, kuba ekigheebwayo ekyo kitukuvu inho.

¹³ Mugiriire mu Kifo Ekitukuvu mwonka, kuba ogwo n'omugabo gwo iwe Aaroni, ni batabane bo, ku by'okulya ebigheebwayo eri Musengwa Katonda. Ekyo Musengwa kye yandagira.

¹⁴ Aye ekifuba ekigheebwayo nga kiwuubibwa, n'ekisambi ekigheebwayo obugheebwe, iwe ni batabane bo ni baghala bo, munaabanga ba idembe okubiriira mu kifo kyonakyona ekirongoofu, kuba ebyo bikugheebwa iwe n'abaana bo, nga n'omugabo gwaimwe bakabona, ku misengo egigheebwayo Abaisiraeli olw'okutabagana.

¹⁵ Banaaleetanga ekisambi ekigheebwayo obugheebwe n'ekifuba ekigheebwayo nga kiwuubibwa, nga baleeta amasavu okuba ekigheebwayo eri Musengwa Katonda ekyokebwa. Ebitundu ebyo banaabiwuubanga, bibe ebigheebwayo mu maiso ga Musengwa Katonda nga biwuubibwa. Era binaabanga bibyo era bya baana bo enaku dhoonadhoona, nga Musengwa Katonda bweyalagira.”

¹⁶ Musa yaabuuza ebigema ku mbuzi ey'ekigheebwayo olw'ebibi. Yaazuula nga yamaze ira okwokebwa! Agho yasungughalira Eleazari ni Ithamari, batabane ba Aaroni. Yaababuuza ati:

¹⁷ “Ekigheebwayo olw'ebibi lwaki timukiriiriire mu Kifo Ekitukuvu? Ekigheebwayo ekyo Kitukuvu inho, era Musengwa Katonda yakibagha okutoolagho ebibi by'abantu, nga mughaayo omusengo olw'ebibi eby'abantu mu maiso ga Musengwa Katonda.

¹⁸ Omusaayi gwakyo nga bwegutaaleeteibwa mu Weema Entukuvu, mubaire muli n'okukiriira omwo nga bwe nalagira.”

¹⁹ Agho Aaroni yairamu ati: “Olwaleero abantu baleese ekigheebwayo olw'ebibi, era baghaireyo ekigheebwayo ekyokebwa, aye era naatuukibwaku ebizibu bino eby'okufiirwa! Memale ngoli ndiire ekigheebwayo olw'ebibi, Musengwa Katonda yandinsiimye?”

²⁰ Musa bweyawulira ebyo, yainhongoka.