Abalevi 1 - Baibuli Ekibono kya Katonda 2014

Emisengo egyokebwa nga miromba

¹ Musengwa Katonda yayeta Musa, yaayogera naye mu Weema ey'Okwagaananirangamu ni Musengwa Katonda yaamukoba ati:

² “Kobera Abaisiraeli oti bweghabangagho omuntu yeenayeena mu imwe aghaayo omusengo eri Musengwa Katonda, aidha kugughangayo ng'atoola mu byayo bye.

³ Bw'anaabanga ng'aja kughaayo musengo ogwokebwa gwonagwona ni guwaagho ng'atoola mu nte dhe, aidha kughangayo enume eziraku kikyamu kyonakyona. Anaagigheerangayo ku mulyango gw'Eweema ey'Okwagaananirangamu ni Musengwa Katonda, olwo Musengwa Katonda oyo asobole okumusiima.

⁴ Omuntu oyo aidha kutanga omukono gwe ku mutwe gwayo, olwo Musengwa Katonda asiimenga omusengo gwe, olw'okutoolebwaku ebibi bye.

⁵ Anaitiranga ente agho mu maiso ga Musengwa Katonda, era bakabona ab'oku lulyo lwa Aaroni baatwala omusaayi, baagumansira ku ndhuyi dhoonadhoona edh'alutaari eri ku mulyango gw'Eweema ey'Okwagaananirangamu ni Musengwa Katonda.

⁶ Era anaagibaagangaku oluwu yaagitematemamu.

⁷ Agho bakabona banaayaliiranga enku ku alutaari, baakunaania omuliro.

⁸ Era banaatoolanga emamba eyo ye batemyetemyemu, n'omutwe n'amasavu, baagitegeka bukalamu ku nku edho edhiri ku muliro ku alutaari.

⁹ Aye ebyenda n'ebibbonge binaanaazibwanga n'amaadhi. Agho kabona anaayokeranga byonabyona ku alutaari, ng'ekigheebwayo ekyokebwa n'omuliro. Akawoowo kaakyo kasangaaza Musengwa Katonda.

¹⁰ “Bw'anaabanga ng'aja kughaayo musengo ogwokebwa omulomba, ng'atoola mu ntaama dhe oba mu mbuzi dhe, aidha kughangayo enume eziraku kikyamu kyonakyona.

¹¹ Anaagiitiranga ku luuyi lw'alutaari olw'omukono omugooda olw'e buvandhuba. Agho bakabona ab'oku lulyo lwa Aaroni banaamansiranga omusaayi gwayo ku ndhuyi dhoonadhoona edh'alutaari.

¹² Ekyo nga kiwoire, omuntu oyo anaatematemanga mu nsolo eyo, kabona yaatoola emamba eyo, n'omutwe, n'amasavu, yaabitegeka bukalamu ku nku edhiri ku muliro ku alutaari.

¹³ Aye byenda n'ebibbonge binaanaazibwanga n'amaadhi. Agho kabona anaayokeranga byonabyona ku alutaari, ng'ekigheebwayo ekyokebwa n'omuliro. Akawoowo kaakyo kasangaaza Musengwa Katonda.

¹⁴ “Bw'anaabanga ng'aja okughaayo omusengo ogwokebwa omulomba nga gwa nhonhi, aidha kughangayo njiibwa oba ighemba.

¹⁵ Kabona anaaleetanga enhonhi eyo ku alutaari, yaaginiola enkoto, yaagikutulaku omutwe, yaagwokera ku alutaari, yaakamulira omusaayi gw'enhonhi ku mbali kw'alutaari.

¹⁶ Anaagitoolangamu ekisakiro kyayo n'ebikirimu, yaabisuula gha mbali gh'alutaari, ku luuyi olw'e buvandhuba aghateebwa eivu.

¹⁷ Agho kabona anaagigemanga amaghagha, yaagiyuza aye nga tagikutwiremu ghabiri, yaagyokera ku nku edhiri ku muliro ku alutaari ng'ekigheebwayo ekyokebwa, nga kyokeibwa n'omuliro. Akawoowo kaakyo kasangaaza Musengwa Katonda.