Abalamuzi 9 - Baibuli Ekibono kya Katonda 2014

Abimeleki bamufuula kyabazinga

¹ Abimeleki mutabane wa Gideoni yaaja e Shekemu y'aboluganda lwa inhina, yaabakoba boonaboona ati:

² “Mubuuze abantu ab'e Shekemu boonaboona muti, ‘Kye mwenda n'ekiri gha ku bino: okufugibwanga batabane ba Gideoni boonaboona ensanvu, oba okufugibwanga omuntu omulala yenka?’ Mwidhukire nga nze ndi musaayi gwaimwe.”

³ Aboluganda lwa inhina baamutuukiza ebibono ebyo byonabyona y'abantu ab'e Shekemu. Abantu ab'e Shekemu abo baasalagho okunonereza Abimeleki, nga bakoba bati: “Oyo atuliku oluganda.”

⁴ Baamugha ebitundu bya feeza nsanvu, bye baatoola mu isabo lya Baali Berithi. Empiiya edho, Abimeleki dhe yakozesa okupangisa abasaadha abazira kye bagasa naire era ababbamu, abaamunonereza.

⁵ Agho yaaja mu ndhu ya ise mu Ofura, yaitirayo, ku ibaale irala, baganda be ensanvu, batabane ba Gideoni. Aye Yothamu mutabane wa Gideoni asembayo obuto, yeekweka, yaaloba kwitibwa.

⁶ Abatyamye ab'e Shekemu n'ab'e Bethimillo boonaboona, beesoloza, baafuula Abimeleki kyabazinga, agho ghansi gh'omuti omukologho ogw'empagi e Shekemu.

⁷ Yothamu bwe yakimanha, yaaja yaayemerera ghaigulu ku ngulu ku lusozi Gerizimu, yaayogerera ghaigulu, yaabalagiriza ati: “Mumpulirise imwe abatyamye b'e Shekemu, Katonda aghange okubawulira.

⁸ Agho olwatuuka, emiti gyaja okulonda kyabazinga anaagifuganga. Gyakoba omuti omwoliva giti, ‘Ba kyabazinga waife.’

⁹ Aye omuti omwoliva gwairamu guti, ‘Ndekeyo okuvaamu omuzigo gwe bakozesa okwisa ekitiibwa mu misambwa ni mu bantu, ndhire mu kufuga obw'emiti?’

¹⁰ Emiti gyakoba omuti omutiini giti, ‘Iwe idha, obe kyabazinga waife.’

¹¹ Aye omuti omutiini gwairamu guti, ‘Ndekeyo okubala ebibala ebirungi era ebidhuudhuula, ndhire mu kufuga obw'emiti?’

¹² Emiti gyakoba omuti omuzabbibu giti, ‘Iwe idha, obe kyabazinga waife.’

¹³ Aye omuti omuzabbibu gwairamu guti, ‘Ndekeyo okuvaamu omwenge gwange ogusangaaza emisambwa n'abantu, ndhire mu kufuga obw'emiti?’

¹⁴ Agho emiti gyonagyona gyakoba omuti namukodolya giti, ‘Iwe idha, obe kyabazinga waife.’

¹⁵ Omuti namukodolya gwakoba emiti guti, ‘Oba nga bwene mwenda okunfuula kyabazinga waimwe, kale mwidhe mwewogome mu kinsense kyange. Aye oba nga ti n'ekyo, omuliro gwidha kuva mu nsaga dhange edh'amawa, gumalegho emivule egy'omu Lebanoni.’ ”

¹⁶ Yothamu yaayongera okukoba ati: “Mpegaano ni mwebuuze: Eky'okufuula Abimeleki kyabazinga, mukikoze mu bwesimbu na mazima? Mwidhukira ebirungi Gideoni bye yabakolera? Era ab'endhu ye mubabisiisa bukalamu nga bwe kigwaniire?

¹⁷ Mwidhukire nga lata wange yabalwanirira yaaghaayo obulamu bwe, yaabawonia Abamidia.

¹⁸ Aye imwe olwaleero mwefuuliire ab'endhu ya lata wange mwaitira ku ibaale irala batabane be, abantu ensanvu. Mwatoola Abimeleki, mutabane w'omwiru omukazi owa lata wange, mwamufuula kyabazinga ow'e Shekemu, kuba waluganda lwaimwe.

¹⁹ Kale ni oba nga kye mukoze Gideoni n'ab'endhu ye, mu kikoze mu mwoyo mulungi na mu mazima, mbeeni musangaalire Abimeleki, era yeena abasangaalire.

²⁰ Aye oba nga ti bwekiri, omuliro ka guve mu Abimeleki gusaaniegho ab'omu Shekemu n'ab'e Bethimillo, era omuliro guve mu bantu ab'e Shekemu n'ab'e Bethimillo gusaaniegho Abimeleki.”

²¹ Agho Yothamu, olw'okutya muganda we Abimeleki, yaalumukira e Beeri, yaaba eyo.

²² Abimeleki yaafuga Isiraeli okumala emyaka esatu.

²³ Agho Katonda yaakyaghagania Abimeleki n'abantu b'omu Shekemu. Abantu ab'omu Shekemu baaghemukira Abimeleki nga tibakaali beesigwa y'ali.

²⁴ Ekyo kyaligho, Abimeleki n'abantu ab'e Shekemu abaamughaganga okwita batabane ba Gideoni ensanvu, beesasuuzibwe olw'omusango gwaibwe ogwo.

²⁵ Abantu ab'e Shekemu baataagho abasaadha okweteeganga Abimeleki ku ngulu okw'ensozi, era baanhaganga ebintu ku bantu boonaboona abaabitanga mu ngira eyo. Ekyo abantu baakikobera Abimeleki.

²⁶ Agho Gaali mutabane wa Ebedi, yaidha n'aboluganda lwe, e Shekemu. Era abantu ab'e Shekemu baamutaamu obwesige,

²⁷ baaja mu masamba gaibwe ag'emizabbibu, baanoga emizabbibu baagikunhamu omwenge. Era baakola ekibinuko, baingira mu isabo ly'omusambwa gwaibwe, baalya, baanhwa, era baavumirira Abimeleki.

²⁸ Gaali oyo mutabane wa Ebedi yaakoba ati: “Tuli bantu ba nsambo ki ife ab'omu Shekemu muno? Lwaki tugheereza Abimeleki? Ye Abimeleki oyo naani? Era abimeleki oyo ni Zebuli omukungu we, bombi tibaagheerezanga basaadha ba Hamori, lata wa Shekemu? Kale lwaki tumugheereza?

²⁹ Ngoli ninze omukulembeze w'abantu bano, nanditoiregho Abimeleki! Nandimukobye nti, ‘Yongera mu igye lyo amaani, oveeyo oidhe olwane.’ ”

³⁰ Zebuli omukulu w'ekibuga bwe yawulira Gaali, mutabane wa Ebedi by'akobye, yaasungughala.

³¹ Yaatuma abakwenda y'Abimeleki mu Aruma okumukobera ati: “Gaali mutabane wa Ebedi n'aboluganda lwe baidhie e Shekemu, era baasiikuula abantu ab'omu kibuga okukulwanisa.

³² Mpegaano ni, iwe n'abasaadha bo, muje obwire mweteege mu nsiko.

³³ Olwo musituke ku nkyo ng'endhuba yaakavaayo, mulumbe ekibuga. Gaali n'abasaadha be bwe banaavaayo okubalumba, mwidha kubakubira irala nga bwe munaaba musoboire.”

³⁴ Agho Abimeleki n'abasaadha be baasituka mu bwire, beeteega ku mbali kwa Shekemu mu bikunsu bina.

³⁵ Agho Gaali yaafuluma yaayemerera mu mulyango ogw'ekibuga. Abimeleki n'abasaadha be baasituka okuva ghe baali babwaime.

³⁶ Gaali bwe yababona, yaakoba Zebuli ati: “Bona abantu bali kuserengeta nga bava ku ngulu okw'ensozi.” Aye Zebuli yaamwiramu ati: “Oli kubona binsense bya nsozi nga biri ng'oti bantu!”

³⁷ Gaali yaakoba kabiri ati: “Bona, abantu bali kuserengeta nga bava ghagati gh'ekiketezo. Ghaligho ekikunsu eky'abantu ekindi ekiri kufuluma mu ngira ey'oku muti omukologho ogw'abalaguzi.”

³⁸ Agho Zebuli yaamukoba ati: “Mpegaano okwesuutiriza kwo kujiire gha? Wakoba oti, ‘Abimeleki katyo naani, ife okumugheereza?’ Abo ni, n'abantu be wanhoomerera. Mpegaano weeveemu obalwanise.”

³⁹ Gaali yaakulembera abasaadha ab'e Shekemu, yaalwanisa Abimeleki.

⁴⁰ Gaali yaalumuka, Abimeleki yaamubingirira. Abantu kamaala baaja nga bagwa okutuukira irala ku mulyango ogw'ekibuga, olw'okufumitibwa.

⁴¹ Abimeleki yaaba mu Aruma. Zebuli yaabinga Gaali n'aboluganda lwe mu Shekemu, balobe kubangamu.

⁴² Ku lunaku olwairirira, abantu ab'e Shekemu baaja mu nimiro. Ekyo abantu baakikobera Abimeleki.

⁴³ Agho yaatwala abasaadha be, yaabagabania mu bikunsu bisatu, beeteega. Bwe yabona abantu nga bafuluma mu kibuga, yaabazinduukiriza yaabaita.

⁴⁴ Abimeleki n'ab'omu kikunsu ekyali naye, baaziinhuuka, baaja okukuuma omulyango ogw'ekibuga. Mu kiseera n'ekirala, ab'omu bikunsu bire ebibiri ebindi, baalumba abantu abaali mu nimiro, baabaita boonaboona.

⁴⁵ Abimeleki yaamala olunaku olwo lwonalwona ng'ali kulwanisa ekibuga ekyo. Yaakigema, yaita abantu baamu, era yaakimenhamenha, yaakimansiramu omuunhu.

⁴⁶ Abantu boonaboona abaali mu munaala ogw'e Shekemu bwe baawulira ekyo, baaja baingira mu kifo eky'okwewogomamu mu isabo lya Eliberithi.

⁴⁷ Abantu baakobera Abimeleki bati abantu bale boonaboona beesololeiza omwo.

⁴⁸ Agho yaaniinaniina, yaaja ku lusozi Zalumoni n'abasaadha be. Yaagema empasa, yaatema omuganda gw'ensaga ku muti, yaaguta ku ibega lye. Yaalagira abasaadha be bangughe, boona bakole nga bw'akoze.

⁴⁹ Agho kiisi muntu yaatema omuganda gw'ensaga ku muti, yaanonereza Abimeleki. Baabunga ensaga edho mu kifo eky'okwewogomamu kire, baakikumaku omuliro. Olwo abantu boonaboona abaali mu munaala ogw'e Shekemu, boona baafa, abasaadha n'abakazi nga baghera ng'oti lukumi (1,000).

⁵⁰ Agho Abimeleki yaaja mu kibuga Thebezi, yaakizingiza okukyezunguluza, era yaakinhaga.

⁵¹ Ekibuga ekyo kyalimu ekimante ekigumu einho. Kale abantu boonaboona ab'omu kibuga, abasaadha n'abakazi, baalumukira omwo beesibiramu, era baaniina ku kasolya.

⁵² Abimeleki bwe yaja okulumba ekimante ekigumu ekyo, yaaseeta gha mulyango gwakyo okukikumaku omuliro.

⁵³ Aye omukazi yaasuula enso ey'oku lubengo ku mutwe gw'Abimeleki, yaamwawula ekighanga.

⁵⁴ Agho Abimeleki yaayangugha okweta omwisuka eyamugemeranga eby'okulwanisa bye, yaamulagira ati: “Sowolayo empiima yo ondhite, abantu balobenga kundhogeraku bati mukazi n'eyandhita.” Kale omwisuka yaamufumita yaafa.

⁵⁵ Abaisiraeli bwe baabona nga Abimeleki afiire, bairayo ewaibwe boonaboona.

⁵⁶ Mu nsambo eyo, Katonda yeesasuuliza ku Abimeleki olw'omusango gwe yaiza ku ise ng'aita baganda be ensanvu.

⁵⁷ Katonda era yaabonereza abantu b'omu Shekemu olw'ekibi kyaibwe. Ni Yothamu, mutabane wa Gideoni, kye yakolima kyatuukirira.