Abalamuzi 8 - Baibuli Ekibono kya Katonda 2014

Abamidia baghangulirwa irala

¹ Agho abasaadha b'Efuraimu baakoba Gideoni bati: “Lwaki watubisa otyo, n'otatwetaku ng'oja okulwanisa Abamidia?” Baamunenia inho n'amaani.

² Aye yaabakoba ati: “Kye nakola kitono inho, bw'okigerangerania n'ekyo imwe kye mukoze. Imwe abantu aba Efuraimu kye mukoze, kisinga ghala ekyo ife ab'endhu ya Abiezeri kye tukoze.

³ Kuba imwe Katonda abaghaire okwita abalangira ababiri, Orebu ni Zeebu, ab'e Midia. Aye nze katyo nkoze ki ekyagayaga n'ekyo?” Bwe yamala okwogera ebyo obusungu bwabawaaku.

⁴ Agho Gideoni n'abasaadha be ebikumi ebisatu baatuuka ku mwiga Yorudani, baagusomoka nga bakoowu, aye baasigala nga bakaabingirira omuzigu.

⁵ Bwe yatuuka e Sukkothi, Gideoni yaakoba abantu baayo ati: “Mbeeghembye mugheeku abasaadha bange ku mere, kuba bakoowu, ate nga ndi kubingirira bakyabazinga, Zeba ni Zalumunna, ab'e Midia.”

⁶ Aye abakulembeze ab'omu Sukkothi baababuuza bati: “Obwo abalwani bo bamaze okugema Zeba ni Zalumunna, memale olwo ife tubaghe emere?”

⁷ Gideoni yaakoba ati: “Kale, Musengwa Katonda bw'anaamala okuta Zeba ni Zalumunna mu ngalo dhange, ndidha kubakubisa amawa n'enkandwa eby'omu irungu.”

⁸ Gideoni olwava agho, yaaja e Penueli, era yaasaba abantu baayo ekintu n'ekirala. Aye ab'omu Penueli baamwiramu mu nsambo n'endala ng'oti n'ab'omu Sukkothi.

⁹ Agho yaakoba abaayo ati: “Bwe ndiira kabiri nga ndi mu miraala, ndimenhamenha omunaala gwaimwe ogwo.”

¹⁰ Zeba ni Zalumunna baali nga bali mu Karikori n'eigye lyaibwe. Ku igye eryo lyonalyona ery'abantu ab'e buvandhuba, kwali nga kukaasigaireku abalwani omutwalo mulala n'enkumi itaanu (15,000). Abalwani emitwalo ikumi n'ebiri (120,000) baali nga bamaze okwitibwa.

¹¹ Gideoni yaagema engira ey'e buvandhuba bw'e Noba n'e Yogubeha, yaalumba eigye eryo nga tirimwetegekeire.

¹² Bakyabazinga bombi Abamidia, Zeba ni Zalumunna, baalumuka. Aye Gideoni yaababingirira, yaabagema, era yaaleetera eigye lyaibwe lyonalyona okutabukatabuka.

¹³ Gideoni bweyali ng'ali kwira okuva mu lutalo, ng'ali kubitira mu Heresi,

¹⁴ yaagema omwisuka ow'e Sukkothi. Yaabaaku ni by'amubuuza. Omwisuka yaaghandiikira Gideoni amaina nsanvu na musanvu, ag'abakungu n'abakulembeze mu Sukkothi.

¹⁵ Agho Gideoni yaaja y'abantu b'omu Sukkothi yaabakoba ati: “Mubone Zeba ni Zalumunna, be mwavaaku okuunumya nga mukoba muti, ‘Obwo abalwani bo bamaze okugema Zeba ni Zalumunna, memale olwo ife tughe abalwani bo abo abakoowu emere?’ ”

¹⁶ Agho yaagema amawa n'enkandwa eby'omu irungu, yaabonereza abakulembeze ab'omu kibuga ekyo Sukkothi.

¹⁷ Era yaamenhamenha omunaala gw'omu kibuga Penueli, yaita n'abasaadha baamu.

¹⁸ Agho Gideoni yaabuuza Zeba ni Zalumunna ati: “Abasaadha be mwaitira e Tabori baali bafaanana batya?” Bale bamwiramu bati: “Baali bafaanana n'iwe, nga buli muntu ali ng'oti n'omwana wa kyabazinga.”

¹⁹ Gideoni yaakoba ati: “Abo baali baganda bange, abaana ba maama beene. Ndayira Musengwa Katonda omulamu nti ngoli timwabaita, mwena tinandibaise.”

²⁰ Agho yaakoba mutabane we omuberi, Yetheri, ati: “Situka, obaite!” Aye omwisuka oyo yaaloba kusowolayo mpiima ye. Yatya, kuba yali akaali mulenzi bulenzi.

²¹ Agho Zeba ni Zalumunna baakoba Gideoni bati: “Iwe mwene, niiwe obe otwite, kuba ekikolwa ng'oti n'ekyo, kikolebwa musaadha!” Gideoni yaasituka, yaita Zeba ni Zalumunna era yaatwala ebyamadholobera ebyali mu nkoto dh'engamiya dhaibwe, nga byakolebwa mu kifaananie ekiri ng'oti mwezi nga gwakaboneka.

²² Agho Abaisiraeli baakoba Gideoni bati: “Tufugenga, iwe mwene, ni batabane bo, n'abaidhukulu bo, kuba otuwoniiza Abamidia.”

²³ Gideoni yaabairamu ati: “Nze tija kubafuganga, waire mutabane wange. Musengwa Katonda n'anaabafuganga.”

²⁴ Aye yaabakoba ati: “Ka mbasabe kino: kiisi muntu ampe empeta edh'omu matu dhe yanhaga.” Kuba Abamidia baavaalanga empeta dh'omu matu edha zaabu ng'oti n'Abaishimaeli abandi boonaboona.

²⁵ Bale bairamu bati: “Twidha kuba basangaavu okudhikugha.” Baayalagho olugoye, kiisi muntu yaata okwo empeta dh'omu matu dhe yanhaga.

²⁶ Empeta dhe yafuna dhaazitogha kilo kumpi amakumi abiri, nga tobaliireeku byamadholobera byakolebwa mu bifaananie ebiri ng'oti mwezi ogwakaboneka, n'ebinhere eby'omu nkoto, n'engoye dha nakasooma bakyabazinga ab'e Midia dhe baali nga bavaire, n'endhegere edhaali mu nkoto edh'engamiya dhaibwe.

²⁷ Gideoni yaakola mu zaabu oyo ekisinzibwa ekitali Katonda, yaakita mu kibuga kye ekiri mu Ofura. Abaisiraeli boonaboona baava ku Katonda, baajangayo okukisinza, kyafuuka omutego eri Gideoni n'ab'omu maka ge.

²⁸ Kale Isiraeli yaaghangula Abamidia, era Abamidia abo baaloba kwiramu kabiri kubeeraliikiriza. Ensi yaabaamu emiraala okumala emyaka amakumi ana, okutuusa Gideoni bwe yafa.

Gideoni afa

²⁹ Yerubbaali, oyo nga ni Gideoni mutabane wa Yoashi, yairayo mu maka ge, yaaba eyo.

³⁰ Yaazaala abaana ab'obulenzi nsanvu, kuba yali n'abakazi kamaala.

³¹ Era yali n'omukazi ow'embali eyali e Shekemu. Yeena yaamuzaalira omwana ow'obulenzi, yaamutuuma eriina Abimeleki.

³² Agho Gideoni mutabane wa Yoashi yaafa ng'akairiighe inho yaawola n'okuwola. Baamuziika mu lwambiidhi lwa lata we Yoashi, mu Ofura, ekibuga ekya Ababiezeri.

³³ Gideoni nga yaakafa, Abaisiraeli baakyuka kabiri, bairamu obutaba beesigwa ye Katonda. Baasinzanga Baali, era baafuula Baali Berithi okuba omusambwa gwaibwe.

³⁴ Baalekera okusinza Musengwa Katonda waibwe, eyabawonia abazigu baibwe boonaboona abaali babeezungulwire.

³⁵ Era baaloba kuba basiimu naire y'ab'endhu ya Gideoni, olw'ebirungi byonabyona bye yakolera Isiraeli.