Abalamuzi 7 - Baibuli Ekibono kya Katonda 2014

Gideoni aghangula Abamidia

¹ Agho Yerubbaali, oyo nga ni Gideoni, n'abantu abaali naye boonaboona, baazuuka ku nkyo, baasimba weema dhaibwe kumpi n'akaiga akeetebwa Horidi. Weema edh'Abamidia nga dhibali ku luuyi olw'omukono omugooda olw'e buvandhuba, mu kiiko ekiri ku mbali kw'olusozi More.

² Musengwa Katonda yaakoba Gideoni ati: “Abantu abali n'iwe babitiriire obungi, nze okubagha okughangula Abamidia, kuba baghanga okuneesuutiraku nga bakoba bati baghangwire lwa maani gaibwe.

³ Mpegaano ni, langirira mu bantu oti, ‘Kiisi awulira ng'atya era ng'adhugumira, aireyo ewaibwe.’ ” Kale Gideoni yaabaleba atyo, era abantu emitwalo ebiri n'enkumi ibiri (22,000) bairayo ewaibwe. Abantu omutwalo mulala (10,000) n'abaasigala.

⁴ Agho Musengwa Katonda yaakoba Gideoni ati: “Abantu bakaabitiriire okuba abangi. Baserengese ku maadhi nje mbalebe, mbakulonderemu eyo. Oyo ye nnaakoba nti aidha kuja n'iwe, n'aidha okuja n'iwe. Ate ye nnaakoba taaje n'iwe, taidha kuja n'iwe.”

⁵ Kale Gideoni yaaserengesa abantu ku maadhi. Musengwa Katonda yaamukoba ati: “Yawula abantu abo boonaboona abakomba amaadhi n'olulimi ng'oti n'embwa bw'ekomba, bave mu bale abamala okukuba amakiryaivu memale ni banhwa amaadhi.”

⁶ Abaasena amaadhi mu ngalo dhaibwe ni bagakomba n'olulimi, baali ebikumi bisatu (300). Abaasigalagho boonaboona baakuba amakiryaivu memale baanhwa amaadhi.

⁷ Agho Musengwa Katonda yaakoba Gideoni ati: “Ndidha kubanunula nga nkozesa abasaadha abo ebikumi ebisatu abakombye amaadhi, nkughe okughangula Abamidia. Abandi boonaboona, bakobe buli muntu aireyo ewaibwe.”

⁸ Kale Gideoni yaasindika Abaisiraeli boonaboona bairayo ewaibwe, okutoolaku bale ebikumi ebisatu, be yasigala nabo, ni basigaza eby'okulya byonabyona n'amagwala. Weema edh'Abamidia dhaali nga dhibali ghansi mu kiiko.

⁹ Mu bwire obwo, Musengwa Katonda yaakoba Gideoni ati: “Situka, oje olumbe Abamidia mu weema dhaibwe mbakughaire obaghangule.

¹⁰ Aye oba nga oli kutya okulumba, serengetayo n'omugheereza wo Pura.

¹¹ Oidha kuwulira bye bali kwogera, olwo ofune amaani okubalumba mu weema dhaibwe.” Agho Gideoni yaaserengeta n'omugheereza we Pura ku mbali kw'eweema dh'abazigu.

¹² Abamidia, n'Abamaleki, n'abatyamye b'e buvandhuba, baali nga bamaze okwidhula woonawoona mu kiiko. Nga bali kamaala ng'oti nzige, era nga engamiya dhe bali nadho tidhibalika ng'oti n'omusenho ku bukalu bw'enhandha.

¹³ Gideoni bwe yatuukayo, yaawulira omusaadha ng'ali kukobera mwine ekirooto, ati: “Naloose omugaati gwa sayiri nga guli kugwa mu kifo Abamidia ghe basimbye weema dhaibwe. Gwatuuka ku weema gwagikuba yaagwa, yaagalaamirira era yeeyala ku itaka.”

¹⁴ Mwine yaamwiramu ati: “Eyo n'empiima ya Gideoni, mutabane wa Yoashi, Omuisiraeli! Ghazira kindi kabiri ekyo kye kisobola kutegeeza. Katonda amughaire okughangula ensi Midia n'eigye lyaife lyonalyona.”

¹⁵ Gideoni bwe yawulira ekirooto ky'omusaadha oyo n'amakulu gaakyo, yaasinza Katonda. Era yairayo ku weema dh'Abaisiraeli, yaabakoba ati: “Musituke! Musengwa Katonda abaghaire okughangula eigye ly'e Midia.”

¹⁶ Agho yaagabaniamu abasaadha be ebikumi ebisatu (300) mu bikunsu bisatu. Kiisi musaadha yaamugemya eigwala n'ensuwa enkalu, ng'erimu engada edhiri kwaka.

¹⁷ Yaabakoba ati: “Bwe nnaatuuka ku mbali kw'ekifo aghasimbiibwa weema, mwidha kuuningirira. Kye nnaakola, mwena kye mwidha okukola.

¹⁸ Nze ghalala ni be naaba nabo boonaboona bwe tunaafuuwa endeka dhaife, olwo mwena mwidha kufuuwa edhaimwe woonawoona okwezunguluza ekifo ekyo aghasimbiibwa weema. Era mwidha kwasiikana muti, ‘Ku lwa Musengwa Katonda ni ku lwa Gideoni!’ ”

¹⁹ Agho Gideoni n'abasaadha kikumi abaali naye, baatuuka ku mbali kw'ekifo aghaasimbibwa weema. Baatuukayo agho kumpi mu bwire ghagati, ng'abakuumi baakamalanga okukyusibwa. Agho baafuuwa amagwala gaibwe, era baamenha n'ensuwa dhe baali bagemye.

²⁰ N'ebikunsu bire ebindi ebibiri byakola bityo. Boonaboona baagema engada edhiri kwaka mu mikono gyaibwe emigooda, n'amagwala mu mikono gyaibwe emisaadha. Era baayasiikana bati: “Empiima ya Musengwa Katonda era ya Gideoni!”

²¹ Kiisi muntu yaayemerera mu kifo kye okwezunguluza ekifo ekyo aghaasimbibwa weema. Ab'eigye lyonalyona ery'omuzigu baalumuka nga baasiikana.

²² Abasaadha ba Gideoni bwe baafuuwa endeka dhaibwe ebikumi ebisatu, Musengwa Katonda yaaleetera ab'eigye ery'omuzigu buli muntu okulumba mwine, buli muntu ng'alwanisa mwine n'empiima. Baalumuka okutuuka e Bethi Shitta okwolekera Zerera, okutuuka ku nsalosalo ni Abeli Mehola, okumpi n'e Tabbathi.

²³ Agho abasaadha Abaisiraeli baayetebwa okuva mu kika ekya Nafutali, n'ekya Asheri, n'ekya Manasse kyonakyona, baidha baabingirira Abamidia.

²⁴ Gideoni yaatuma abakwenda mu kiketezo kyonakyona ekya Efuraimu eky'ensozi, yaabakoba ati: “Muserengete ghansi mulwanise Abamidia. Muzingize, mugeme omwiga Yorudani n'ebiketezo ebindi eby'amaadhi okutuuka e Bethibara.” Kale ab'ekika kya Efuraimu baayetebwa, baidha baagema omwiga Yorudani n'ebiketezo ebindi eby'amaadhi.

²⁵ Baagema abalangira b'e Midia ababiri, Orebu ni Zeebu. Baitira Orebu ku lubaale olwetebwa olwa Orebu, ni Zeebu baamwitira ku kikunhiro ky'omwenge gw'emizabbibu ekyetebwa ekya Zeebu. Omutwe gwa Orebu n'ogwa Zeebu baagitwalira Gideoni ere ng'osomoike Yorudani.