Abalamuzi 5 - Baibuli Ekibono kya Katonda 2014

Olwembo lwa Debora ni Baraki

¹ Agho ku lunaku olwo, Debora ni Baraki mutabane wa Abinoamu, baayemba olwembo luno bati:

² Musaake Musengwa Katonda, kuba abakulembeze mu Isiraeli baali bamalirivu okulwana, n'abantu beeghaayo ekyeyendere!

³ Muwulire imwe bakyabazinga, mutege amatu imwe abafuzi; ndidha kwembera Musengwa Katonda, Katonda wa Isiraeli, olwembo.

⁴ Wo Musengwa Katonda, bwe wava mu Seiri, n'ova mu kiketezo eky'e Edomu, ensi yatengeeta n'eigulu lyagwisa amaadhi. Bwenebwene amaadhi gaafukumuka okuva mu bire.

⁵ Musisi yatengeesa ensozi mu maiso ga Musengwa Katonda ow'e Sinai, Musengwa Katonda oyo Katonda owa Isiraeli.

⁶ Mu byanda bya Shamugari mutabane wa Anathi, mu biseera bya Yaeli, ababise baalekera okubita mu nguudo, n'abatambuze baabitanga eyo mu masokolosokolo.

⁷ Ebyalo byawaamu abantu byawolongera, okutuusa iwe Debora lwe waidha, nga inhina wa Isiraeli.

⁸ Abaisiraeli bwe baalondagho okusinza bakatonda abayaaka, olwo ghaabaagho olutalo mu Isiraeli. Mu basaadha emitwalo ena (40,000) mu Isiraeli, ghaabulagho eyagemaku ku ngabo oba ku ifumo mu ngalo dhe.

⁹ Ndi musangaavu olw'abaduumizi ba Isiraeli, abantu abo abeeghaayo ekyeyendere. Musaake Musengwa Katonda!

¹⁰ Mukighayeeku imwe abatyama ku ndogoyi edh'erangi, imwe abatyama ku bisampa eby'omughendo einho, n'imwe abatambula mu ngira.

¹¹ Muwulire amamiro ag'abali ku nsulo edh'amaadhi. Boogera ku bughanguzi Musengwa Katonda bwe yagha Isiraeli. Agho abantu ba Musengwa Katonda baatambuza maani, okuja ku miryango gy'ebibuga byaibwe.

¹² Zuuka, zuuka Debora, situka oyembe olwembo! Zuuka Baraki mutabane wa Abinoamu, twala abo be wanhaga.

¹³ Agho abakungu abaawonagho baatambuza maani; abantu ba Musengwa Katonda baidha y'ali okulwanisa ab'amaani.

¹⁴ Baava mu Efuraimu baaja mu kiiko, nga banonereza abantu ab'ekika kya Benjamini. Abaduumizi baava mu Makiri, ate abakulu b'abalwani baava mu Zebuluni.

¹⁵ Abakulembeze ba Issakari baidha ni Debora, nga baisa kirala ni Baraki, baamunonereza mu kiiko. Aye ab'ekika kya Reubeni beesalamu, baaloba kusalagho oba banaaja.

¹⁶ Kiki ekyabasigaza einhuma mu bigo by'entaama, okuwulirisa obuleetu bwe bafuuyira entaama okudheeta? Ab'ekika kya Reubeni beesalamu, baaloba kusalagho oba banaaja.

¹⁷ Ab'ekika kya Gadi baasigala ere ng'osomoike Yorudani. Ab'ekika kya Dani, kiki ekyabasigaza mu maato? Ab'ekika kya Asheri baaba ku bukalu bw'enhandha nga basiriike, beesigalira ku myalo.

¹⁸ Aye ab'ekika kya Zebuluni baaghaayo obulamu okufiira mu lutalo, n'ab'ekika kya Nafutali baaguma okulwana olutalo.

¹⁹ Bakyabazinga baidha baalwana, bakyabazinga ab'e Kanaani baalwanira e Tanaka ku maadhi g'e Megiddo, aye baaloba kufunayo munhago gwa mpiiya.

²⁰ Emuunienie dhaalwanira ku igulu, dhaalwanisa Sisera nga dhiri mu ngira dhaadho.

²¹ Omwidhuzo ogw'omu mwiga Kishoni gwabaghalabania, gwabayoolookeraku gwabeeyaagho. Nze ndidha kutambuza maani, nga tiira inhuma!

²² Agho embalaasi dhaidha nga dhiri kuduma, ng'ebinuulo byadho biri kubbagalya ku itaka.

²³ Malaika wa Musengwa Katonda akoba ati: “Mukolimire Merozi, mukolimire inho abatyamye baamu; kuba tibaidha kubeeraku Musengwa Katonda, mu kulwanisa ab'amaani.”

²⁴ Abakazi boonaboona abasula mu weema, Yaeli muka Heberi Omukeni n'abasinga okuba ow'enkabi.

²⁵ Sisera yasaba maadhi, aye Yaeli yaamugha mata, yaamugheera amata amasunde mu kibya eky'ekikungu.

²⁶ Yaagema ekikondo ky'eweema mu mukono gwe ogundi, yaagema n'enhundo mu mukono gwe gundi. Yaakomerera Sisera enkondo yaamutulisa omutwe enkondo yaafuwula mu kyeni kya Sisera oyo.

²⁷ Sisera yagangalima agho gha bigere bya Yaeli nga tiyeesegenhia; yaagwa agho gha bigere bya Yaeli yaagalaamirira yaasigala agho gh'agwire, nga mufu.

²⁸ Inhina wa Sisera yaalengeza mu idinisa, yaalingirira inho mu katimba kaamu. Yabuuza ati, “Lwaki embalaasi dhe tidhiize mangu? Lwaki ekigaali kye eky'omu lutalo kirwiregho okwira?”

²⁹ Abakazi ba inhina wa Sisera oyo abasinga kuba bagezi bamwiramu, nkani yeiramu mwene ati,

³⁰ “Bakaayagaaza munhago, na ngeri yakugugabanamu: kiisi musaadha afuneku omughala mulala oba babiri, engoye enungi dha Sisera, zeena nfuneyo ebinhere eby'omu nkoto ebidholige.”

³¹ “Wo Musengwa Katonda, abazigu bo batyo bwe bagwaniire okuzikiriranga boonaboona. Aye abakugonza boonaboona bagwaniire kumesunkananga, ng'oti n'endhuba eri kuvaayo.” Agho ensi yaabaamu emiraala okumala emyaka amakumi ana.