Abalamuzi 4 - Baibuli Ekibono kya Katonda 2014

Debora omulamuzi ni Baraki

¹ Ehudi bwe yamala okufa, Abaisiraeli bairamu kabiri okwonoona ye Musengwa Katonda.

² Agho yaabaleka baaghangulwa kyabazinga Yabini ow'e Kanaani, eyafugiranga mu kibuga Hazori. Omuduumizi w'eigye lye yali nga ni Sisera, ng'aba mu Haroshethi Hagoyiimu.

³ Yabini yali n'ebigaali lwenda eby'omu lutalo eby'ekyuma ekigumu einho. Era yafuga Abaisiraeli ng'abatuntuza n'obukambwe, okumala emyaka amakumi abiri. Agho Abaisiraeli baalirira Musengwa Katonda ababeere.

⁴ Mu biseera ebyo, Debora muka Lappidothi yali mulanzi era nga mulamuzi wa Baisiraeli.

⁵ Yaatyamanga ghansi mu muti omunaazi ogwayetebwanga ogwa Debora, ogwalinga ghagati gha Rama ni Betheli, mu kiketezo eky'ensozi ekya Efuraimu. Abaisiraeli baajanga eyo y'ali okubasalira emisango.

⁶ Agho yaatumisa Baraki mutabane wa Abinoamu ow'omu kibuga Kadeshi eky'e Nafutali. Yaamukoba ati: “Musengwa Katonda, Katonda wa Isiraeli, akulagiire ati, ‘Twala abasaadha omutwalo mulala ku b'ekika kya Nafutali n'ekya Zebuluni, mwesolokeze ku lusozi Tabori.

⁷ Ndidha kuleeta Sisera omuduumizi w'eigye lya Yabini, aidhe akulwanise ku mwiga Kishoni. Aidha kwidha n'ebigaali bye eby'omu lutalo n'abaisirukale be, aye ndidha kukugha okumughangula.’ ”

⁸ Baraki yaamukoba ati: “Iwe bw'onaaja ninze, zeena ndidha kuja. Aye bw'otaaje ninze, zeena tiidha kuja.”

⁹ Debora yaamwiramu ati: “Bwenebwene ndidha kuja n'iwe. Aye ekitiibwa eky'obughanguzi tikiidha kuba kikyo, kuba Musengwa Katonda aidha kughaayo Sisera aghangulwe omukazi.” Agho Debora yaasituka, yaaja ni Baraki e Kedeshi.

¹⁰ Baraki yaayeta ab'ekika kya Nafutali n'ekya Zebuluni. Agho abasaadha omutwalo mulala baamunonereza, ni Debora yeena yaaja naye.

¹¹ Mu kiseera ekyo, Heberi Omukeni yali yeeyawire ku Bakeni baine, baidhukulu ba Hobabu mwanhina muka Musa. Era yali ng'amaze okusimba weema ye aghali omuti omukologho mu Zonannimu, okumpi n'e Kedeshi.

¹² Abantu baakobera Sisera bati, Baraki aniinie ku lusozi Tabori.

¹³ Sisera yaayetesa ebigaali bye eby'omu lutalo olwenda (900) eby'ekyuma ekigumu einho n'abasaadha be boonaboona abaali naye. Baava e Haroshethi Hagoyiimu, baaja ku mwiga Kishoni.

¹⁴ Debora yaakoba Baraki ati: “Situkiramu, oje. Musengwa Katonda akukulembeiremu. Olwaleero akughaire okughangula Sisera.” Agho Baraki yaaserengeta olusozi Tabori, ghalala n'abasaadha be omutwalo omulala.

¹⁵ Baraki bwe yalumba Sisera, Musengwa Katonda yaavuyavuya Sisera oyo ghalala n'ebigaali bye byonabyona eby'omu lutalo, n'eigye lye lyonalyona. Sisera yaava ku kigaali kye eky'omu lutalo, yaalumuka na bigere.

¹⁶ Baraki yaabingirira eigye lya Sisera ghalala n'ebigaali byalyo eby'omu lutalo okutuuka mu Haroshethi Hagoyiimu. Eigye eryo lyonalyona lyaitibwa. Ghaaloba kusigalagho muntu waire omulala.

¹⁷ Aye Sisera yaalumuka na bigere, yaatuuka ku weema ya Yaeli muka Heberi Omukeni kuba ghaaligho emiraala ghagati gha kyabazinga Yabini ow'e Hazori n'ab'endhu ya Heberi.

¹⁸ Yaeli yaafuluma mu weema ye, yaaja okusangaaza Sisera. Yaamukoba ati: “Musengwa Katonda wange, ingira.” Sisera yaingira mu weema. Yaeli yaamubwikaku ekigoye okumukweka.

¹⁹ Sisera yaamukoba ati: “Nkweghembye mpa ku maadhi nhweku, kuba ndi ndiwo.” Yaeli yaasibula ensawo ey'oluwu omuba amata, yaamugha yaanhwa. Kabiri yaamubwikaku ekigoye.

²⁰ Sisera yaakoba Yaeli ati: “Yemerera ku mulyango gwa weema. Bwe ghabaagho aidha n'akubuuza ati, ‘Ghaligho omuntu yeenayeena ali muno?’ Koba oti, ‘Busa.’ ”

²¹ Aye Yaeli yaagema enkondo ey'eweema n'enhundo, yaaseeta y'ali ng'adhooma, yaamukomerera enkondo eyo mu kyeni, yabitamu yaatuuka ni ku itaka. Mu nsambo eyo Sisera yaafa.

²² Baraki bwe yaidha ng'ali kubingirira Sisera, Yaeli yaafuluma okumusangaaza. Yaamukoba ati: “Idha nkulage omusaadha y'oli kunoonia.” Agho Baraki yaingira naye, yaayagaana Sisera ng'agalaamiriire ku itaka, mufu, era nga bamukomereire enkondo mu kyeni.

²³ Kale ku lunaku olwo, Katonda yaagha Abaisiraeli okughangula kyabazinga Yabini ow'e Kanaani.

²⁴ Abaisiraeli beeyongera okumunhigiriza okutuusa lwe baamuzikiriza.