Abalamuzi 3 - Baibuli Ekibono kya Katonda 2014

Amaghanga agaasigala mu nsi eyo

¹ Kale Musengwa Katonda yaaleka amaghanga agandi gaasigala mu nsi eyo, okuleba Abaisiraeli abataabona ku ntalo edhaali e Kanaani.

² Ekyo yakikola ng'ayenda okwegeresa Abaisiraeli aba buli luse eby'entalo, okusingira irala abo abaali nga tibabangaku mu lutalo.

³ Abantu abaalekebwa mu nsi eyo ni bano: abantu ab'omu bibuga eby'Abafilisiti ebitaanu n'abafuzi baibwe, n'Abakanaani boonaboona, n'Abasidoni, n'Abahivi abatyamye b'omu nsozi dh'omu Lebanoni, okuva ku lusozi Baali Herimoni okutuuka gh'oingirira e Hamathi.

⁴ Abo Musengwa Katonda be yali ab'okweyambisa okuleba Abaisiraeli, okubona oba nga banaawuliranga ebiragiro bya Musengwa Katonda, bye yalagira badhaadha baibwe ng'abita mu Musa.

⁵ Kale Abaisiraeli baabanga mu Bakanaani, ni mu Bahitti, ni mu Bamori, ni mu Baperizzi, ni mu Bahivi, ni mu Bayebusi.

⁶ Agho baafumbirwanga abakazi okuva mu bantu abo, era baaghangayo baghala baibwe okufumbirwa mu bantu abo. Era baasinzanga emisambwa egy'abantu abo.

Othinieli omulamuzi

⁷ Agho Abaisiraeli beerabira Musengwa Katonda waibwe. Baayonoona y'ali, nga basinza emisambwa Baali ni Ashera.

⁸ Kale obusungu bwa Musengwa Katonda bwatumbukira ku Baisiraeli ng'oti muliro, yaaleka kyabazinga Kushani Rishathaimu ow'e Mesopotamia yaabaghangula era yaabafuga okumala emyaka munaana.

⁹ Aye Abaisiraeli bwe baalirira Musengwa Katonda, Musengwa Katonda yaabateeragho omuntu eyabanunula, nga ni Othinieli mutabane wa Kenazi. Kenazi oyo nga ni muto wa Kalebu.

¹⁰ Omwoyo gwa Musengwa Katonda gwaidha ku Othinieli, yaakulembera Abaisiraeli. Yaaja okulwana olutalo ni kyabazinga Kushani Rishathaimu ow'e Mesopotamia, era Musengwa Katonda yaaleetera Othinieli oyo okughangula.

¹¹ Olwo ensi yaabaamu emiraala okumala emyaka amakumi ana. Agho Othinieli yaafa.

Ehudi omulamuzi

¹² Abaisiraeli bairamu kabiri baayonoona ye Musengwa Katonda. Kale Musengwa Katonda yaagha kyabazinga Eguloni ow'e Moabu amaani okulwanisa Abaisiraeli.

¹³ Eguloni yeeyimba n'Abammoni, n'Abamaleki, baaghangula Isiraeli, baagema ekibuga Yeriko, eky'emiti eminaazi.

¹⁴ Eguloni yaafuga Abaisiraeli okumala emyaka ikumi na munaana.

¹⁵ Aye Abaisiraeli bwe baalirira Musengwa Katonda, Musengwa Katonda oyo yaabateeragho omuntu eyabanunula, nga ni Ehudi mutabane wa Gera, ow'omu kika kya Benjamini. Ehudi oyo yali wa igooda. Agho Abaisiraeli baatuma Ehudi oyo okutwala ebirabo ye kyabazinga Eguloni ow'e Moabu.

¹⁶ Ehudi yali amaze okwekolerayo empiima endhogi ku ndhuyi dhaayo dhombi, ng'egheza sentimita ng'amakumi ataanu obuleeyi. Yaagyesiba ku kiteege eky'oku luuyi olw'omukono omusaadha, munda mu kivaalo kye.

¹⁷ Yaatwala ebirabo ye kyabazinga Eguloni ow'e Moabu. Eguloni yali musaadha mubba inho.

¹⁸ Ehudi bwe yamala okughaayo ebirabo, yaakoba abantu abaabyetwika baireyo ewaibwe.

¹⁹ Aye mwene yaakoma ku mabaale amabaadhe agaali okumpi n'e Giligali, yairayo y'Eguloni, yaakoba ati: “Isebantu kyabazinga, ndi n'obukwenda obw'okukugha mu kyama.” Agho kyabazinga yaalagira abagheereza be ati: “Mutuleke twenka.” Boonaboona baava gh'ali, baafuluma.

²⁰ Agho kyabazinga bweyali ng'atyaime yenka mu kisenge kye ekiwolu eky'okuwuumuliramu ku ngulu ku ndhu ye, Ehudi yaidha y'ali. Yaamukoba ati: “Ndi n'obukwenda bwo obuviire ye Katonda.” Kyabazinga yaasituka ku kityamo kye.

²¹ Ehudi yaakozesa omukono gwe omugooda, yaasowolayo empiima ku kiteege kye eky'oku luuyi olw'omukono omusaadha, yaagifumita kyabazinga mu mabunda.

²² Empiima yoonayoona yaamubuliramu n'ekiti kyayo, amasavu gaasemba gh'eingiriire. Ehudi yaaloba kwiwulula mpiima eyo mu mabunda ga kyabazinga. Agho obubi bwafuluma mu kyabazinga.

²³ Ehudi yaafuluma yaamwigalizaamu, endhigi yaadhisiba,

²⁴ yaaja. Abagheereza be bwe baidha ni babona ng'endhigi dh'ekisenge eky'oku ngulu ku ndhu nsibe, baadhuuba bati katyo kyabazinga alimu, aye ali kweyambaku mu kasenge ak'omunda.

²⁵ Baateegaku okumala ekiseera kye baadhuuba okuba nga kimala. Bwe baabona nga tali kwigulagho, baatoola ekisimuluzo baigulagho. Baaja okubona, nga musengwa waibwe agalaamiriire ku itaka, ng'afiire!

²⁶ Ehudi yabeibaku bwe baali nga bakaateegerera, yaabitira y'amabaale amabaadhe, yaatuuka e Seira.

²⁷ Bwe yatuuka eyo mu kiketezo eky'ensozi ekya Efuraimu, yaafuuwa endeka okweta Abaisiraeli. Yaabakulembera, baaserengeta naye okuvaayo.

²⁸ Yaabakoba ati: “Munnonereze, Musengwa Katonda abaghaire okughangula abazigu baimwe Abamoabu.” Agho baamunonereza, baaserengeta, baagema ekifo Abamoabu ghe baali ab'okusomokera omwiga Yorudani, baaloba kuganha muntu waire omulala okusomoka.

²⁹ Ku mukuzi ogwo baita abasaadha Abamoabu ab'amaani einho abaghera ng'omutwalo omulamba, ghaabulagho awonagho.

³⁰ Ku lunaku olwo Abaisiraeli baaghangula Moabu. Ensi yaabaamu emiraala okumala emyaka kinaana.

Shamugari omulamuzi

³¹ Omukulembeze eyairaku, yali ng'ayetebwa Shamugari, nga mutabane wa Anathi. Yeena yanunula Isiraeli bwe yaita Abafilisiti olukaaga (600) ng'akozesa oluti olusongovu lwe bakozesa okusindiikiriza ente okutambula.