Abalamuzi 19 - Baibuli Ekibono kya Katonda 2014

Omulevi ni mukazi we ow'embali

¹ Mu biseera ebyo, nga ghakaali kubaagho kyabazinga mu Isiraeli, ghaaligho Omulevi eyabanga eghala mu kiketezo eky'oku nsozi eky'e Efuraimu. Omulevi oyo yaafuna omukazi ow'embali mu Bethelehemu e Buyudaaya.

² Aye omukazi oyo yaasungughalira iba oyo, yaavulumuka yairayo mu ndhu ya ise mu Bethelehemu e Buyudaaya, yaaba eyo okumala emyezi ena.

³ Agho iba yaasitula, yaaja okumuwooyawooya amwize. Yaatwala omugheereza we n'endogoyi ibiri. Yaatuuka ku ndhu ya lata w'omughala. Lata w'omughala bwe yamubona, yaamusangaalira inho.

⁴ Lata w'omughala oyo, yaikirizisa mukoirume we okusigalayooku okumala enaku isatu. Kale baalya, baanhwa era baasulayo.

⁵ Ku nkyo ly'olunaku olwokuna, baasituka, beetegeka okugolola. Aye lata w'omughala yaakoba mukoirume we ati: “Mumale okulya ku kamere memale muje.”

⁶ Agho baatyama, baalya era baanhwa bombi ghalala. Lata w'omughala yaakoba mukoirume we ati: “Nkweghembye ganha osule, osanhukeku.”

⁷ Omusaadha yaasituka okugolola, aye lata w'omughala yaamupikiriza, yaasulayo kabiri.

⁸ Ku nkyo ly'olunaku olwokutaanu, yaasituka okugolola. Aye lata w'omughala yaamukoba ati: “Mala okulya ku kamere, olindeku okutuusa ebiseera nga bijiirejiireku.” Kale baalya bombi ghalala.

⁹ Omusaadha ni mukazi we, n'omugheereza we, bwe baasituka okugolola, lata w'omughala yaakoba ati: “Bona, mpegaano ebiseera biibino bijiire inho. Mbeeghemba musule. Obwire buja kuziba. Mube ghano musanhukeku. Enkyo munaawuuna buwuune, mwagolola eka.”

¹⁰ Aye omusaadha yaaloba kuganha kusula bwire bundi. Agho yaasituka yaatambula, ng'ali ni mukazi we, n'omugheereza we, n'endogoyi dhaibwe eibiri edhiriku ebintu ebityamibwaku, baatuuka agho ng'olingiriire Yebusi, ekyo nga ni Yerusalemu.

¹¹ Ghe baatuukira agho ng'olingiriire Yebusi ng'obwire bujiire inho. Agho omugheereza yaakoba musengwa we ati: “Ka tukyukire ghano mu kibuga kino eky'Abayebusi, tusule ghano.”

^12-13 Aye musengwa we yaamukoba ati: “Tituja kukyuka kusula mu kibuga kya batali Baisiraeli. Ka tubitegho tweyongereyo katono, tusule mu Gibea oba mu Rama.”

¹⁴ Kale baabita ku Yebusi, beejiira. Obwire bwabazibirira nga bali kumpi n'e Gibea mu kiketezo ky'ab'ekika kya Benjamini.

¹⁵ Baakyuka okuja okusula eyo. Baingira mu kibuga, baatyama mu luya, ghaabulagho omuntu abaingiza mu ndhu ye okubasuza.

¹⁶ Bwe baali bakaali agho, omusaadha omukaire yaidha ng'ava mu mirimo gye mu nimiro eigulo. Omusaadha oyo yali asimuka mu kiketezo eky'oku nsozi eky'e Efuraimu, aye yali ng'asenze mu Gibea, ng'abantu baamu ba kika kya Benjamini.

¹⁷ Omusaadha omukaire oyo yaja okulinga ati, ng'abona omubise ole, mu luya olw'ekibuga. Yaamukoba ati: “Ova gha? Era oja gha?”

¹⁸ Omulevi yaamwiramu ati: “Tuva Bethelehemu mu Buyudaaya, nga twirayo eka eghala mu kiketezo eky'oku nsozi eky'e Efuraimu. Aye ghazira muntu atwingiiza mu ndhu ye kutusuza.

¹⁹ Tuli n'eisubi n'eby'okulya eby'endogoyi dhaife, era twaba n'emere n'omwenge ogw'emizabbibu, ebyange, ni mukazi wange, n'omugheereza wange. Kiisi kye twetaaga tuli nakyo.”

²⁰ Omusaadha omukaire yaakoba ati: “Emiraala gibe n'imwe. Ndidha kubagha byonabyona bye mwetaaga. Mutasula mu luya.”

²¹ Agho yaabaingiza mu ndhu ye, yaagha endogoyi eby'okulya. Ni beene baanaaba ebigere, baalya era baanhwa.

²² Bwe baali nga bakaasanhuka, abasaadha ab'omu kibuga abadankaanu baazingiza endhu eyo okugyezunguluza. Baakonta ku lwigi, baakoba omusaadha omukaire mwene ndhu bati: “Fulumya omusaadha oyo aingiire mu ndhu yo, tube naye mu nsambo abasaadha ye babaamu n'abakazi mu buliri!”

²³ Omusaadha mwene ndhu yaafuluma, yaabakoba ati: “Bakagwa, mbeeghembye mutakola kiive kyaga agho. Omusaadha ono, mugeni wange. Mutakola kikolwa kya budankaanu ekyo.

²⁴ Bona, ghaligho mukazi we ni mughala wange omwegha. Ka nfulumye abo mpegaano, mubakole kyonakyona kye mwenda. Aye omusaadha ono mutamukolaku kya budankaanu kyaga agho!”

²⁵ Aye abasaadha baaloba kumuwulirisa. Kale omusaadha yaagema mukazi we yaamufulumya ye bali. Baamukaka baaba naye era baamukolaku ebintu ebibi obwire bwonabwona okutuusa enkyo. Baamuleka yaaja nga buli kukya.

²⁶ Agho obwire nga buli kukya, omukazi yaidha yaagwa agho gha mulyango gw'endhu y'omusaadha omukaire omwali iba, yaaba agho okutuusa lwe bwakyera irala.

²⁷ Iba bwe yasitukagho ku nkyo, yaigulagho olwigi ng'ayenda okugolola ewuwe. Yaja okulinga ati, ng'abona mukazi we agwire agho gha mulyango gw'endhu, emikono gye nga girikughaaniriza olwigi.

²⁸ Yaamukoba ati: “Situka tuje.” Aye ng'omukazi tali kumwiramu. Agho yaamuta ku ndogoyi, yaagolola ewuwe.

²⁹ Bwe yatuuka eka yaingira mu ndhu ye, yaatoolayo akambe, yaagema omulambo gwa mukazi we yaagusalasalamu ebitundu ikumi na bibiri, buli kika kya Isiraeli yaakigheerezaaku ekitundu.

³⁰ Agho boonaboona abaabona ekyo baakoba bati: “Ekintu ng'oti n'ekyo tikibangaghooku era tikibonebwangaku bukyanga Baisiraeli bava mu Misiri. Mukirowoozeeku, mukiteeseeku, tubone eky'okukola!”