Abalamuzi 17 - Baibuli Ekibono kya Katonda 2014

Mika akola ebintu ebyetebwa Terafimu

¹ Ghaaligho omusaadha ng'eriina lye ni Mika, eyali ow'omu kiketezo eky'e Efuraimu eky'oku nsozi.

² Yaakoba inhina ati: “Ebitundu bya feeza olukumi n'ekikumi bye baakutwalaku, n'okolima nga mpulira, ninze nabitwala era ndi nabyo.” Inhina yaamukoba ati: “Musengwa Katonda akughe enkabi mwana wange.”

³ Agho yairiza inhina ebitundu bya feeza ebyo. Inhina yaakoba ati: “Ka mpeeyo feeza ono abe wa Musengwa Katonda, ku lw'omwana wange, bamusaanuuse asiigibwe ku kifaananie ekibaadhe. Kale ni, feeza ono nja kumukwiriza.”

⁴ Agho Mika bwe yairiza inhina ebitundu bya feeza ebyo, inhina yaatoolaku ebitundu ebikumi bibiri, yaabigha omugheesi w'ebintu bya feeza, yaabaadha ekifaananie yaakisiigaku feeza oyo. Ekifaananie ekyo baakita mu ndhu ya Mika.

⁵ Omusaadha oyo Mika, yali n'eisinzizo erirye. Agho yaatunga ekivaalo eky'obwakabona era yaakola ebintu ebyetebwa terafimu. Yaayawula owundi ku batabane, yaafuuka kabona we.

⁶ Mu biseera ebyo, tighaaligho kyabazinga mu Isiraeli. Buli muntu yakolanga nga bw'abona.

⁷ Ghaaligho omwisuka Omulevi, eyali nga yasenga e Bethelehemu mu Buyudaaya.

⁸ Yaamala yaavaayo ng'ali kwagala aghandi gh'anaaba. Bwe yali ng'ali kutambula, yaatuuka ku ndhu ya Mika mu kiketezo eky'e Efuraimu eky'oku nsozi.

⁹ Mika yaamubuuza ati: “Ova gha?” Yairamu ati: “Ndi Mulevi ow'e Bethelehemu mu Buyudaaya. Ndi kwagala aghantu ghe nnaaghanga okusenga.”

¹⁰ Mika yaamukoba ati: “Ba ghano ninze, obe omughabuzi era kabona wange. Ndidha kukughanga ebitundu ikumi ebya feeza omwaka, n'eby'okuvaala, n'eby'okulya.”

¹¹ Agho omwisuka Omulevi yaikiriza okusenga ew'omusaadha oyo, era yaabeera irala ng'oti mutabane we mwene.

¹² Omusaadha oyo Mika, yaamutaagho abe kabona we, era omwisuka oyo Omulevi, yaabanga mu maka ga Mika oyo.

¹³ Agho Mika yaakoba ati: “Mpegaano nga bwendi n'Omulevi nga ni kabona wange, ndidhi nga Musengwa Katonda aidha kundeetera ebintu okunjiiranga obukalamu.”