Abalamuzi 16 - Baibuli Ekibono kya Katonda 2014

Samusoni aja e Gaza

¹ Samusoni yaaja e Gaza, yaabonayo omukazi malaaya, yaaba naye mu buliri.

² Abantu ab'e Gaza baamanha ng'ali eyo. Kale baazingiza ekifo ekyo okukyezunguluza, era baamweteega ku mulyango gw'ekibuga obwire bwonabwona ng'abasiriikiriire, baakoba mule bati: “Obwire ka bukye memale tumwite.”

³ Aye Samusoni yalambaalaku kutuusa bwa mu bwire ghagati wonka. Yaasituka, yaagema endhigi edh'omulyango ogwingira mu kibuga n'emyango gyaku gyombi, yaadhikuukulagho n'ebisiba byaku n'ebidhiriku ebindi byonabyona. Olwo yaabbeedera endhigi edho ku mabega, yaadhitwala ku ntwiko y'olusozi olulingiriire Heburoni.

Samusoni ni Delila

⁴ Ebyo bwe byawa, Samusoni yaayenda omukazi mu kiiko ky'e Soreki, ng'eriina lye ni Delila.

⁵ Agho abakungu b'Abafilisiti baaja y'omukazi oyo, baamukoba bati: “Musendesende omanhe amaani ge amangi ghe gamuva, n'ensambo yetughanga okumugemamu ni tumusiba, amaani ago ni gamuwa. Olwo buli muntu ku ife aidha kukugha ebitundu bya feeza lukumi na kikumi (1,100) .”

⁶ Agho Delila yaaja, yaakoba Samusoni ati: “Nkweghembye nkobera amaani go amangi ghe gakuva, n'engeri ole y'asobola okukugemamu n'akusiba, amaani ago ni gakuwaamu.”

⁷ Samusoni yairamu ati: “Bwe bansibisa obugugha obuyaaka omusanvu obw'akalaso, obukaali kukala, mba munafu ng'oti n'omuntu owundi yeenayeena.”

⁸ Agho abakungu b'Abafilisiti baaleetera Delila obugugha obuyaaka omusanvu obw'akalaso, obukaali kukala, yaabusibisa Samusoni.

⁹ Delila oyo era yaliyo n'abasaadha nga bateeze mu kisenge eky'omunda. Agho yaaleekaana yaamukoba ati: “Samusoni, Abafilisiti bakugwireku!” Aye Samusoni yaakutula obugugha ng'oti n'ewuuzi bwe dhikutuka ng'omuliro gudhigemye. Kale, ekyama ekigema ku maani ge kyasigala nga kikaali kumanhibwa.

¹⁰ Delila yaakoba Samusoni ati: “Bona, oli kumbuzaabuza, waaloba kunkobera kituufu. Nkweghembye nkobera ole bw'aghanga okukusiba.”

¹¹ Samusoni yaamukoba ati: “Bwe bansibisa emigugha emiyaaka egitakozesebwangaku, mba munafu ng'oti n'omuntu owundi yeenayeena.”

¹² Kale Delila yaagema emigugha emiyaaka, yaamusiba, yaamukoba ati: “Samusoni, Abafilisiti bakugwireku!” Abasaadha abaali nga beeteeze, baali mu kisenge eky'omunda. Aye Samusoni yaakutula emigugha ku mikono gye ng'oti wuuzi buwuuzi.

¹³ Delila yaakoba Samusoni ati: “N'okutuusa buti oli kumbuzaabuza, waaloba kunkobera kituufu. Nkobera ole bw'aghanga okukusiba.” Yaamukoba ati: “Bw'oluka emiganda omusanvu egy'enviiri dhange ku mutwe, n'ogikalanguza n'ekifundwa ekisibiirwa ku nkondo, mba munafu ng'oti n'omuntu owundi yeenayeena.”

¹⁴ Kale Samusoni bweyali ng'ali kutenduka, Delila yaaluka emiganda omusanvu egy'enviiri ku mutwe gwa Samusoni oyo, era yaagikalanguza n'ekifundwa ekisibiirwa ku nkondo. Agho yaamukoba ati: “Samusoni Abafilisiti bakugwireku!” Aye Samusoni yaasitukagho mu ndoolo, yaasikula ekifundwa ekisibiirwa ku nkondo, enviiri dhaasimulukuka.

¹⁵ Agho Delila yaamukoba ati: “Osobola okukoba oti onhendha, ate nga omwoyo gwo tigundiiku naire? Waakambuzaabuza buti emikuzi giigino esatu, waaloba kunkobera amaani go amangi ghe gakuva.”

¹⁶ Delila oyo yaamudeebanga buli lunaku ng'amubuuza, okutuusa Samusoni lwe yeesinwa ekibitiriire.

¹⁷ Kale yaamukobera byonabyona, ati: “Tibansalangaku nviiri ku mutwe, kuba ndi Munaziri okuviira irala mu nda ya maama. Enviiri dhange bwe badhisalaku, amaani gange ganvaaku, naaba munafu ng'oti n'omuntu owundi yeenayeena.”

¹⁸ Delila bwe yabona nga Samusoni amaze okumukobera byonabyona, yaatuma y'abakungu b'Abafilisiti okubeeta, ng'akoba ati: “Mwire ku mukuzi guno gwonka, kuba ankobeire byonabyona.” Agho baidha y'ali nga n'empiiya bali nadho mu ngalo.

¹⁹ Delila yaatenduukiriza Samusoni ng'amuleze ku mubiri, era yaayeta omusaadha yaasala emiganda omusanvu egy'enviiri dha Samusoni. Agho Delila yaatoolera okumudaazadaaza, amaani gaamuvaamu.

²⁰ Era yaamukoba ati: “Samusoni, Abafilisiti bakugwireku!” Samusoni yaasitukagho mu ndoolo, yaakoba mule ati: “Ndidha kubeenhunhunkuzaaku nje, nga bwe mbairenga nkola ku mikuzi gire egindi.” Yali taidhi nga Musengwa Katonda amulekuliire agho.

²¹ Abafilisiti baamugema, baamutundulamu amaiso. Era baamutwala e Gaza, baamusibisa endhegere edh'ekyuma eky'ekikomo, baamuta ku mulimo ogw'okuseeranga ku lubengo mu ikomera.

²² Aye enviiri dhe dhaatoolera okwiraku okumera.

Samusoni afa

²³ Abakungu b'Abafilisiti beesoloza okusagambya n'okughaayo omusengo omukologho y'omusambwa gwaibwe Dagoni, nga bakoba bati: “Omusambwa gwaife gutughaire okughangula omuzigu waife Samusoni.”

²⁴ Abantu bwe baamubona baasaaka omusambwa gwaibwe bati: “Omusambwa gwaife gutughaire okughangula omuzigu waife, eyaitaitana ensi yaife era n'atwitaku abantu kamaala.”

²⁵ Agho bwe baali nga bali kusagambya, baakoba bati: “Mwete Samusoni aidhe atusanhuseeku!” Kale baamuleeta okuva mu ikomera yaabasanhusa, baamwemereza ghagati gh'empango.

²⁶ Agho Samusoni yaakoba omwisuka eyali amugemye ku mukono, ati: “Ka ngemeku mpulire empango edhigemereire endhu eno, nsobole okudheesiiraku.”

²⁷ Endhu yali ng'ekubyeku abasaadha n'abakazi. N'abakungu boonaboona ab'Abafilisiti baali omwo. Era ghaigulu ku ngulu kwayo, kwona kwaliku abasaadha n'abakazi ng'oti enkumi isatu (3,000), abaali balingiriire Samusoni ng'ali kubasanhusa.

²⁸ Agho Samusoni yaasaba Musengwa Katonda ng'akoba ati: “Wo Musengwa Katonda wange, nkweghemba ondidhukire ompe amaani ku mukuzi guno gwonka. Olwo nsobole, mu kikolwa kino ekirala, okwesasuuliza ku Bafilisiti olw'okuntundulamu amaiso gange gombi.”

²⁹ Samusoni yaagema empango dhombi edha ghagati, edhaali dhigemereire endhu eyo, yaadhimaliraku amaani ge goonagoona, omukono gwe omusaadha yaaguta ku yindi, n'omugooda ku yindi.

³⁰ Yaakoba ati: “Ka nfiire ghalala n'Abafilisiti.” Yaasindika n'amaani ge goonagoona, endhu yaagwa ku bakungu ni ku bantu boonaboona abaali omwo. Kale, abantu Samusoni be yaita mu kufa kwe, baaba kamaala inho okusinga be yaita nga mulamu.

³¹ Agho baganda be n'ab'endhu ya ise boonaboona, baidha okutwala omulambo gwe. Baamutwala, baamuziika ghagati gh'e Zora n'e Ashitaoli, mu lwambiidhi lwa lata we Manoa. Yali akulembeire Isiraeli okumala emyaka amakumi abiri.