Abalamuzi 15 - Baibuli Ekibono kya Katonda 2014

¹ Bwe ghaabitaghooku entangama, Samusoni yaaja okukyalira mukazi we mu biseera eby'okukungula engaano, ng'amutwaliire embuzi entototo. Yaakoba ati: “Nhenda kwingira mu kisenge kya mukazi wange.” Aye lata wa mukazi we yaaloba kumuganha kwingira,

² ng'amukoba ati: “Nze nadhuuba nti bwenebwene wamukyayira irala. Kale ni, n'okumugha mwino. Aye muganda we omuto n'amusinga obulungi. Nkweghemba oyo y'obe otwale mu kifo ky'ole.”

³ Samusoni yairamu ati: “Ku mukuzi guno tiidha kubaaku musango olw'akabi ke nnaakola Abafilisiti!”

⁴ Agho yaaja, yaagema ebibe ebikumi bisatu, yaasiba bibiri bibiri emikira ghalala, yaasibira engada mu kifundwa ky'asibiisa emikira egyo.

⁵ Bwe yamala okukunaania omuliro ku ngada edho, yaalekula ebibe, byaja mu misiri gy'engaano egy'Abafilisiti. Mu nsambo eyo, yaayokya ebinhwa eby'engaano ebikungwirwa, era n'engaano ekaali kukungulwa, ghalala n'emiti emyoliva.

⁶ Agho Abafilisiti beebuuza bati: “Naani akoze kino?” Baabakoba bati: “Samusoni mukoirume w'omusaadha ow'e Timuna, n'akoze ekyo kuba omusaadha oyo yatoola muka Samusoni oyo, yaamugha mwine wa Samusoni.” Agho Abafilisiti baaja baayokya omukazi oyo n'ab'omu ndhu ya ise.

⁷ Samusoni yaakoba ati: “Mutyo bwe mukoze? Ndayira nti ndidha kumala kubeesasuulizaaku, memale ngolole.”

⁸ Agho yaabalumba n'amaani mangi, yaabaita inho. Olwo yaaja yaaba mu mpuku eri mu lwatika olw'olubaale, mu kiketezo eky'e Etamu.

Samusoni aghangula Abafilisiti

⁹ Agho Abafilisiti baaja, baasimba weema dhaibwe mu Buyudaaya, era baalumba ekibuga Lehi.

¹⁰ Abantu ab'omu Buyudaaya baababuuza bati: “Lwaki mwidhie okutulumba?” Baabairamu bati: “Twidhie okugema Samusoni tumusibe, olwo tumukole nga mwene bwe yatukola.”

¹¹ Agho abasaadha enkumi isatu (3,000) ab'e Buyudaaya, baaja ku mpuku eri mu lwatika olw'olubaale, mu kiketezo eky'e Etamu. Baakoba Samusoni bati: “Toidhi ng'Abafilisiti n'abatufuga? Kale kiki kino ky'otukoze?” Yaabairamu ati: “Abo nabakola nga beene bwe bankola.”

¹² Baamukoba bati: “Twidhie kukusiba, tukugheeyo ye bali.” Samusoni yaabakoba ati: “Mulayire muti timwidha kundhita imwe beene.”

¹³ Baakoba bati: “Tuja kukusiba busibe, tukugheeyo ye bali, aye tituja kukwita.” Kale baamusiba emigugha ebiri emiyaaka, baamutoolayo mu lubaale.

¹⁴ Bwe baamutuusa e Lehi, Abafilisiti baalumuka okuja y'ali nga baleekaana. Agho omwoyo gwa Musengwa Katonda gwamwidhaku n'amaani, emigugha egyali gimusibye amakono gyakutuka ng'oti n'ewuuzi edhookeibwa omuliro, n'ebifundwa ebyali bimusibye ku ngalo byalekula.

¹⁵ Agho Samusoni yaabona eigumba ery'oluba olw'endogoyi eyali yaakafa nga liri agho, yaalironda, yaaliitisa abasaadha lukumi (1,000).

¹⁶ Yaakoba ati: “Eigumba ery'oluba lw'endogoyi ndiitiisa abasaadha lukumi (1,000), naababunga emungo n'eigumba ery'oluba lw'endogoyi.”

¹⁷ Bwe yamala okwogera, yaasuula eigumba eryo ery'oluba olw'endogoyi. Ekifo ekyo kyatuumibwa eriina Ramathi Lehi.

¹⁸ Agho endiwo yaagema Samusoni, yaayeta Musengwa Katonda ati: “Ompaire obughanguzi buno obw'amaani. Aye obwo mpegaano nfe endiwo, era abo abatali bakekete bangeme?”

¹⁹ Agho Musengwa Katonda yaatuna ekituli eyo e Lehi, mwavaamu amaadhi. Samusoni bwe yamala okunhwa, yairamu obulamu n'amaani. Ensulo eyo baagituuma eriina Enihakkore. Era ekaaliyo e Lehi n'okutuusa mpegaano.

²⁰ Agho Samusoni yaakulembera Isiraeli okumala emyaka amakumi abiri, ng'Abafilisiti n'abafuga.