Abalamuzi 14 - Baibuli Ekibono kya Katonda 2014

Samusoni n'omughala Omufilisiti ow'e Timuna

¹ Lwali lulala, Samusoni yaaserengeta e Timuna, eyo yaabonayo omughala Omufilisiti.

² Bwe yamala okumubona, yairayo eka, yaakoba ise n'inhina ati: “Mboine omughala Omufilisiti e Timuna. Kale mumunfunire mmubayize.”

³ Aye ise n'inhina baamubuuza bati: “Lwaki oyenda okubayiza omukazi mu Bafilisiti abatali bakekete? Toghanga kufuna mukazi mu batuliku luganda, oba mu bantu baife boonaboona?” Aye Samusoni yaakoba ise ati: “Nfunira oyo, kuba ye nsiimye.”

⁴ Aye ise n'inhina baali tibaidhi nga Musengwa Katonda n'eyasindika Samusoni okukola ekyo kuba Musengwa Katonda oyo yali ali kunoonia ensonga ey'okuvaaku okulwanisa Abafilisiti. Mu biseera ebyo, Abafilisiti n'abaafuganga Isiraeli.

⁵ Agho Samusoni yaaserengeta n'ise n'inhina e Timuna. Bwe baali nga bali kubita mu masamba g'emizabbibu, yaja okuwulira ati, ng'empologoma entototo eri kumuwologomera.

⁶ Agho omwoyo gwa Musengwa Katonda gwamugha amaani, yaagiyuzaamu ghabiri ng'azira ky'akozeisa mu ngalo dhe, ng'oti n'omuntu bw'ayuzaamu embuzi ento. Aye yaaloba kukobera bazaire be ky'akoze.

⁷ Agho yaaja, yaayogera n'omughala, era yaasiima omughala oyo.

⁸ Nga ghabiseeghooku enaku, yairayo okuleeta omughala amubayize. Agho yaagonhokaku katono okuva ku ngira, aje abone empologoma ye yaita. Okuja okubona ati, nga mu mulambo gwayo mulimu omuzinga gw'endhuki n'omudheenene gwadho.

⁹ Agho yaakaagha omudheenene ogwo n'engalo dhe, yaajanga ng'alya bw'atambula. Yaaja ye ise n'inhina, yaabaghaaku baalya. Aye yaaloba kubakobera ng'omudheenene ogwo agutoire mu mulambo ogw'empologoma.

¹⁰ Ise yaaja mu maka g'omughala, era Samusoni yaakolerayo embaga, kuba abaisuka abaabayizanga, batyo bwe baakolanga.

¹¹ Abafilisiti bwe baamubona, baagheereza abaisuka amakumi asatu okuba naye nga bamukuumaku.

¹² Agho Samusoni yaabakoba ati: “Ka mbaghe ekikoiko. Bwe munaasobola okukiita ng'enaku omusanvu edh'embaga dhikaali kuwaaku, ndidha kubagha engoye empegheevu amakumi asatu, n'ebivaalo eby'oku mbaga amakumi asatu.

¹³ Aye bwe munaalemwa okukiita, niimwe omwidha okumpa engoye empegheevu amakumi asatu n'ebivaalo eby'oku mbaga amakumi asatu.” Bale baamukoba bati: “Tughe ekikoiko kyo tukiwulire.”

¹⁴ Agho yaakoba ati: “Mu kintu ekirya, mwavaamu eky'okulya. Mu kintu eky'amaani, mwavaamu ekidhuudhuula!” Enaku isatu dhaabitagho nga bakaalemereirwa okwita ekikoiko ekyo.

¹⁵ Ku lunaku olwokuna, baakoba muka Samusoni bati: “Sendasenda balo atwitire ekikoiko ekyo. Bw'otaakole otyo, twidha kukwokya iwe n'ab'endhu ya lata wo. Mwatweta okwidha ghano, kutwavughaza?”

¹⁶ Muka Samusoni yaaja ye iba ng'ali kulira, yaakoba ati: “Iwe toonhenda, onkyaye bukyaghe! Wagha ab'eighanga lyange ekikoiko, waaloba ku nkobera kye kitegeeza!” Iba yaamukoba ati: “Bona, tyakobera ni bw'aba lata oba maama, obwo iwe ye nnaakobera?”

¹⁷ Omukazi yaamuliriranga olw'ekyo buli lunaku, okumalaku enaku omusanvu edh'embaga. Aye ku lunaku olwomusanvu yaamukobera, kuba yamudeeberera inho. Omukazi yaakobera ab'eighanga lye.

¹⁸ Agho ku lunaku olwomusanvu, abasaadha ab'omu kibuga baakoba Samusoni ng'endhuba ekaali kugwa, bati: “Eriyo ekisinga omudheenene gw'endhuki okudhuudhuula? Eriyo ekisinga empologoma amaani?” Samusoni yaabairamu ati: “Ngoli timwalimisa nte yange, timwandighanze kwita kikoiko kyange.”

¹⁹ Agho omwoyo gwa Musengwa Katonda gwamwidhaku n'amaani, yaaserengeta mu Ashikeloni, yaitayo abasaadha amakumi asatu, yaabanhagaku ebintu byaibwe, ebivaalo byaibwe eby'oku mbaga yaabitwalira abasaadha abaita ekikoiko kye. Olwo yairayo mu maka ga ise ng'aliku obusungu obubitirivu.

²⁰ Agho baatoola muka Samusoni baamugha omusaadha, mwine wa Samusoni, eyalabirira Samusoni oyo ku mbaga.