Abalamuzi 13 - Baibuli Ekibono kya Katonda 2014

Okuzaalibwa kwa Samusoni

¹ Agho Abaisiraeli kabiri baayonoona ye Musengwa Katonda. Musengwa Katonda yaabaleka okufugibwa Abafilisiti okumala emyaka amakumi ana.

² Ghaaligho omusaadha, eriina lye nga ni Manoa, ow'e Zora, nga wa mu kika kya Dani. Mukazi we yali mugumba, nga tazaalangaku mwana.

³ Agho malaika wa Musengwa Katonda yaabonekera omukazi oyo, yaamukoba ati: “Oli mugumba, tozaalangaku mwana. Aye bona, oidha kutoola enda ozaale omwana mulenzi.

⁴ Weekuume olobe kunhwa ku mwenge gwa mizabbibu oba ekitamiiza kyonakyona, waire okulya ku kintu kyonakyona ekitali kirongoofu,

⁵ kuba bona, oidha kutoola enda ozaale omwana omulenzi. Omwana oyo taasalengaku nviiri ku mutwe gwe, kuba aidha kugheebwayo ye Katonda abe Munaziri okuva lw'alizaalibwa. Oyo n'alitoolera omulimo ogw'okununula isiraeli mu mikono gy'Abafilisiti.”

⁶ Agho omukazi yaaja, yaakobera iba ati: “Omuntu wa Katonda aidhie ye ndi, ng'amaiso ge gatiisa inho ng'oti ga malaika wa Katonda. Timubuuziiza y'aviiriire, era tankobeire liina lye.

⁷ Aye ankobye ati, ‘Bona, oidha kutoola enda ozaale omwana mulenzi. Kale ni otanhwanga mwenge gwa mizabbibu oba ekitamiiza kyonakyona, waire okulya ekintu kyonakyona ekitali kirongoofu kuba omwana oyo aliba Munaziri, okuva lw'alizaalibwa okutuusa lw'alifa.’ ”

⁸ Agho Manoa yaasaba Musengwa Katonda ati: “Wo Musengwa Katonda, nkweghembye leka omuntu wa Katonda ye watumye, aidhe ye tuli kabiri atwegerese kye tuli n'okukolera omwana aja okuzaalibwa.”

⁹ Katonda yaakola ekyo Manoa kye yasaba, malaika yaira kabiri y'omukazi, bweyali ng'atyaime mu nimiro. Aye iba, Manoa, tiyali naye agho.

¹⁰ Agho omukazi yaalumuka mangu, yaakobera iba ati: “Bona, omuntu ole eyaidha ye ndi ku lunaku lule, aidhie kabiri yambonekera!”

¹¹ Manoa yaasituka, yaanonereza mukazi we. Yaaja y'omuntu ole, yaamubuuza ati: “Niiwe omuntu ole eyayogera ni mukazi wange?” Ole yairamu ati: “Ninze.”

¹² Manoa yaamubuuza ati: “Ebibono bye wakoba bwe birituukirira, obulamu bw'omwana oyo buliba bwa nsambo ki, era kiki ky'aliba n'okukola?”

¹³ Malaika wa Musengwa Katonda yaamwiramu ati: “Mukazi wo yeegenderezenga okukola byonabyona bye namukoba.

¹⁴ Atalyanga kintu kyonakyona ekiva ku mizabbibu. Atanhwanga mwenge gwa mizabbibu oba ekitamiiza kyonakyona, waire okulya ekintu kyonakyona ekitali kirongoofu. Ebyo bye namulagira by'abe agemenga.”

¹⁵ Manoa yaakoba malaika wa Katonda ati: “Tukweghembye sigala ng'okaaliku n'ife, tukufumbireyo embuzi entototo.”

¹⁶ Aye malaika wa Musengwa Katonda yaamukoba ati: “Ni bwe nnaasigala nga nkaaliku n'imwe, era tiirye ku mere yaimwe. Aye bwe mwenda okutegeka ekigheebwayo ekyokebwa, mugwaniire kukigha Musengwa Katonda.” Manoa yali amukobye ebyo lwa kuba tiyategeera ng'oyo malaika wa Musengwa Katonda.

¹⁷ Manoa yaakoba malaika wa Musengwa Katonda ati: “Tukobere eriina lyo. Olwo bye wakoba bwe birituukirira, tughange okukutaamu ekitiisa.”

¹⁸ Malaika wa Musengwa Katonda yaamwiramu ati: “Lwaki ombuuza eriina lyange eryewuninkiriza?”

¹⁹ Agho Manoa yaagema embuzi entototo, n'ekigheebwayo eky'emere ey'empeke, yaabigheerayo agho ku lubaale, ye Musengwa Katonda akola ebyewuninkiriza.

²⁰ Enimi edh'omuliro bwe dhaava ku alutaari, ni dhitumbukira ghaigulu, malaika wa Musengwa Katonda yaajiira mu nnimi edho ghaigulu, nga Manoa ni mukazi we babona. Agho Manoa ni mukazi we baakuba amakiryaivu, baakutama n'ebyeni byatuuka ku itaka.

²¹ Malaika wa Musengwa Katonda tiyairayo kubabonekera kabiri. Agho Manoa yaategeera ng'oyo abaire malaika wa Musengwa Katonda.

²² Manoa yaakoba mukazi we ati: “Bwenebwene twidha kufa, kuba tuboine Katonda!”

²³ Aye mukazi we yairamu ati: “Ngoli Musengwa Katonda abaire ayenda kutwita, tiyandituganhie kumugha ekigheebwayo ekyokebwa, n'ekyo eky'emere ey'empeke. Era tiyanditwoleike bino byonabyona, waire okutukobera ebintu ng'oti n'ebyo mpegaano.”

²⁴ Agho ekiseera nga kibiseegho, omukazi yaazaala omwana mulenzi, yaamutuuma eriina Samusoni. Omwana yaakula, Musengwa Katonda yaamugha enkabi.

²⁵ Omwoyo gwa Musengwa Katonda gwatoolera okumugha amaani ng'ali ghagati gh'e Zora n'e Eshitaolo mu Mahanehedani.