Abalamuzi 12 - Baibuli Ekibono kya Katonda 2014

Yefutha n'Abaefuraimu

¹ Agho Abaefuraimu beetegeka okulwana olutalo, baasomoka omwiga Yorudani, baaja e Zafoni, baabuuza Yefutha bati: “Lwaki waja okulwanisa Abammoni, n'otatweta kuja n'iwe? Twidha kukwokera mu ndhu yo!”

² Yefutha yaabairamu ati: “Nze n'abantu bange twali n'enkaayana nnene n'Abammoni. Imwe nabeeta, aye mwaloba kwidha kubamponia.

³ Bwenabona nga timwidhie kubamponia, naaghaayo obulamu bwange, naaja okulwanisa Abammoni abo era Musengwa Katonda yampa okubaghangula. Kale, lwaki mwidhie olwaleero okuunwanisa?”

⁴ Agho Yefutha yaasoloza abasaadha boonaboona ab'e Gileadi, yaalwanisa Abaefuraimu yaabaghangula kuba Abaefuraimu baali nga bakobye bati: “Imwe Abagileadi abali mu Efuraimu ni mu Manasse, mwalumuka ku Efuraimu.”

⁵ Agho Abagileadi baagema ebifo byonabyona omwiga Yorudani ghe gusomokerwa, nga benda okulobera Abaefuraimu okulumuka. Era kiisi Muefuraimu eyagezangaku okulumuka, bwe yaidhanga n'asaba bamuganhe okusomoka, nga bamubuuza bati: “Oli Muefuraimu?” Bwe yairangamu ati: “Busa”,

⁶ olwo nga bale bamukoba akobe ati: “Shibbolethi.” Aye ole yaakoba ati: “Sibbolethi”, kuba nga tasobola kukyatula bukalamu. Olwo nga bale bamugema, nga bamwitira mu kifo omwiga Yorudani ghe gusomokerwa. Mu biseera ebyo, Abaefuraimu emitwalo ena n'enkumi ibiri (42,000) n'abaitibwa.

⁷ Yefutha yaakulembera Isiraeli okumala emyaka mukaaga. Agho yaafa, baamuziika mu kibuga kye mu Gileadi.

Ibuzani akulembera Isiraeli

⁸ Yefutha bwe yavaagho, Ibuzani ow'e Bethelehemu yaakulembera Isiraeli.

⁹ Yali ni batabane amakumi asatu, ni baghala be amakumi asatu. Yafumbiza baghala be abo mu bika ebindi, era yaatoola abaghala amakumi asatu mu bika ebindi, yaabaleeta okufumbirwa batabane. Ibuzani oyo yaakulembera Isiraeli okumala emyaka musanvu.

¹⁰ Agho yaafa, baamuziika e Bethelehemu.

Eloni akulembera Isiraeli

¹¹ Ibuzani bwe yavaagho, Eloni Omuzebuluni yaakulembera Isiraeli okumala emyaka ikumi.

¹² Agho yaafa, baamuziika mu Aiyaloni mu kiketezo ky'e Zebuluni.

Abudoni Akulembera Isiraeli

¹³ Eloni bwe yavaagho, Abudoni mutabane wa Hilleli Omupirathoni yaakulembera Isiraeli.

¹⁴ Yali ni batabane amakumi ana (40), ni baidhukulu be amakumi asatu (30), abaajiiranga ku ndogoyi nsanvu. Abudoni oyo yaakulembera Isiraeli okumala emyaka munaana.

¹⁵ Agho yaafa, baamuziika mu Pirathoni, mu nsi ya Efuraimu, mu kiketezo eky'Abamaleki eky'oku nsozi.