Abalamuzi 11 - Baibuli Ekibono kya Katonda 2014

Yefutha akulembera Abaisiraeli

¹ Yefutha yali Mugileadi omulwani ow'amaani omuzira, aye nga mutabane wa mukazi malaaya. Lata we nga ni Gileadi,

² eyali ni batabane abandi aba mukazi we. Batabane abo bwe baakula, baabinga Yefutha ghaka, nga bakoba bati: “Ghazira ky'olisika mu ndhu ya iseife, kuba oli mwana wa mukazi wundi.”

³ Agho Yefutha yaalumuka baganda be, yaaja yaabanga mu kiketezo eky'e Tobu. Ng'ali eyo, abantu abazira kye bagasa baamweyimbaku, baajanga okukambula abantu.

⁴ Nga ghabiseeghooku entangama, Abammoni baaja okulwanisa Abaisiraeli.

⁵ Agho abakulembeze mu Gileadi baaja okunonayo Yefutha mu kiketezo ky'e Tobu.

⁶ Baamukoba bati: “Idha otukulembere, tulwanise Abammoni.”

⁷ Aye Yefutha yaabairamu ati: “Timwankyagha ni muuminga mu ndhu ya lata? Lwaki mpegaano mwidha ye ndi nga muli mu buzibu?”

⁸ Abakulembeze b'omu Gileadi baakoba Yefutha bati: “Twidhie y'oli mpegaano, kuba twenda oje n'ife tulwanise Abammoni, era obe mukulembeze ow'abatyamye boonaboona mu Gileadi.”

⁹ Yefutha yaakoba ati: “Bwe munandhizaayo ewaife okulwanisa Abammoni, memale Musengwa Katonda n'ampa obughanguzi, ndidha kuba mufuzi waimwe.”

¹⁰ Bale bairamu bati: “Twikiriiza. Musengwa Katonda n'omudhulizi waife.”

¹¹ Agho Yefutha yaaja n'abakulembeze b'e Gileadi, abantu baamufuula mufuzi era mukulembeze waibwe. Yefutha yaayogera ebibono bye byonabyona mu maiso ga Musengwa Katonda e Mizipa.

¹² Agho Yefutha yaatuma abakwenda ye kyabazinga ow'Abammoni bamukobe bati: “Otuvunaana ki, ky'oviireku okulumba ensi yaife?”

¹³ Kyabazinga ow'Abammoni yairamu ati: “Abaisiraeli bwe baava e Misiri, baatwala ekiketezo eky'ensi yange, okuva ku mwiga Arunoni okutuuka ku mwiga Yabboki, ni ku mwiga Yorudani. Kale mpegaano ekiketezo ekyo mukitwirize bya bulungi.”

¹⁴ Yefutha yaatuma kabiri abakwenda ye kyabazinga ow'Abammoni ng'amukoba ati:

¹⁵ “Isiraeli tanhagangaku kiketezo kya Moabu, waire ekya Ammoni.

¹⁶ Aye ekituufu kiri kiti, Abaisiraeli bwe baava e Misiri, baabita mu irungu okutuuka ku Nhandha Emyufu, baigukira e Kadeshi.

¹⁷ Agho baatuma abakwenda ye kyabazinga ow'Edomu okumusaba abaganhe okubita mu kiketezo kye. Aye kyabazinga ow'e Edomu yaaloba kubaganha. Era Abaisiraeli baatuma abakwenda ni ye kyabazinga ow'e Moabu. Aye yeena yaaloba kubaganha. Kale, Abaisiraeli abo baasigala e Kadeshi.

¹⁸ Agho beekooloobya nga babita ku mbali kw'ekiketezo eky'e Edomu n'eky'e Moabu, baatuuka ku luuyi lw'ekiketezo eky'e Moabu olw'e buvandhuba, baasimba weema dhaibwe ku mbali kw'omwiga Arunoni. Aye tibaingira mu kiketezo kya Moabu, kuba omwiga Arunoni n'ensalosalo yaakyo.

¹⁹ Agho Abaisiraeli baatuma abakwenda ye kyabazinga w'Abamori, Sihoni ow'e Heshiboni, baamusaba abaganhe okubita mu kiketezo kye, baje mu kyaibwe.

²⁰ Aye Sihoni yaaloba kwesiga Baisiraeli kubita mu kiketezo kye. Kale yaasoloza eigye lye lyonalyona, baasimba weema dhaibwe e Yahazi, baalwanisa Abaisiraeli.

²¹ Agho Musengwa Katonda, Katonda wa Isiraeli, yaagha Abaisiraeli okughangula Sihoni n'eigye lye lyonalyona. Olwo Abaisiraeli baatwala ekiketezo kyonakyona eky'Abamori abaabanga mu nsi eyo.

²² Baatwala ekiketezo kyonakyona eky'Abamori, okuva ku Arunoni okutuuka ku Yabboki, n'okuva ku irungu okutuuka ku Yorudani.

²³ Kale ni Musengwa Katonda, Katonda wa Isiraeli, n'eyabinga Abamori mu kiketezo ekyo olw'abantu be Abaisiraeli. Obwo iwe oja kukyeiriza?

²⁴ Iwe twala ebyo byonabyona omusambwa gwo Kemoshi, bye gukugha okuba ebibyo. Aye ife twidha kutwala ebyo byonabyona Musengwa Katonda waife by'atoola ku bandi n'atugha.

²⁵ Olowooza oti niiwe osinga Balaki, mutabane wa Zippori, kyabazinga w'e Moabu? Wamuwuliraku ng'asonsooniaku Abaisiraeli, waire okubalwanisaaku?

²⁶ Isiraeli amaze entangama ya myaka ebikumi bisatu mu Heshiboni, ni mu Aroeri, n'ebyalo ebibyezungulwire, ni mu bibuga byonabyona ebiri ku mbali kw'omwiga Arunoni. Kiki ekyakulobera okubyeiriza mu kiseera ekyo?

²⁷ Kale ni ti ninze nsobiiza y'oli, aye niiwe oli kusobya ng'onwanisa. Musengwa Katonda, n'omulamuzi. Leka alamule olwaleero ghagati gh'Abaisiraeli n'Abammoni.”

²⁸ Aye kyabazinga w'Abammoni tiyafaayo ku bukwenda Yefutha bwe yamutumira.

²⁹ Agho omwoyo gwa Musengwa Katonda gwaidha ku Yefutha, yaabita mu Gileadi ni mu Manasse, yaira mu Mizipa eky'omu Gileadi, yaaja y'Abammoni.

³⁰ Yefutha yeeyama ye Musengwa Katonda ati: “Bw'olimpa okughangula Abammoni,

³¹ omuntu alisooka okufuluma mu miryango gy'endhu yange okwidha okunsangaaza nga ndhize n'obughanguzi, aliba wuwo. Ndimughaayo ng'ekigheebwayo ekyokebwa.”

³² Kale, Yefutha yaasomoka omwiga okulwanisa Abammoni, era Musengwa Katonda yaamugha okubaghangula.

³³ Yaabakuba okuva ku Aroeri okutuuka mu biketezo ebiriinaine Minnithi, ebibuga amakumi abiri, n'okutuuka ku Abeli Keramimu. Yaabaita inho. Mu nsambo eyo Abammoni baaghangulwa Abaisiraeli.

Mughala wa Yefutha

³⁴ Yefutha bwe yairayo eka mu Mizipa, yaja okulinga ati ng'abona mughala we ali kwidha okumusangaaza ng'akina era ng'akuba obugoma n'ensaasi. Oyo yali nga n'omwana wa Yefutha yenka ati. Yali azirayo mwana wundi k'abe wa bulenzi oba wa bughala, okutoolaku oyo yenka.

³⁵ Yefutha bwe yamubona, yaakanulamu ebivaalo olw'enaku, ng'akoba ati: “Nkagwireku mwana wange! Onnakughaiza inho, era ondeeteire obulumi ku mwoyo, kuba neeyama ye Musengwa Katonda era tisobola kumenhagho bweyamo obwo!”

³⁶ Mughala we yaamukoba ati: “Lata, oba nga weeyama ye Musengwa Katonda, tuukiriza ekyo kye wakoba okunkolaku kuba Musengwa Katonda oyo yakugha okwesasuuliza ku bazigu bo, Abammoni.”

³⁷ Aye yaakoba ise ati: “Nkolera ekintu kirala kiti: ndeka, okumala emyezi ebiri, nje ni bakagwa bange ntambuletambule eyo ntyo ku nsozi, neerire olw'okufa nga ndi mughala mwegha.”

³⁸ Yefutha yaamukoba ati: “Ja.” Yaamusiibula aje amale emyezi ebiri. Omughala yaaja ni bakagwa be ku nsozi, yeeririra eyo olw'okufa nga mwegha.

³⁹ Emyezi ebiri bwe gyawaaku, omughala yaira ye ise. Ise yaakola nga bwe yeeyama ye Musengwa Katonda, omughala yaafa nga mwegha. Okwo n'okwava empisa mu Isiraeli,

⁴⁰ ey'abaghala okujanga buli mwaka, ni bamala enaku ina nga balira mughala wa Yefutha ow'e Gileadi.