Abalamuzi 10 - Baibuli Ekibono kya Katonda 2014

Tola anunula Isiraeli

¹ Abimeleki bwe yamala okufa, Tola mutabane wa Pua era mwidhukulu wa Dodo, yaidha okununula Isiraeli. Yali wa mu kika kya Issakari, ng'aba mu kiketezo eky'ensozi ekya Efuraimu.

² Yaaba mukulembeze wa Isiraeli okumala emyaka amakumi abiri n'esatu. Yaamala yaafa, baamuziika mu Shamiri.

Yairi akulembera Isiraeli

³ Tola bwe yamala okufa, ghairagho Yairi, eyava e Gileadi. Yaakulembera Isiraeli okumala emyaka amakumi abiri n'ebiri.

⁴ Yali ni batabane amakumi asatu, abaajiiranga ku ndogoyi amakumi asatu. Baali n'ebibuga amakumi asatu, mu Gileadi, ebikaayetebwa ebyalo bya Yairi ni ye buli eno.

⁵ Yairi yaafa, baamuziika mu Kamoni.

Abaisiraeli kabiri basinza bakatonda abandi

⁶ Agho Abaisiraeli kabiri baakola ebibi ye Musengwa Katonda, nga basinza emisambwa, Baali ni Ashitarothi. Era baasinza bakatonda b'Abasiria, n'ab'Abasidoni, n'ab'Abamoabu, n'ab'Abammoni, n'ab'Abafilisiti. Abaisiraeli abo, baava ku Musengwa Katonda, baalekera agho okumusinza.

⁷ Musengwa Katonda yaasungughalira Abaisiraeli abo, yaaleka Abafilisiti n'Abammoni baabaghangula.

⁸ Abafilisiti n'Abammoni abo baamala emyaka ikumi na munaana nga batuntuza era nga bakiriga Abaisiraeli boonaboona abaali ere ng'osomoike omwiga Yorudani, mu kiketezo eky'Abamori ekiri mu Gileadi.

⁹ Abammoni baasomoka n'omwiga Yorudani okulwanisa ab'ekika kya Yuda, n'ekya Benjamini, n'ekya Efuraimu. Olwo Isiraeli yoonayoona yaaba mu bweraliikirivu obubitirivu.

¹⁰ Agho Abaisiraeli baalirira Musengwa Katonda nga bakoba bati: “Twayonoona mu maiso go, kuba twakuvaaku iwe Katonda waife, twasinza emisambwa gi Baali.”

¹¹ Musengwa Katonda yairamu Abaisiraeli ati: “Nze tyabawonia bwe mwali nga muli kutuntuzibwa Abamisiri, n'Abamori n'Abammoni, n'Abafilisiti,

¹² n'Abasidoni, n'Abamaleki, n'Abamoani? Bwe mwandirira tyabawonia?

¹³ Aye mwanvaaku mwasinza bakatonda abandi. Kale, tija kwirayo kubanunula.

¹⁴ Muje mulirire bakatonda be mulonzeegho okusinza. Abo n'ababe babawonienga nga mugwire mu buzibu.”

¹⁵ Aye Abaisiraeli baakoba Musengwa Katonda bati: “Twayonoona. Iwe tukole kyonakyona ky'onaabona nga n'ekitugwaniire. Aye tukweghemba otununule olwaleero.”

¹⁶ Kale baasuula ere bakatonda b'abamaghanga agandi, baasinza Musengwa Katonda. Musengwa Katonda oyo yaawulira enaku ku mwoyo olw'okudaazibwadaazibwa kwa Isiraeli.

¹⁷ Agho Abammoni beetegeka okulwana, baasimba weema dhaibwe mu Gileadi. N'Abaisiraeli beesoloza, baasimba weema dhaibwe e Mizipa mu Gileadi.

¹⁸ Abakulembeze b'Abaisiraeli mu Gileadi beebuuzagania beene na beene bati: “Naani anaakulembera olutalo olw'okulwanisa Abammoni? Oyo n'aidha okuba omukulembeze ow'abatyamye boonaboona ab'omu Gileadi.”