Abalamuzi 1 - Baibuli Ekibono kya Katonda 2014

Ekika kya Yuda n'ekya Simeoni bigema kyabazinga Adonibezeki

¹ Agho Yoshua ng'amaze okufa, Abaisiraeli baabuuza Musengwa Katonda bati: “Kika ki ekibe kisooke okuja okulumba Abakanaani okubalwanisa?”

² Musengwa Katonda yairamu ati: “Ekika kya Yuda n'ekibe kisooke okuja. Nkighaire okufuga ensi eyo.”

³ Agho ab'ekika kya Yuda baakoba ab'ekika kya Simeoni bati: “Mwidhe muje n'ife mu kiketezo Musengwa Katonda ky'atughaire, tulwanise Abakanaani nga tuli ghalala. Mu nsambo n'endala twena tulija n'imwe mu kiketezo Musengwa Katonda ky'abaghaire.”

⁴ Kale ab'ekika kya Simeoni n'ab'ekika kya Yuda baajiira ghalala mu lutalo. Musengwa Katonda yaabagha okughangula abasaadha abaghera omutwalo (10,000) e Bezeki, Abakanaani n'Abaperizzi.

⁵ E Bezeki eyo baayagaanayo kyabazinga ayetebwa Adonibezeki, baamulwanisa era baaghangula Abakanaani n'Abaperizzi.

⁶ Yaalumuka, aye baamubingirira baamugema, baamutemaku ebyala ebisaadha n'ebigere ebisaadha.

⁷ Adonibezeki oyo yaabakoba ati: “Bakyabazinga ensanvu be natemaku ebyala ebisaadha n'ebigere ebisaadha, baasolozanga obukunkumuka bw'emere ghansi gh'emeeza yange. Mpegaano Katonda aneesasuliizaaku olw'ekyo kye nabakola.” Agho baamutwala e Yerusalemu, yaafiira eyo.

Ab'ekika kya Yuda baghangula Yerusalemu ni Heburoni

⁸ Agho ab'ekika kya Yuda baalumba ekibuga Yerusalemu, baakigema, baita abantu baamu, era baakyokya omuliro.

⁹ Ebyo bwe byawa, baaja okulwanisa Abakanaani ab'omu kiketezo eky'ensozi, n'ab'omu kiketezo eky'omu kiiko, n'ab'omu kiketezo ekikalukalu ku luuyi olw'omukono omusaadha olw'e buvandhuba.

¹⁰ Agho baaja, baalumba Abakanaani abaabanga mu kibuga Heburoni, ekyayetebwangaku Kiriathi Araba, era eyo baaghangulirayo abantu bano: ab'ekika kya Sheshai, n'ab'ekya Ahimani, n'ab'ekya Talumai.

Othinieli aghangula ekibuga Debiri

¹¹ Ab'ekika kya Yuda bwe baava eyo, baalumba ekibuga Debiri ekyayetebwangaku Kiriathi Seferi.

¹² Agho owundi ku bo ng'ayetebwa Kalebu yaakoba ati: “Ole anaalumba Kiriathi Seferi era n'akighangula, ndidha kumugha mughala wange Akisa abe mukazi we.”

¹³ Agho Othinieli mutabane wa Kenazi, nga Kenazi ono ni muto wa Kalebu, yaakikuba yaakighangula, era Kalebu yaamugha mughala we Akisa.

¹⁴ Olunaku Akisa lwe yaidha okufumbirwa Othinieli, Othinieli yaakoba Akisa oyo asabe ise ekibandha. Akisa yaaja. Bwe yatuuka, yaava ku ndogoyi ye. Kalebu yaamubuuza ati: “Oyenda nkughe ki?”

¹⁵ Akisa yaamwiramu ati: “Ensi y'ongabyemu ku luuyi olw'omukono omusaadha olw'e buvandhuba, nkalukalu, kale nsaba ekirabo, ompe aghali ensulo edh'amaadhi.” Kale Kalebu yaamugha ensulo edh'eitale n'edh'eifo.

Obughanguzi ab'ekika kya Yuda n'ekya Benjamini bwe baatuukaku

¹⁶ Agho baidhukulu b'omusaadha Omukeni, eyali lata wa muka Musa, nga bali ghalala n'ab'ekika kya Yuda, baava e Yeriko, ekibuga eky'emiti eminaazi. Baaja mu irungu lya Buyudaaya eriri mu kiketezo ekikalukalu eky'oku luuyi olw'omukono omusaadha olw'e buvandhuba okumpi ni Aradi. Baasenga eyo mu Bamaleki.

¹⁷ Agho ab'ekika kya Yuda baaja n'ab'ekika kya Simeoni baaghangula Abakanaani abaali mu kibuga Zefathi, era baazikiriza ekibuga ekyo okukimalagho. Kyebaava ni bakituuma eriina Horuma.

¹⁸ Era ab'ekika kya Yuda abo baaghangula n'ebibuga bino: Gaza, ni Ashikeloni, ni Ekuroni, ghalala n'ebiketezo ebibyezungulwire.

¹⁹ Era Musengwa Katonda yaababeera, baatwala ekiketezo eky'ensozi. Aye baaloba kughanga kubingamu batyamye ba mu kiketezo kya ku museetwe, kuba abatyamye abo baali n'ebigaali eby'omu lutalo nga byakolebwa mu kyuma ekigumu einho.

²⁰ Agho ekibuga Heburoni kyagheebwa Kalebu, nga Musa bwe yalagira. Kalebu yaabingamu abaidhukulu abaava mu baana ba Anaki abasatu.

²¹ Aye ab'ekika kya Benjamini tibaaghanga kubinga Bayebusi be baayagaana nga n'ababa mu Yerusalemu. Era ni ye buli eno Abayebusi baba mu Yerusalemu ghalala n'Ababenjamini.

Ab'ekika kya Efuraimu n'ekya Manasse baghangula Betheli

²² Agho ab'ekika kya Efuraimu n'ekya Manasse boona Musengwa Katonda yaababeera, baalumba ekibuga Betheli, ekyayetebwangaku Luzi.

²³ Baatuma abakeesi mu kibuga ekyo.

²⁴ Abakeesi abo baabona omusaadha ali kukivaamu, baamukoba bati: “Tukweghemba otulagirire ghe tughanga okubita okwingira mu kibuga, twidha kukubisa bukalamu.”

²⁵ Omusaadha yaabalagirira. Bale baita ab'omu kibuga boonaboona, okutoolaku omusaadha oyo n'ab'omu maka ge.

²⁶ Omusaadha oyo yaaja mu nsi ey'Abahitti, yaazimbayo ekibuga, yaakituuma eriina Luzi. Era bakaakyeta eriina eryo okutuusa ni mpegaano.

Abaisiraeli ghaligho abantu be bataabinga

²⁷ Ab'ekika kya Manasse tibaabinga batyamye ba mu bibuga bino: Bethi Sheani, ni Tanaka, ni Dori, ni Ibuleamu, ni Megiddo. Era tibaabinga batyamye ba mu byalo ebyezungulwire ebibuga ebyo. Kale Abakanaani baasigala nga bakaaba mu bibuga omwo.

²⁸ Abaisiraeli ni bwe beeyongera okuba ab'amaani tibaabingamu Bakanaani boonaboona kubamalamu aye baabakakanga bwa kubakolera mirimo.

²⁹ Ab'ekika kya Efuraimu tibaabinga Bakanaani abaali mu kibuga Gezeri. Kale Abakanaani baasigala nga bakaali ghalala nabo.

³⁰ Ab'ekika kya Zebuluni tibaabinga batyamye ba mu bibuga, Kituroni ni Nahaloli. Kale Abakanaani baasigala nga bakaali ghalala nabo: aye bale baabakakanga okubakolera emirimo.

³¹ Ab'ekika kya Asheri tibaabinga batyamye ba mu bibuga bino: Akko, ni Sidoni, ni Ahalabu, ni Akazibu, ni Afiki, ni Rehobu.

³² Kale ab'ekika kya Asheri abo, baasigala nga bakaali ghalala n'abatyamye abo Abakanaani, kuba tibaababingamu.

³³ Ab'ekika kya Nafutali tibaabinga batyamye ba mu bibuga bino: Bethi Shemeshi, ni Bethanathi. Kale ab'ekika kya Nafutali abo, baasigala nga bakaali ghalala n'abatyamye abo Abakanaani aye baabakakanga okubakolera emirimo.

³⁴ Abamori baasindiikiriza ab'ekika kya Dani, baabairirizaayo mu kiketezo eky'oku nsozi, baaloba kubaganha kwika mu kiketezo eky'oku museetwe.

³⁵ Kale Abamori abo beeyongera okuba mu Aiyaloni, ni mu Shaalabimu, ni ku lusozi Heresi. Aye ab'ekika kya Efuraimu n'ekya Manasse baabafuganga, era baabakakanga okubakolera emirimo.

³⁶ Ku luuyi olw'omukono omugooda olw'e buvandhuba wa Sela, ensalosalo ey'Abamori ng'ebitira ku ntwiko ya Akirabbimu.