Abaheburayi 8 - Baibuli Ekibono kya Katonda 2014

Yesu Kabona Omukulu owaife

¹ Ekisinga obukulu mu bye tuli kwogera ni kino nti, tuli n'Omukulu wa Bakabona ali ng'oti n'oyo, atyaime ku luuyi olw'omukono omusaadha olw'ekityamo kya Katonda mwene bukumu mu igulu

² agheereza nga Kabona Omukulu mu Kifo Ekitukuvu Einho. Ekifo ekyo, ni weema yeene etaateebwagho bantu, aye eyateebwagho Musengwa.

³ Buli Mukulu wa Bakabona yeenayeena, ateebwagho okughaayo ebirabo n'emisengo. Kale, ni Kabona Omukulu owaife yeena kyava agwaine okubaaku ni ky'aghaayooku.

⁴ Nguli yali ku nsi tiyandibaire kabona naire, kuba ghaligho bakabona abaghaayo ebirabo ng'Amateeka bwe galagira.

⁵ Omulimo gwe bakola nga bakabona gwefaanaanirizaaku bwefaanaanirize, era kinsense bunsense eky'ebyo ebikolebwa mu igulu; kuba ni Musa bwe yali ng'aja okutaagho eweema, Katonda yamulagira ati: “Bona nti byonabyona obikola ng'ojiira ku ekyo ekyakulagibwa ku lusozi.”

⁶ Aye mperaano Kurisito yagheebwa obugheereza obusinga einho obw'abo, era ng'oti n'endagaano y'alimu ng'akwania bw'esinga ere eyasooka, kuba yakolebwa nga by'esuubiza n'ebisinga.

⁷ Nguli endagaano eyasooka yali ezira ky'ebulaku, tighandibaire kyendesa yakubiri.

⁸ Kuba Katonda anenia abantu be ng'akoba ati: “Musengwa akoba ati ekiseera kiri kwidha, mwe ndikolera endagaano empyaka n'abantu ba Isiraeli, era n'abantu ba Yuda

⁹ Teriba oti n'endagaano ye nakola ni badhaadha baibwe, ku lunaku lwe nabagema ku mukono okubatoola mu nsi Misiri; kuba tibaakalangukira ku ndagaano ye nakola nabo. Zeena kyenava ni ndekayo okubafaaku.

¹⁰ Eno n'endagaano ye ndikola n'abantu ba Isiraeli: Musengwa ayogera ati Mu biseera ebiri kwidha, ndita amateeka gange mu bidhuubo byaibwe, era ndigaghandiika mu myoyo gyaibwe. Ndiba Katonda waibwe, boona baaba bantu bange.

¹¹ Ghazira aliba na kwegeresa mwine, oba aliba na kukoba muganda we ati, ‘Manha Musengwa!’ Kuba okuviira irala ku asembayo obuto okutuukira irala ku mukulu asingayo, boonaboona baliimanha.

¹² Ndibasonigha okwonoona kwaibwe, n'ebibi byaibwe tiribiidhukira naire.”

¹³ Katonda bw'ayogera ku ndagaano empyaka aba akairiya eyo eyasooka era ekyo ekikula ni kikairigha, kiba kiri kumpi okuwaagho.