Abaheburayi 7 - Baibuli Ekibono kya Katonda 2014

Obwakabona bwa Melekizedeki

¹ Melekizedeki ono yali kyabazinga wa Salemu era kabona wa Katonda Ali Ghaigulu Yeene. Bwe yayagaanana ni Aburahamu nga Aburahamu ava mu lutalo mwe yaitira bakyabazinga, Melekizedeki ono yaamugha enkabi.

² Aburahamu yaamugha ekintu kirala kirala ku buli ikumi, ku bintu byonabyona bye yali anhaze. Okusooka, eriina Melekizedeki litegeeza, “Kyabazinga ow'obutuufu.” Ate kuba yali kyabazinga wa Salemu, eriina lye era litegeeza, “Kyabazinga ow'emiraala.”

³ Aziraku ise oba inhina oba badhaadha be. Aziraku lunaku lwe yazaalibwa oba lwe yafiiraku. Aye okwefaanaanirizaaku n'Omwana wa Katonda, aba kabona wa byanda na byanda.

⁴ Kale mubona omuntu ono nga bwe yali omubbede. Dhaadha waife Aburahamu yamugha ekintu kirala kirala ku buli ikumi, ku bintu byonabyona bye yanhaga mu lutalo.

⁵ Era abo baidhukulu ba Levi abagheebwa obwakabona, Amateeka gabalagira okusoloza ku bantu ekintu kirala kirala ku buli bintu ikumi ku ebyo bye baba bafunie, ekikoba nti okuva ku boluganda lwaibwe beene, waire nga boona baidhukulu ba Aburahamu.

⁶ Aye Melekizedeki ono, ataali wa lulyo lwaibwe, yatoola ku Aburahamu ekintu kirala kirala ku buli bintu ikumi Aburahamu bye yanhaga era yaamugha enkabi, ate nga Aburahamu yali amaze okusuubizibwa Katonda.

⁷ Kimanhiibwa bukalamu ng'omukulu n'agha omuto enkabi.

⁸ Bwe twogera ku bakabona, ekintu ekirala ekirala ku buli bintu ikumi, kigheebwa abantu obuntu era abafa n'okufa. Aye bwe twogera ku Melekizedeki, kyagheebwa oyo akakasibwa nti mulamu.

⁹ Omuntu asobola okukoba ati: Levi mwene, agheebwa ekintu ekirala ekirala ku buli bintu ikumi, yeena yaghaayo ekintu ekirala ekirala ku buli bintu ikumi ng'oti n'ekyo, ng'akigheerayo mu Aburahamu

¹⁰ kuba yali ng'akaali mu mubiri gwa dhaadha we Aburahamu, Aburahamu bwe yayagaanana ni Melekizedeki.

¹¹ Abantu ba Isiraeli baagheebwa amateeka nga gajiira ku bwakabona bwa Levi. Mperaano nguli omulimo gwa bakabona ba Levi gwali gutuukiriziibwa, tikyandyetaagiisaayo kabona wundi kwidha atali ng'oti ni Aaroni, aye ali ng'oti ni Melekizedeki.

¹² Ekikoba nti bweghabaagho okukyuka mu bwakabona, ghateekwa okubaagho okukyuka ni mu mateeka.

¹³ Oyo ayogerwaku ebibono ebyo yava mu kika kindi omutavangaku muntu yeenayeena n'agheereza ku alutaari nga kabona.

¹⁴ Kimanhiibwa bukalamu nga Musengwa waife yali wa mu kika kya Yuda, Musa ky'ataayogeraku nga kirivaamu bakabona.

Kabona owundi, ali oti ni Melekizedeki

¹⁵ Kino kyongera okweyoleka obukalamu bweghabonekagho kabona owundi ali ng'oti ni Melekizedeki,

¹⁶ ataafuuka kabona lwa mateeka ga buzaaliranwa, aye olw'amaani ag'obulamu obutakoma.

¹⁷ Kuba ebyaghandiikibwa bikoba biti: “Oli kabona ebyanda n'ebyanda ng'oti ni Melekizedeki bwe yali.”

¹⁸ Kale ekiragiro ekyasooka kyadibizibwa olw'obunafu bwakyo n'obutaba na muganhulo,

¹⁹ kuba Amateeka ghazira kye gatuukiriza. Aye mperaano tuli n'eisuubi erisingaku obukalamu mwe tubita okuseeta ye Katonda.

²⁰ Okwo Katonda yaayongerezaaku okulayira. Abandi baafuuka bakabona nga bazira kulayira oti n'okwo.

²¹ Aye Yesu yafuuka kabona nga ghaligho ekirayiro Katonda bwe yamukoba ati: “Musengwa yalayira era talyeidhusa, ‘Oli kabona ebyanda n'ebyanda.’ ”

²² Kino kifuula Yesu okugha obweyamo okubona ng'endagaano esinga bukalamu etuukirizibwa.

²³ Ate ghaligho endhawulo eyindi. Bakabona bale baali kamaala kuba baafanga baaloba kusobola kubaagho ekiseera kyonakyona.

²⁴ Aye Yesu mulamu, taja kufa era aba kabona ebyanda n'ebyanda.

²⁵ Era olw'ensonga eno, kyava asobola okulokolera irala ekiseera kyonakyona abo abaidha ye Katonda nga babita mu mwene, kuba mulamu enaku dhoonadhoona okuboogererayo.

²⁶ Kyali kituufu tube n'Omukulu wa Bakabona ali atyo omutukuvu, aziraku musango, aziraku kimyamya, eyayawulwa okuva ku babi, era Katonda ye yagulumiza mu igulu.

²⁷ Tali ng'abakulu ba bakabona abandi abali n'okughaayo buli lunaku emisengo, okusooka olw'ebibi byaibwe beene ate kabiri n'olw'ebibi eby'abantu abandi. Yaghaayo omusengo omukuzi mulala guti gwamala, bwe yeeghaayo mwene ng'omusengo.

²⁸ Amateeka gataagho abantu mu bunafu bwaibwe okuba abakulu ba bakabona, aye ekibono eky'ekirayiro ekyaidha oluvainhuma ng'Amateeka galigho, kyataagho Mwana eyafuulibwa atuukiriire ebyanda n'ebyanda.