Abaheburayi 6 - Baibuli Ekibono kya Katonda 2014

¹ Kale ni ka tuleke ebyo bye twasookeraku okwega ebigema ku Kurisito, tuje mu maiso n'ebikulu. Titugwaine kabiri kwiramu kutaagho musingi buyaaka nga tubeegeresa okusooka okulekayo ebyo ebiziramu muganhulo bye mwakolanga, memale mutoolere okwikiriza Katonda.

² Era nga tubeegeresa ebigema ku kubatizibwa okwa buli nsambo, n'ebigema ku kuteebwaku emikono, n'ebigema ku kuzuukira okw'abafu era n'ebigema ku kusalirwa omusango ogutawaagho.

³ Twidha kuja mu maiso, kasita Katonda n'atuganha;

⁴ kuba tikisoboka kwikirizisa bantu kweiraku abaali bamulisiibwaku obutangaavu bwa Katonda ni babuvaamu, era abaali bafunieku ku kirabo eky'omu igulu ni bagabana ni ku Mwoyo Mutukuvu.

⁵ Era abaali bamanhieku ku bulungi obw'ekibono kya Katonda era n'amaani agali kwidha.

⁶ Abantu ng'oti n'abo bwe bava mu kwikiriza tikisoboka kubaikirizisa kweiraku, kuba bairamu okukomerera Omwana wa Katonda ku musalaba era baamuswaza mu lwatu.

⁷ Amaadhi gatoonha ku itaka emikuzi kamaala, eitaka lyaganhwa, era lyakuza ebisimbe ebiganhula beene byo Katonda yaaligha enkabi.

⁸ Aye bwe likuza amawa n'eisubi, liba tirikaagasa era nga liri kumpi kulaamibwa na kuzikirizibwa na muliro.

⁹ Bakagwa, aye ni bwe twogera tutyo, imwe tubeesiga, era twidhi nga muli n'enkabi inho okutuuka ku kulokolebwa.

¹⁰ Kuba Katonda ti n'omubi einho okusobola okwerabira omulimo gwe mwakola, n'okugonza kwe mwayoleka mu buyambi bwe mwagha, era bwe mukaagha abatuukirivu ni ye buli eno.

¹¹ Era twenda kiisi mulala ku imwe okwolekanga okufaabiikana okwo, okutuusa ku nkomerero lwe mulifuna kye musuubira.

¹² Ti twenda mube bagayaavu, aye mube ng'oti n'abo abaikiriza, era ni baguminkiriza, ni bafuna ebyasuubizibwa.

Okusuubizibwa kwa Katonda okukakafu

¹³ Katonda bwe yasuubiza Aburahamu, yeerayirira mwene ebyo bye yali asuubiza, kuba ghaali ghaziragho amusinga bubbede y'asobola kulayirira.

¹⁴ Yakoba ati: “Bwenebwene ndikugha enkabi naayaza eizaire lyo.”

¹⁵ Aburahamu yaaguminkiriza, era atyo yaafuna Katonda kye yamusuubiza.

¹⁶ Abantu bwe baba nga balayira bakozesa eriina ly'oyo abasinga obubbede, era ole olulayira ati ng'olwo ababaire batakana balekera.

¹⁷ Kale Katonda bwe yayenda akakase bye yasuubiza, kye yava n'alayira. Yayenda okukakalisa irala abo abalifuna ebyasuubizibwa ati ebyasuubizibwa talibikyusa.

¹⁸ Agho ni, Katonda bye yasuubiza n'ekirayiro kye, n'ebyo ebintu ebibiri ebitasobola kukyuka, era Katonda by'ataghanga kutuguyaamu. Kale ni, ife abaalumuka nga tunoonia obulumukiro, kitwizaamu inho amaani okunhweza eisuubi eryatugheebwa.

¹⁹ Eisuubi eryo ni lye tuli nalyo, era n'erinhwekeza irala emyoyo gyaife ng'oti n'ekizito ekyemereza eryato bwe kinhweza eryato. Eisuubi eryo liziramu kutya era ikakafu. Era lingirira irala mu kifo ekitukuvu ekiri einhuma w'olutimbe.

²⁰ Ku lwaife, Yesu n'eyatusooka okwingirayo era yaafuuka Omukulu wa Bakabona ow'ebyanda n'ebyanda ng'oti ni Melekizedeki bwe yali.