Abaheburayi 5 - Baibuli Ekibono kya Katonda 2014

¹ Kiisi Mukulu wa Bakabona alondebwa mu bantu, era ateebwagho okugheereza Katonda ku lwaibwe. Aghaayo ebigheebwayo, n'emisengo ye Katonda olw'ebibi byaibwe.

² Asobola okugema empola abo abadaaliima olw'obutamanha, kuba yeena mwene munafu mu bintu kamaala.

³ Era olw'obunafu obwo ateekwa okughaayo emisengo olw'ebibi bye, n'olw'ebibi eby'abantu abandi.

⁴ Era omuntu tasobola kwegha mwene kitiisa ekyo kya kuba Kabona Mukulu. Aye ayetebwa bwetebwe Katonda ng'oti ni Aaroni bwe yayetebwa.

⁵ Mu nsambo n'endala Kurisito tiyeegha yenka kitiisa kya kuba Mukulu wa Bakabona, aye kyamugheebwa Katonda eyamukoba ati: “Iwe oli Mwana wange, olwaleero nkuzaire.”

⁶ Ate era akoba aghandi ati: “Iwe oli kabona ebyanda n'ebyanda, nga Melekizedeki bwe yali.”

⁷ Yesu mu bulamu bwe obw'oku nsi kuno, yayogerera ghaigulu mu kusaba kwe, era yaalira n'amaziga nga yeeghemba Katonda, eyali nga n'asobola okumuwonia okufa. Era olw'okutya Katonda okwo kwe yali nakwo, Katonda yamuwulira.

⁸ Waire yali Mwana wa Katonda, yayega obuwulize olw'okudaazibwadaazibwa kwe yabitamu.

⁹ Era ng'amaze okutuukirizibwa, abo boonaboona abamugondera yabafuukira ensimuko ey'obulokozi obutawaagho,

¹⁰ era Katonda yaamufuula Omukulu wa Bakabona ng'oti ni Melekizedeki bwe yali.

Okulabula

¹¹ Tuli n'ebintu kamaala eby'okwogera ku nsonga eno, aye nga bizibu okwinhonhola, kuba mulwagho okutegeera.

¹² Waire nga buti mwandibaire nga muli beegeresa, aye ate mukaayenda omuntu okubeegeresa ebyo ebiinhamirwaku mu kwega ekibono kya Katonda. Mukaayenda mata buta ng'oti n'abaana abato, mu kifo ky'emere yeene.

¹³ Kiisi anhwa amata obuta, aba akaali mwana muto ataghanga kwawulagho kituufu na kikyamu.

¹⁴ Aye emere yeene n'ey'abantu abakulu abamaze okwega olw'ebyo bye babitamu, era ni basobola okwawulagho ekirungi n'ekibi.