Abaheburayi 4 - Baibuli Ekibono kya Katonda 2014

¹ Kale ni ng'ekisuubizo eky'okutuuka aghali okuwuumula bwe kikaaligho, tufengayo okubona nga tighabaagho muntu yeenayeena ku imwe alemwa kutuukagho.

² Kuba twena twawulira Amawulire Amalungi ng'oti ni beene bwe baagawulira. Aye bye baawulira tibyabaganhula, kuba byabaagaana nga baziramu kwikiriza.

³ Ife abaikiriza niife abatuuka aghali okuwuumula, nga bwe yakoba ati: “Nasungughala era neefuugha nti, ‘Tiribaganha kutuuka ghe nali nja kubagheera kuwuumula.’ ” Yakoba kino waire ng'emirimo gye gyali nga gyawa, bwe yamala okutonda ensi.

⁴ Ghaligho mu byaghandiikibwa olunaku olwomusanvu ghe lwogerwaku luti: “Era Katonda yawuumula ku lunaku olwomusanvu nga amaze emirimo gye gyonagyona.”

⁵ Era kabiri kyene kino eky'okuwuumula kyogerwaku kiti: “Tiribaganha kutuuka ghe nali nja kubagheera kuwuumula.”

⁶ Abo abaasooka okuwulira Amawulire Amalungi, tibaatuuka ku kuwuumula okwo, olw'obutaikiriza bwaibwe. Ghaligho niini abandi abatuuka.

⁷ Kino kiri kityo kuba era Katonda yataagho olunaku olundi olwetebwa “Olwaleero” lw'ayogeraku nga ghabiseegho emyaka kamaala ng'abita mu Daudi, nga bwe mmaze okukyogeraku ng'akoba ati: “Olwaleero bwe muwulira eiroboozi lye, mutakalangusa myoyo gyaimwe.”

⁸ Nguli Yoshua yabatuusa aghali okuwuumula, Katonda ti yandyogeire ku lunaku lundi kabiri.

⁹ Kale ni abantu ba Katonda bakaaliyo n'okuwuumula ng'okwa Katonda okw'olunaku olwomusanvu.

¹⁰ Kuba kiisi atuuka ku kuwuumula Katonda kwe yasuubiza, awuumula mu mirimo gye oti ni Katonda yeena bwe yawuumula ng'amaze egigye.

¹¹ Agho ni tufaabiikane okutuuka ku kuwuumula okwo, ghalobe kubaagho agwa olw'obutaikiriza nga bale.

¹² Ekibono kya Katonda kiramu, kikola era kyogi okusinga empiima eri n'obwogi ku ndhuyi dhaayo dhombi. Kisalira irala kyatuuka n'okwawula omutima n'omwoyo, obuyungiro n'omusokono. Kisobola okubonera irala omuntu by'alowooza ni by'ayenda, ebiri mu mwoyo gwe.

¹³ Ghazira kitonde kisobola kugisibwa mu maiso ge. Ebintu byonabyona mu maiso ge byerule era biboneka. Era y'oyo buli muntu aja kwewozaaku kiisi kye yakola.

Yesu Kabona Omukulu

¹⁴ Kale nga bwe tuli n'Omukulu wa Bakabona omukologho atyo, Yesu Omwana wa Katonda, eyajiira irala ye Katonda, tukalangukire ku kwikiriza kwaife kwe twatula.

¹⁵ Omukulu wa Bakabona oyo ye tuli naye, n'oyo afaayo okutusaasira mu bunafu bwaife, era n'oyo eyalebwa mu buli nsambo ng'oti niife bwe tulebwa aye n'atakola kibi kyonakyona.

¹⁶ Kale ni tuseete kumpi n'ekityamo eky'ekisa kya Katonda nga tuli bagumu, memale atusaasire era atugemerwe ekisa kiisi lwe tuba nga twetaaga okubeerwa.