Abaheburayi 3 - Baibuli Ekibono kya Katonda 2014

Yesu n'asinga Musa

¹ Kale ni aboluganda abatukuvu, nga mwena bwemwayetebwa n'okwetebwa okuva mu igulu, mulowooze ku Yesu omutume era Omukulu wa Bakabona mu kwikiriza kwaife.

² Yali mwesigwa y'oyo eyamulonda, era nga ni Musa yeena bwe yali omwesigwa mu nhumba ya Katonda.

³ Aye ng'omuzimbi bw'aba n'ekitiisa ekisinga eky'enhumba ye yazimba, ni Yesu agwanira ekitiisa ekisinga ekya Musa.

⁴ Kuba kiisi nhumba ebaaku eyagizimba, aye eyazimba ebintu byonabyona ni Katonda.

⁵ Era Musa yali mugheereza mwesigwa mu nhumba ya Katonda yoonayoona, ng'akakasa ebyo Katonda bye yali aja okwogera.

⁶ Aye Kurisito yali mwesigwa ng'omwana akulira enhumba ya Katonda era ife niife enhumba ya Katonda kasita tukalanguka era ni twesiimira mu kusuubira.

Okuwuumulaku okw'abantu ba Katonda

⁷ Kale ni nga Mwoyo Mutukuvu bw'akoba ati: “Olwaleero bwe muwulira eiroboozi lye,

⁸ mutakalangusa myoyo gyaimwe, ng'abadheemu bwe baakola ku lunaku lule, olwali olw'okulebwa mu irungu.

⁹ Eyo badhaadha baimwe bandeba era baabona bye nakola mu myaka amakumi ana (40).

¹⁰ Mbeeni n'okusungughalira abantu abo, naakoba nti, ‘Buli kaseera emyoyo gyaibwe gidaaliimira luuyi, tibawulira biragiro byange.’

¹¹ Nasungughala neefuugha nti, ‘Tiribaganha kutuuka ghe nali nja kubagheera kuwuumula.’ ”

¹² Kale aboluganda, mwegendereze ghalobe kubaagho naire mulala ku imwe aba na mwoyo mubi era ogutaikiriza, n'ava ku Katonda omulamu.

¹³ Aye mulambaganenga buli lunaku, kasita luba nga lwetebwa “Olwaleero”, ghalobe kubaagho naire omulala ku imwe obuguya obw'ekibi ye bukalangusa omwoyo.

¹⁴ Kiri nti tuba tuli kwisa kirala mu Kurisito, kasita tukalangula obwesige bwaife bwe twatoolera nabwo, ni tubutuukiza irala ku nkomerero.

¹⁵ Ebyaghandiikibwa bikoba biti: “Olwaleero bwe muwulira eiroboozi lye, mutakalangusa myoyo gyaimwe, ng'abadheemu bwe baakola ku lunaku lule.”

¹⁶ Ni baani abaawulira eiroboozi lye memale ni bamudheemera? Ti n'abo boonaboona Musa be yakulembera n'abatoola mu Misiri?

¹⁷ Era ni baani Katonda be yasungughalira okumala emyaka amakumi ana (40)? Ti n'abo abaayona, ni bafa era emirambo gyaibwe ni gisigala mu irungu?

¹⁸ Era ni baani be yeefuuyiraku obutabaganha kutuuka ghe yali aja okubagheera okuwuumula, okutoolaku abo abaamudheemera?

¹⁹ Kale tubona nga baalemwa okutuuka lwa butaikiriza bwaibwe.