Abaheburayi 13 - Baibuli Ekibono kya Katonda 2014

Okusiimya Katonda

¹ Mujenga mu maiso n'okugonzania ng'aboluganda mu Kurisito.

² Timwerabiranga kusangaazanga bantu be mutaidhi, kuba ghaligho abasangaaza bamalaika nga tibaidhi.

³ Mwidhukirenga abasibe nga muli ng'oti mwena muli basibe ghalala nabo. Era mwidhukirenga abo abadaazibwadaazibwa, kuba era mwena mukaali mu mubiri.

⁴ Obufumbo buteebwengamu ekitiisa abantu boonaboona, era obufumbo bukuumibwenga nga butukuvu, kuba abadankaanu n'abenzi, Katonda alibasalira omusango.

⁵ Mulobenga kugonza mpiiya, aye bye muli nabyo bibamalenga. Katonda yakoba ati: “Tirikuvaaku naire era tirikulekulira agho naire.”

⁶ Kyetuva ni twogera n'obugumu tuti: “Musengwa n'omubeezi wange, tiityenga kintu kyonakyona. Omuntu aghanga kunkola ki?”

⁷ Mwidhukirenga abakulembeze baimwe abaabakobera ekibono kya Katonda. Mwidhukirenga eby'obulamu bwaibwe, era mubenga n'okwikiriza ng'oti n'okwaibwe.

⁸ Yesu Kurisito nga bwe yali olwaidho, bw'ali n'olwaleero, era bw'aliba ebyanda n'ebyanda.

⁹ Okwegeresa okundi kwonakwona kwe babaleetera kutabadaalimyanga. Kuba ekikulu n'ekisa kya Katonda okutugumya omwoyo, okusinga akujiira ku mateeka ag'eby'okulya agataganhulangaku abo abagajiiraku.

¹⁰ Tuli ni alutaari abo abagheereza mu nhumba ya Katonda kwe bataikirizibwa kulya.

¹¹ Olw'ekyo Omukulu wa Bakabona atwala omusaayi gw'ensolo mu Kifo Ekitukuvu Einho, yaagughaayo olw'ebibi, aye emamba yaadho yaayokebwa luuyi etaba bantu.

¹² Kale Yesu yeena kyeyava n'adaazibwadaazibwa ku luya kw'ekibuga, aghange okutukuza abantu n'omusaayi gwe.

¹³ Kale tuje y'ali ku luya kw'ekibuga tugabane ku kuswala kwe.

¹⁴ Kuba ku nsi kuno tuziraku kibuga kya lubeerera, aye tunuyirira ekyo ekiri kwidha.

¹⁵ Kale buliidho tughenga Katonda omusengo ogw'okumusaaka nga tubita mu Yesu, nga twatula eriina lye n'eminwa gyaife.

¹⁶ Timwerabiranga kukola bukalamu n'okubeeragana kuba egyo n'emisengo Katonda gy'asiima.

¹⁷ Muwulirenga abakulembeze baimwe era mubagonderenga, kuba n'abalabirira emyoyo gyaimwe, era balyewozaaku ensambo ye baagirabiriramu. Mubasobozese okukola omulimo guno n'eisanhu, aye ti mu nnaku, kuba ekyo ghazira kye kibaganhula.

¹⁸ Mutusabirenga, kuba tukakasa nga tuli n'omwoyo omunaabuufu era nga twenda okukola obukalamu mu buli kintu.

¹⁹ Era mbeeghemba okunsabiranga einho nsobole okwira amangu ye muli.

Okusaba okusembayo

²⁰ Nsaba Katonda ow'emiraala, eyazuukiza Musengwa waife Yesu, eyafuuka Omwayi w'entaama omukulu, olw'okuyugha omusaayi gwe ogwataagho endagaano etawaagho,

²¹ abaghe kiisi kikalamu kyonakyona kye mwetaaga okukolanga by'ayenda. Katonda oyo atukozese by'asiima mu Yesu Kurisito, agheebwe ekitiisa, ebyanda n'ebyanda. Amiina.

Ebibono ebisembayo

²² Aboluganda, mbeeghemba muguminkirize ebibono byange ebyo eby'okubalamba, kuba mbaghandiikiire mu bumpi.

²³ Nhenda okubakobera nti muganda waife Timotheo baamulekula, era bw'aliidha amangu aliba ghalala ninze lwe ndiidha okubabona.

²⁴ Mulamuse abakulembeze baimwe boonaboona n'abatuukirivu boonaboona. Ab'omu Italia babalamwisa.

²⁵ Enkabi dha Katonda dhibe n'imwe mwenamwena. Amiina.