Abaheburayi 12 - Baibuli Ekibono kya Katonda 2014

Katonda Lata waife

¹ Kale twena nga bwe tuli n'abadhulizi kamaala batyo abatwezungulwire, tusuule ere kiisi kintu ekituzitoogherera era n'ekibi ekitwesibyeku. Tungire n'obumalirivu mu ntaka edh'okulumuka edhiteereibwagho,

² ng'amaiso tugataire ku Yesu eyatoolereza era atuukiriza okwikiriza kwaife. Oyo olw'eisanhu lye yali asuubira, yagumira omusalaba, yaaloba kutya kuswala. Mperaano atyaime ku luuyi olw'omukono omusaadha olw'ekityamo kya Katonda.

³ Mwidhukire bwe yagumira okutakana n'obukyayi obw'aboonooni, olwo mulobenga kuwaamu maani;

⁴ kuba waire mulwana n'ekibi, mukaali kutuuka ku kwitibwa.

⁵ Mwerabiire Katonda bw'abalamba ng'abaana be? Akoba ati: “Mwana wange tonhoomanga kukangaivula kwa Musengwa. Era towangamu maani bw'akubonerezanga.

⁶ Kuba Musengwa akangaivula oyo y'agonza, era abonereza kiisi y'ayeta omwana we.”

⁷ Bwe mukangaivulwanga, muguminkirizenga, kuba Katonda abakangaivula ng'abaana be. Kale mwana ki ise y'atakangaivula?

⁸ Bwe mutakangaivulwa ng'abandi bwe bakangaivulwa, muba nga timuli baana beene aye muba ng'abaghambule.

⁹ Ekyo nga kiri agho, twali ni balata baife mu mubiri abaatukangaivulanga era twabatangamu ekitiisa. Kale titugwaine kugondera Lata waife mu mwoyo kusingagho inho tube abalamu?

¹⁰ Balata baife abo baatukangaivulanga ekiseera kitono nga beene bwe baabonanga. Aye Katonda atukangaivula olw'omuganhulo ife beene gwe tufunamu, tughange okugabana ku butukuvu bwe.

¹¹ Bwe tuba nga tuli kukangaivulwa, mu kiseera ekyo tuwulira bulumi mu kifo eky'eisanhu. Aye oluvainhuma abeegereseibwa okukangaivulwa okwo, bafuna emiraala n'obutuufu.

Okulabula

¹² Kale mugolole emikono gyaimwe egiruyiriire, mugumye ebivu byaimwe ebidhugumira.

¹³ Mutambulirenga mu ngira enkalamu, aghenhera alobe kulemalira irala aye awone.

¹⁴ Mufaabiikanenga okuba n'emiraala y'abantu boonaboona era mufaabiikanenga okuba n'obutukuvu, kuba aghazira obwo, ghazira alibona Musengwa.

¹⁵ Mwekuume ghalobe kubaagho afiirwa kisa kya Katonda, era ghalobe kubaagho bubi buva mu imwe ni butabulatabula era ni bwonoona bantu kamaala.

¹⁶ Mwekuume ghalobe kubaagho mwenzi oba atatya Katonda ng'Esau, eyatunda obusika bwe olw'omwiguto omulala guti.

¹⁷ Mwidhi nga ku nkomerero bwe yayenda okufuna omukisa ogwo, tiyagugheebwa, kuba tiyafuna kaghagaanhia ka kukyusa kye yali akoze, waire yagunoonia ng'alira.

¹⁸ Timwidhie ng'Abaisiraeli bwe baaja ku lusozi Sinai olusobola okugemwaku era olwaka omuliro. Era timwidhie ya nzikiiza egemye bedimudimu, oba ya kiwunga,

¹⁹ oba ya kuvuga kwa ndeka, oba ya iroboozi eryavaamu ebibono ebyaleetera abaabiwulira okusaba balobe kweyongera kubiwulira.

²⁰ Kuba tibaasobola kugumira kiragiro ekyabagheebwa, ekikoba kiti: “Ni bw'eba ensolo obusolo, bw'esiinha ku lusozi olwo eteekwa kukubibwa mabaale efe.”

²¹ Bwenebwene ebyabonebwa byali bitiisa inho, ni Musa yaatuuka okukoba ati: “Ntiire inho naadhugumira.”

²² Aye imwe mwidhie ku lusozi Sioni era mu kibuga kya Katonda omulamu, Yerusalemu eky'omu igulu, eyeesololeiza bamalaika olukunkumuli.

²³ Mwidhie mu lwekobaano olw'abaana ababeri abaaghandiikibwa mu igulu, ni ye Katonda omulamuzi w'abantu boonaboona, era ni y'emyoyo gy'abatuufu abaafuulibwa abatuukiriire.

²⁴ Mwidhie ye Yesu eyakwania endagaano empyaka. Mwidhie y'omusaayi ogumansirwa, ogwogera ebikalamu okusinga ogwa Abeli.

²⁵ Mwekuume, mutalobanga kuwulira oyo ayogera kuba, oba abo abaaloba okuwulira oyo eyabalabula ng'ali ku nsi, tibaawona, ife bwe tuloba okuwulira oyo atulabula, ng'ali mu igulu tuliwonera gha!

²⁶ Ku olwo eiroboozi lye lyatengeesa ensi, aye ku luno yeesoomera ati: “Kabiri ndidha kwiramu okutengeesa, ti nsi yonka aye n'eigulu.”

²⁷ Okukoba ati: “Ndidha kwiramu”, kitegeeza okutoolwagho ku ebyo ebitengeesebwa n'ebyo ebyatondebwa, memale olwo ebitatengeesebwa bisigalegho.

²⁸ Kale twebazenga olw'okufuna Obwakyabazinga obutatengeesebwa, era tusinzenga Katonda mu nsambo emusiimya, nga tumutaamu ekitiisa era nga tumutya

²⁹ kuba Katonda waife muliro gwene oguzikiriza.