Abaheburayi 10 - Baibuli Ekibono kya Katonda 2014

¹ Amateeka gali na kinsense bunsense eky'ebikalamu ebija okwidha, aye ti kifaananie kyabyo kyenekyene. Tigasobola kufuula abo abaidha ye Katonda kuba batuukiriire, olw'emisengo egigheebwayo buli mwaka.

² Nguli gaali gasobola okubafuula abatuukiriire, nguli emisengo tigikaagheebwayo kuba abagighaayo bandibaire nga baafuulibwa ira abatuukiriire omukuzi mulala, era nga tibakaawulira mule musango lwa kibi.

³ Aye mu misengo muno mulimu okwidhusibwa ebibi buli mwaka

⁴ kuba omusaayi gw'ente enume n'ogw'embuzi tigusobola kutoolagho bibi.

⁵ Kale Kurisito bwe yali nga aidha mu nsi kyeyava n'akoba ati: “Emisengo n'ebigheebwayo tiwabyenda, aye wantegekera omubiri.

⁶ Ebyokebwa byonabyona ni biweekereragho tiwabisiima, n'ebyo ebigheebwayo olw'ebibi byona tiwabisiima.

⁷ Kye nava ni nkoba nti, ‘Katonda wange, ndidhie okukola ky'oyenda, ng'ekyaghandiikibwa bwe kindhogeraku mu nzingo y'ekitabo.’ ”

⁸ Asooka kukoba ati: “Emisengo n'ebigheebwayo, n'ebyo ebyokebwa ni biweekereragho, n'ebyo ebigheebwayo olw'ebibi, tiwabyenda era tiwabisiima waire ng'ebyo byonabyona byagheebwayo ng'Amateeka bwe galagira.”

⁹ Ate yaakoba ati: “Ndidhie okukola ky'oyenda.” Yatoolagho enkola eyasooka memale olwo yaataagho eyairirira.

¹⁰ Twatukuzibwa, kuba Yesu Kurisito yakola ekyo Katonda kye yayenda bwe yaghaayo omubiri gwe omukuzi omulala guti nga gumala.

¹¹ Buli lunaku bakabona bairamu okughaayo emisengo miraala egyo egitaghanga kutoolagho bibi.

¹² Aye Kurisito yaghaayo omusengo mulala gwonka olw'ebibi, memale yaatyama ku luuyi olw'omukono omusaadha ogwa Katonda y'ali ebyanda n'ebyanda.

¹³ Ali eyo ateegereire, okutuusa abazigu be lwe baliteebwa ghansi gh'ebigere bye.

¹⁴ Olw'okughaayo omusengo guno omulala, abo be yatukuza yabafuula abatuukiriire ebyanda n'ebyanda.

¹⁵ Era ni Mwoyo Mutukuvu kino akighaaku obudhulizi bw'akoba ati:

¹⁶ “Eno n'endagaano ye ndikola nabo mu nnaku edhiidha,” Musengwa atyo bw'akoba. “Ndita amateeka gange mu myoyo gyaibwe, era ndigaghandiika mu bidhuubo byaibwe.”

¹⁷ Ate era yaakoba ati: “Tiriidhukira kabiri bibi byaibwe na kwonoona kwaibwe.”

¹⁸ Ebyo bwe bimala okusoniyibwa, okughaayo omusengo olw'ebibi kuba tikukeetaagisa.

Tuseete ye Katonda

¹⁹ Kale aboluganda, mperaano tusobola okwingira mu Kifo Ekitukuvu Einho, nga tuzira kutya kuba Yesu yafa ku lwaife.

²⁰ Yatwiguliragho engira empyaka era ey'obulamu ebita mu lutimbe, okwo n'okubita mu kweghaayo kwe yeeghaayo.

²¹ Nga bwe tuli ni kabona omukulu, akulira enhumba ya Katonda,

²² tuseete ye Katonda n'omwoyo oguziramu buguya, ogwidhwire okwikiriza, nga n'emyoyo gyaife gyamwirwa okuva mu bubi, era nga n'emibiri gyaife ginaaziibwa n'amaadhi amatukuvu.

²³ Tukalangule eisuubi lye tuli nalyo kuba Katonda eyatusuubiza mwesigwa.

²⁴ Tufengayo inho okukubiriza banaife mu kugonzania, n'okukola ebikalamu.

²⁵ Tutagayaaliriranga kwesolozanga ng'abandi bwe bakola. Aye kiisi muntu agumyenga mwine n'okusingira irala nga mperaano bwe muli kubona ng'Olunaku lwa Musengwa luli kumpi okutuuka.

²⁶ Bwe twonoona nga tugendereire ng'ate tumaze okukoberwa amazima, ghaba nga tighakaaligho musengo gwa kugheebwayo olw'ebibi.

²⁷ Ekiba kisigaire, n'okuba mu kutya nga tuteegerera okusalirwa omusango, era n'obukambwe obw'omuliro oguja okwokya abazigu ba Katonda.

²⁸ Omuntu amenha Amateeka ga Musa aitibwa aghazira kusaasirwa, kasita ghabaagho abadhulizi ababiri oba abasatu abamulumiriza.

²⁹ Kale mulowooza ekibonerezo tikirisingagho bukambwe eky'omuntu oyo atyankirira Omwana wa Katonda, era atwala omusaayi ogw'endagaano ogwamutukuza n'agubona ng'ogutali mutukuvu, era n'adhooga Mwoyo ow'ekisa?

³⁰ Kuba twidhi oyo eyakoba ati: “Okulwana enzigu kwange, ndyesasuuza.” Era ati: “Musengwa alisalira abantu be omusango.”

³¹ Nga kitiisa okugwa mu mikono gya Katonda omulamu!

³² Mwidhukire ebiseera eby'eira bwe mwamala okufuna obutangaavu bwa Katonda ni muguminkiriza okudaazibwa okw'amaani.

³³ Emikuzi egindi mwavumibwanga era mwadaazibwadaazibwa mu maiso g'abantu, emikuzi egindi mwalumirwanga ghalala n'abo be bakolanga batyo.

³⁴ Mwalumirwa ghalala n'abasibe era bwe mwanhagibwaku ebyaimwe mwaguminkiriza n'eisanhu, nga mwidhi muti muli n'ekibisinga obukalamu era eky'olubeerera.

³⁵ Kale mutasuula ere kumwesiga kwaimwe, kuba kulimu empeera nnene.

³⁶ Mwetaaga okuguminkiriza, memale musobole okukola Katonda ky'ayenda, n'okugheebwa ekyasuubizibwa.

³⁷ “Kuba esigaire akaseera katono inho, oyo ow'okwidha aidhe, era taja kulwa.

³⁸ Omutuufu wange anaabanga mulamu lwa kwikiriza, aye bw'aira einhuma tiri musangaalira naire.”

³⁹ Aye ife tituli mu abo abaira einhuma ni bazikirira, aye tuli mu abo abaikiriza ni balokolebwa.