Abaheburayi 1 - Baibuli Ekibono kya Katonda 2014

Katonda ayogerera mu Mwana we

¹ Eira Katonda yayogeranga ni badhaadha baife emikuzi kamaala era mu nsambo kamaala ng'abita mu balanzi.

² Aye mu nnaku dhino edhisembayo yaayogera n'ife ng'abita mu Mwana we, ye yataagho okuba mwene bintu byonabyona, era ye yabitamu okutonda ensi.

³ Mu oyo ekitiisa kya Katonda mwe kibonekera, era mu oyo mwe tubonera irala Katonda nga bw'afaanana. Era oyo n'agemereire ebintu byonabyona n'ekibono kye eky'amaani. Bwe yamala okuwonia abantu ebibi byaibwe, yaatyama mu igulu ku luuyi olw'omukono omusaadha ogw'oyo asinga boonaboona obukumu.

Obukulu bw'Omwana wa Katonda

⁴ Mwana yagheebwa ekitiisa ekisinga ekya bamalaika, era nga bwe yagheebwa eriina erisinga agaibwe ekitiisa

⁵ kuba naani ku bamalaika Katonda ye yaali akobyeku ati: “Iwe oli mwana wange, olwaleero nkuzaire?” Oba ati: “Ndidha kuba Ise, ate mwene abe mwana wange.”

⁶ Era Kabiri ng'ali kumpi okutuma mu nsi Omwana we omuberi yaakoba ati: “Bamalaika ba Katonda boonaboona, bamusinzenga.”

⁷ Era bw'ayogera ku bamalaika akoba ati: “Katonda afuula bamalaika be empewo, abagheereza be yaabafuula enimi edh'omuliro.”

⁸ Aye bw'ayogera ku Mwana akoba ati: “Obwakyabazinga bwo, Katonda ow'ekitiisa, bwa byanda na byanda era ofuga abantu bo mu butuufu:

⁹ Ogonza obutuufu waakyagha obudheemu Katonda wo kyeyava akulonda era n'akugha okusangaalira mu kitiisa okusinga baino boonaboona.”

¹⁰ Era akoba ati: “Iwe Musengwa, mu kwinhama watonda ensi era n'ebiri mu igulu, n'iwe owabikola n'engalo dho.

¹¹ Ebyo biriwaagho, aye iwe olisigalagho ebyanda n'ebyanda era byonabyona birikairigha ng'oti bivaalo.

¹² Olibizingaku ng'ekidhuuba era birikyusibwa ng'oti bivaalo. Aye iwe tokyukakyuka, era obulamu bwo tibuwaagho.”

¹³ Aye naani ku bamalaika be, ye yaali akobyeku ati: “Tyama ghano ku luuyi lwange olw'omukono omusaadha, okutuusa lwe ndifuula abazigu bo ekintu kw'ota ebigere.”

¹⁴ Kale bamalaika ti n'emyoyo egigheereza Katonda, gy'atuma olw'abo ab'okulokolebwa?