2 Yoanne 1 - Baibuli Ekibono kya Katonda 2014

Okulamusa

¹ Ninze omukaire mpandiikira omukyala omulonde n'abaana be, be ngonza mu mazima. Era ti ninze zenka aye n'abo boonaboona abaidhi amazima

² agaba mu ife era agaidha okusigala n'ife ebyanda n'ebyanda.

³ Ekisa, okusaasira n'emiraala ebya Katonda Lata ni Yesu Kurisito Omwana wa Lata bibenga n'ife mu mazima n'okugonza.

Amazima n'okugonza

⁴ Nasangaala inho okwagaana ng'abaana bo abandi batambulira mu mazima, oti ni Lata bwe yatulagira.

⁵ Ka nkusabe, omukyala omulonde, nga tiri kukughandiikira kiragiro kiyaaka, aye ekyo kye twali nakyo okuviira irala mu kwinhama nti: Tugonzanienga.

⁶ Ate okugonza kitegeeza okutambula nga tujiira ku biragiro bye. Ekiragiro ni kino, era nga bwe mwawulira okuviira irala mu kwinhama, mugonzanienga.

⁷ Abaguya kamaala baasansaanira mu nsi, abataganha nga Yesu Kurisito yaidha ng'omuntu. Omuntu yeenayeena ali ng'oti n'abo muguya era Muzigu wa Kurisito.

⁸ Mwekuume, mulobe kusubwa ekyo kye mwakolerera, aye mufune empeera yaimwe mu bwidhuvu.

⁹ Oyo yeenayeena ayawuka n'atasigala ku ndhegeresa ya Kurisito taba na Katonda, aye oyo asigala ng'ali ku ndhegeresa ya Kurisito aba ni Lata era ni Mwana.

¹⁰ Omuntu yeenayeena bw'aidhanga ye muli ng'aleeta endhegeresa etali eno, mutamusangaazanga mu maka gaimwe era mutamulamusanga.

¹¹ Kuba oyo amulamusa aba aisania naye mu bibye by'akola.

Okusiibula

¹² Waire nga ndi na kamaala eby'okubaghandiikira tyandyenze kukozesa lupapula na bwino, aye nsuubiire okubabona n'okwogera n'imwe maiso ku maiso, memale tusangaalire irala.

¹³ Abaana ba muganda wo omulonde bakulamwisa.