2 Timotheo 4 - Baibuli Ekibono kya Katonda 2014

¹ Nkusikirira mu maiso ga Katonda ni Kurisito Yesu, aja okusalira abalamu n'abafu omusango, era aja okwira okufuga nga Kyabazinga.

² Koberanga abantu ekibono, badeebe oba bakisiima oba tibakisiima, bainhonhole, obanenie era obagumye, obeegerese n'obuguminkiriza.

³ Kuba ekiseera kiri kwidha abantu balekere okuwulira okwegeresa okw'amazima, aye olw'okwenda einho okuwulira ababeegeresa ebibanhoonha, balyagala abeegeresa aba buli nsambo.

⁴ Balirekera okuwulirisa eby'amazima, beemalira mu kuwulirisa nfumo.

⁵ Aye iwe banga mwetegefu buliidho, gumiranga okudaagadaaga, kolanga omulimo ogw'okukobera abantu Amawulire Amalungi ng'omugheereza wa Katonda.

⁶ Kuba nze ndi kumpi okugheebwayo ku alutaari ng'omusengo, esaawa yange ey'okuva mu bulamu buno teri ghala.

⁷ Nwaine bukalamu olutalo, embiro ndhimaliriiza, ngumiire ku kwikiriza.

⁸ Era mperaano Katonda ambiikiire eyo obutuufu ng'ekirabo eky'obughanguzi, Musengwa era omulamuzi omutuufu ky'alimpa ku Lunaku lule. Taligha nze zenka aye aligha abo boonaboona abeesunga okwira kwe.

Paulo by'asembyayo

⁹ Kola kyonakyona ky'oghanga oidhe eno mangu

¹⁰ kuba Dema olw'okugonza einho eby'oku nsi kuno yandekulira agho, yaaja e Thessalonika. Kuresike yaja Galatia ate Tito yaaja e Dalumatia.

¹¹ Ghano ndigho ni Luka yenka. Yagala Mariko gh'ali oidhe naye kuba anhamba inho mu kugheereza.

¹² Tukiko namutuma mu Efeso.

¹³ Bw'oba ng'oidha ondeetera ekivaalo kyange kye nalekera Karupo e Turoa, n'ebitabo, okusingira irala ebyo eby'empu.

¹⁴ Alekisandero omugheesi yankola bubi inho, aye Musengwa alimwesasuulizaaku olw'ebyo bye yankola.

¹⁵ Weena mwegendereze inho kuba yatakania inho obukwenda bwaife.

¹⁶ Lwe neewozaaku olwasooka ghazira yali ku luuyi lwange, boonaboona bandekulira agho. Aye Katonda mmusaba alobe kubalanga ekyo!

¹⁷ Aye Musengwa yali ninze, era yampa amaani naakobera mu bwidhuvu abamaghanga agandi ekibono kya Katonda, baakiwulira. Olwo yamponia okunsalira ogw'okufa.

¹⁸ Era Musengwa oyo aidha kumponia kiisi kibi kyonakyona, antuuse bukalamu mu Bwakyabazinga bwe obw'omu igulu. Agheebwenga ekitiisa ebyanda n'ebyanda. Amiina.

Okusiibula

¹⁹ Namukiza Purisikilla ni Akwila n'ab'omu ndhu ya Onesiforo.

²⁰ Erasito yasigala mu Korintho, ate Turofimo naamuleka e Mileto nga mugodhe.

²¹ Fuba nga bw'osobola oidhe ng'ebiseera eby'ekiinhogogo bikaali kutuuka. Eubulo, Pudente, Lino, Kilaudia n'Abakurisito abandi boonaboona bakulamwisa.

²² Musengwa abe n'omwoyo gwo. Enkabi dha Katonda dhibe n'imwe mwenamwena.