2 Timotheo 3 - Baibuli Ekibono kya Katonda 2014

Abantu mu nnaku edhirisembayo

¹ Aye kino kimanhe, nga mu nnaku edhirisembayo ghalibaagho ebiseera eby'akabi.

² Abantu balyefaaku bonka, baliba n'amairu ag'empiiya, balyetuusa, balyesaakiriza, baliba bavumagani, baliroba okuwulira ababazaala, baliba abatasiima, abatali batukuvu,

³ abatalumirwa banaibwe, abatasaasira, abasala ku banaibwe ebibono, abatasobola kwefuga, abakambwe, abakyagha kiisi kikalamu,

⁴ abateesigika, abagwidhubana, abaghaganhala olw'okwebona nga ba ghaigulu, abagonza eby'amasanhu mu kifo ky'okugonza Katonda,

⁵ abeeyeta Abakurisito aye nga tibenda Bukurisito kubafuga. Weesambenga abantu ng'oti n'abo.

⁶ Mu abo n'omuli abaja mu maka ag'abantu ni baagaanamu abakazi abanafu mu myoyo, ni babatwala ng'abairu. Bano n'abakazi abaidhwire ebibi era abatwalirizibwa ebintu kamaala.

⁷ Abakazi bano beetegefu okwega, aye tibaghanga kutuuka ku kumanha mazima.

⁸ Nga Yanne ni Yambure bwe baatakania Musa, n'abantu abo batyo bwe batakania amazima. Bano n'abantu abaafa emyoyo era abatakaali na kwikiriza.

⁹ Aye tibaidha kutuuka ghala, kuba buli muntu aidha kubona obusiru bwaibwe ng'oti n'obwa Yanne ni Yambure bwe bweyoleka.

Okugalagira Timotheo okwasembayo

¹⁰ Aye iwe obaire olondoola bukalamu bye mbaire nga ndhegeresanga, ensambo ye neebisaamu, ekigendererwa kyange mu bulamu, okwikiriza kwange, okugumira ebizibu kwange, okugonza kwange, okuguminkiriza kwange,

¹¹ okukirigibwa kwange, okudaagadaaga kwange, ebyantuukaku nga ndi mu Antiokia ni mu Ikonio ni mu Lisitura. Nga nakirigibwa inho! Aye byonabyona Musengwa yabimbisaamu bukalamu.

¹² Bwenebwene kyo kiri nti kiisi ayenda okuba mu bulamu obutya Katonda mu Kurisito Yesu wa kukirigibwa,

¹³ eno ng'abakozi b'ebibi n'abaguya bwe beeyongera okuba ababi, nga baguya ate nga beene boona babaguya.

¹⁴ Aye iwe weeyongere okugumira ku ebyo bye wayega, era n'obiikiririza irala, olw'okumanha abo be wabyegeraku.

¹⁵ Era oidhukira ng'okuva mu buto bwo obaire oyegeresebwa Ebyaghandiikibwa Ebitukuvu ebisobola okukugalagira okukutuusa ku kulokolebwa olw'okuba n'okwikiriza mu Kurisito Yesu.

¹⁶ Ebyaghandiikibwa byonabyona byava mu buyinza bwa Katonda era bya muganhulo mu kwegeresa, mu kunenia, mu kugondhoola ebidobaine, ni mu kugalagira omuntu abe mutuukirivu.

¹⁷ Olwo omuntu wa Katonda abe mwetegefu ng'ali n'ebyetaagisa byonabyona okukola kiisi mulimo omukalamu.