2 Timotheo 2 - Baibuli Ekibono kya Katonda 2014

Omwisirukale omwesigwa owa Kurisito Yesu

¹ Iwe niini mwana wange, weekalangule ng'oyambibwa amaani agali mu kwisa ekirala mu Kurisito Yesu.

² Ebyo bye wawulira nga nkoba mu maiso g'abadhulirwa abangi, bigemye abantu abo abeesigwa abalisobola boona okubyegeresa abandi.

³ Ganha okudaazibwadaazibwa ng'omwisirukale wa Kurisito Yesu omutuufu.

⁴ Ghazira mwisirukale aba ku mulimo kabiri amala n'aira mu midoobaano gya bantu babuliidho. Ekiseera kyonakyona aba ayenda kukolera ku biragiro by'omuduumizi.

⁵ Ole angira mu mizaanho egy'entaka taghanga kugheebwa kirabo nga tajiiriire ku mateeka ga mizaanho egyo, ni bw'aba nga n'asinze baine.

⁶ Omulimi eyafuba n'asooka okulya ku bibala.

⁷ Isanga omwoyo ku bye ndi kukoba, Musengwa aidha kukugha okutegeera byonabyona.

⁸ Idhukira Yesu Kurisito, mwidhukulu wa Daudi eyazuukizibwa mu bafu ng'Amawulire Amalungi ge mbakobera bwe gakoba.

⁹ Ndaazibwadaazibwa olw'okuba mbakobera Amawulire Amalungi, era naasibwa endhegere ng'oti ndi mukozi wa bibi. Aye kasita ekibono kya Katonda tiikisibe kya ludhegere.

¹⁰ Kyenva ngumira buli kintu olw'obulungi bw'abalonde, olwo bafune okulokolebwa n'ekitiisa ekitawaagho ebiri mu Kurisito Yesu.

¹¹ Ekibono kino kituufu ekikoba kiti: “Oba nga twafiira ghalala naye, era tuliba balamu ghalala naye.

¹² Bwe tuguma tulifugira ghalala naye; bwe tumwegaana yeena alitwegaana.

¹³ Bwe tutaba beesigwa, mwene asigala nga mwesigwa; kuba tasobola kwegaana kye yakoba.”

Omukozi Katonda y'asiima

¹⁴ Baidhuse kino era obasikirire mu maiso ga Musengwa, balobenga kutakana lwa bibono bubono. Kino kiziramu muganhulo okutoolaku okwitaitana abawulira.

¹⁵ Kola kyonakyona ky'osobola osiimibwe Katonda, obe mukozi atagemerwa mulimo gwe nsoni, era ayegeresa obukalamu ekibono eky'amazima.

¹⁶ Oteeyimbanga mu mpayo dhiziramu kutya Katonda, edhongera obwongere abantu obutatya Katonda.

¹⁷ Ate ebibono byaibwe bisansaana ng'oti ibwa lya kokolo. Mu abo n'omuli Himenao ni Fileto,

¹⁸ abaadaaliima ni bava ku mazima nga bakoba mbu okuzuukira kwamala ira okubaagho, mu kukola batyo baakiidhamya okwikiriza kw'abantu abandi.

¹⁹ Aye omusingi gwa Katonda mugumu era gughandiikiibwaku ebibono ebikoba biti: “Musengwa aidhi ababe,” era ni biti “Kiisi ayatula eriina lya Musengwa ateekwa okuva mu bibi.”

²⁰ Mu ndhu enkologho timubaamu bibya bya zaabu na feeza byonka, aye mubaamu n'eby'omuti n'eby'eitosi ebindi bikozesebwa ku mirimo egy'ebbeeyi, ate ebindi byakozesebwa ku mirimo egyabuliidho.

²¹ Omuntu bwe yeetukuza n'ava mu bibi byonabyona, afuuka ekibya ekikozesebwa emirimo egy'ebbeeyi, ng'atukuziibwa era nga wa mugaso ye Musengwa era eyeetegeike okukola omulimo gwonagwona omukalamu.

²² Agho ni lekanga ebitwaliriza abaisuka byonabyona, okolererenga obutuufu, okwikiriza, okugonza, n'emiraala nga weeyimbye n'abo abasinza Musengwa n'omwoyo omunaabuufu.

²³ Oteeyimbanga mu kutakana kuziramu makulu oidhi ng'omwo n'omuva okusoolasoola.

²⁴ Ate nga omugheereza wa Musengwa tateekwa kuba asoolasoola, ateekwa kuba wa kisa eri kiisi muntu, omwegeresa omutuufu, ateegania,

²⁵ era agalagira abamutakania aghazira ikabyo, kuba tomanha Katonda bw'abagha kwenenia ni beiraku ni bamanha mazima.

²⁶ Agho baasobola okuwunuka omutego gwa Sitaani ogwabagemya n'abakoza by'ayenda.